Mwimburija Yehova mu Kwikal Mwin Kubangin ni Muntu Muwamp

1. Mutapu ik umekeshinau in kumwifukwil Yehova anch akatijadin umwing ni mukwau?

IN KUMWIFUKWIL Yehova adia pa mangand mawonsu adi antu a dijuku dimwing. Adi akadivar nau anambaz akatijadina umwing ni mukwau. (1 Yohan 4:16, 21) Yisu yimwing akat kwipan chipandakena mulong wa akadivar nau, pakwez yisu yikwau akat kumekesh rukat kusutin tuyom tukemp tukemp tuvud tukatau kuyisadin. Chilakej, akutwish kuyilej akadivar nau chom chiwamp ap kuyisadin mu mutapu uwamp. Anch tudi in kuyibangin akwetu, tumwimburijin Tatukwetu wa mwiur.—Efes 5:1.

2. Mutapu ik wimburijay Yesu rukat ra Tatukwend?

² Yesu wamwimburija nawamp nakash Tatukwend. Yisu yawonsu wayisadinang akwau mu mutapu uwamp. Walonda anch: “Ezany kudi am, en awonsu uziyinanya mulong wa yisend yikasikena ya mitapu ni mitapu, chad am nikez kukwambulany.” (Mateu 11:28, 29) Anch twamwimburij Yesu ni twamekesh anch tukat “kuyitong ayimanamar,” tukumusangaresh Yehova, niyetu tukusangar kand. (Kuseng 41:1) Mu mutu wa mulong winou, tukuman mutapu tukutwisha kuyibangin antu a mu dijuku dietu, akadivar nau anambaz netu ni antu tutanina mu mudimu wa kulejan.

YIBANGINA ANTU A MU DIJUKU DIEY

3. Mutapu ik ukutwishay ngatan kumubangin mukajend? (Tal chipich cha kwisambishin.)

³ Angatan afanyidin kusha chilakej ni kumekesh anch alamin nawamp majuku mau. (Efes 5:25; 6:4) Bibil ulondin anch angatan afanyidin kuyibangin ni kuyitesh akajau. (1 Pita 3:7) Ngatan muwamp wij anch ap anch ushalijadin ni mukajend mu mitapu yivud, kadiap muwamp nakash kumusutamu mukajend. (Disambishil 2:18) Ukat kubangin yovil ya mukajend ni kumusadin nich kalimish. Mband umwing wa mu Canada ulondin piur pa nfumwend anch: “Kakatap kupipej ap kudiul yovil yam ap kwingel anch: Ufanyidinap kwiyov mwamu.’ Uding kand mwin kwintesh muwamp. Chisu chikatay kwinkwash kutenchik yitongijok yam pa mulong kampand, ukat kusal mwamu nich kudimuk.”

4. Mutapu ik ukutwishay ngatan kumekesh anch ubangidin yovil ya mukajend kusutil mutapu uyisadidinay amband akwau?

⁴ Ngatan ubangidina yovil ya mukajend kakutwishap kwizez nau amband akwau ap kumekesh anch uyibangidin nakash, patanijadinay nau kwi ndond kanang, pa tupend twa antu awonsu ap pa Internet. (Job 31:1) Kakatap kusadin tupend twa kupalangesh nich jinsangu mulong wa kwizez nau amband akwau ni kakutalangap tupend tulejena yom yiyimp. Chakin kamu, ukat kushal ushinshamena kudi mukajend mulong umukatin ni mulong umukatin Yehova ni ukisin yom yidia yiyimp.—Tang Kuseng 19:14; 97:10.

5. Mutapu ik ukutwishay mband kumubangin nfumwend?

⁵ Anch ngatan wimburij chilakej cha rukat cha ntakel wend Yesu Kristu, chikumuswapel mukajend kwikal nich ‘kalimish kakurikina’ mulong wendendiy. (Efes 5:22-25, 33) Ni anch wamulimish nfumwend, ukusal usu wa kutesh yovil yend ni kumusadin mu mutapu uwamp anch ukwatiken nakash ni milong ya chikumangen ap chisu chikwetay milong yikwau yirishinay nich. Ngatan umwing udia mwi ngand ya Grande-Bretagne ulondin anch: “Chisu chimwing, mukajam ukutwish kujingunin kusutin mwikadil wam anch kudi chom kampand chingakamishina. Kupwa ukusadin mbil tutanina mu Jinswir 20:5, ap anch chitin kudi ndiy kuchingel chisu chiwamp chakwel ‘avita’ yitongijok yam anch udi mulong nikutwisha kwisamb nend.”

6. Mutapu ik tukutwisha etu awonsu kuyikasikesh an akemp kuyitongin akwau ni kwikal antu awamp, ni mutapu ik ukutaninawamu?

⁶ Anch anvaj akat kubangijadin umwing ni mukwau, ashil chilakej chiwamp kudi anau. Afanyidin kand kuyifundish anau kuyitongin antu akwau ni kwikal antu awamp. Chilakej, anvaj akutwish kuyifundish anau anch kafanyidinap kuya mau mu Chot cha Want. Ap chisu chidiau ku musambu, akutwish kuyilej anau kuchingel amakurump asambel kunon yakudia. Chakin kamu, muntu mwawonsu mu chikumangen ukutwish kuyikwash anvaj. Chawiy tufanyidin kumujikitish mwan anch wasal chom chiwamp, chilakej, anch watwazuril ku chis. Chinech chikumwovish mwan kuwap ni chikumukwash kwilej anch “chiyukish cha mwin kupan chipandakenamu cha mwin kutambul.”—Midimu 20:35.

YIBANGINA ANTU A MU CHIKUMANGEN

7. Yesu wamubangina mutapu ik kajika-matu, ni yom ik tukutwisha kwilej ku chilakej chend?

⁷ Dichuku dimwing, Yesu wading mwi ngand ya Misumb Dikum chisu chamuletinau kudi antu “ikundj kajika-matu wading kand kamam.” (Marko 7:31-35) Yesu wamwoka, pakwez kamwokinap mukach mwa antu. Mulong wak? Mulong muntu wading kajika-matu, pamwing ap wading wiyovil nayimp mukach mwa antu avud. Yesu wijika yovil yend ni “waya nend kuns” kwi ndond kwading kwakad muntu ni wamwokina kwinakwa. Chakin kamu, etu tukutwishap kusal yilay, pakwez tukutwish kutong piur pa maswir ni yovil ya akadivar netu ni kwikal antu awamp kudi awiy. Kambuy Paul wafunda anch: “Tutalijanany muntu ni mukwau chakwel tukwashijanany kumekesh rukat ni kusal yisalijok yiwamp.” (Hebereu 10:24) Yesu wajingunina mutapu wading wiyovilay kajika-matu ni wamwanakena. Chilakej chiwamp mud ik kudi etu!

8, 9. Mutapu ik tukutwish kumekesh anch tuyibangidin amapal ni antu akweta ulim? (Let yilakej.)

⁸ Yibangina amapal ni ayilim. Rukat chidi chijingidij cha usey nakash cha chikumangen cha win Kristu, kadiap midimu yivud tukutwisha kusal mu chikumangen. (Yohan 13:34, 35) Rukat rikat kusal anch tusala yom tukutwisha kusal mulong wa kuyikwash akadivar nau anambaz netu ananapina kal ap ayilim mulong wa kuya ku yikumangan ap mu mudimu wa kulejan. Tukat kuyikwash ap anch chiswapelap kusal mwamu ni ap anch awiy kakutwishap kusal yom yivud. (Mateu 13:23) Michael, ushiching mu chitwam cha makar, udi mwin kujikitish nakash mulong wa ukwash wa dijuku diend ni wa akadivar nau anambaz nend a mu chikumangen. Ulondin anch: “Kusutil ukwash wau, nikwet mutapu wa kuya ku yikumangan yisu yivud ni kulejan pakad kujing. Nikatining kulejan pa ndond yidia antu avud.”

⁹ Mu ma Betel mavud, mudi akadivar nau anambaz ashinshamena ananapina kal ap akweta ulim. Atulam in kubangin akat kuyimekeshin rukat kusutil kutenchik chakwel amapal inay alejana mu kufund mikand ni kusadin telefon. Bill, ukweta katat mivu 86 ni ukata kuyifundin antu adia ku jindond ja kulemp, ulondin anch: “Tusangaredin nakash chisend cha kufund mikand.” Nancy, ukweta mivu piswimp 90, urumburil anch: “Nikatap kuman anch kufund mikand kudi kwau kubam ma anvelop. Winou udi mudimu wa kulejan. Antu akwet kuswir kwa kwijik uyakin!” Ethel, wavadika mu muvu wa 1921, ulondin anch: “Nikat kwovang kusansan chisu chawonsu. Machuku mamwing chinkasikedining ap kudjal masun.” Ap mwamu, nambaz winou ukat kusanger kulejan ku telefon ni ukwet antu amwing akatay kuchirikin. Barbara, ukweta mivu 85, ulondin anch: “Mulong nikat kuyelol, nimening anch mudimu wa kulejan mu teritwar winkasikedin nakash. Pakwez kulejan ku telefon kukat kwinkwash kuyilej antu akwau. Wajikit Yehova!” Piswimp muvu umwing, chisak cha amapal akweta usey nakash alejen asaa 1 228, afundin mikand 6 265, atazuken ku telefon tupamp 2 000, ni apanin yichap 6 315! Tukutwish kwikal nich kashinsh anch usu wau umusangareshin Yehova nakash!—Jinswir 27:11.

10. Mutapu ik tukutwisha kuyikwash akadivar nau anambaz chakwel ataninamu nakash mu yikumangan?

¹⁰ Ikal mwin kuyibangin antu akwau ku yikumangan ya win Kristu. Anch tudi in kubangin, tukat kuyikwash akadivar netu kutaninamu nakash mu yikumangan. Mutapu ik? Mutapu umwing tukutwisha kusal mwamu kudi kushik kurutu kwa chisu chakwel kangal tuyiletin kampuw. Yisu yimwing, yishiken yakad kuchingejin yikutwish kusal anch tulaba kushik ku yikumangan. Pakwez anch yisu yivud tukat kulabang, tukutwish kutong mutapu tukata kuyirumbangesh antu akwau ni kuswimp chakwel tumekesha anch tuyibangidin. Vurik kand anch, Yehova ni Mwanend awiy atutazukina ku yikumangan. (Mateu 18:20) Tufanyidin chakin kamu kumekesh anch tuyilimishin mu kushik kurutu kwa chisu!

11. Mulong wak akadivar akweta yikunku ku yikumangan afanyidin kulondul umutakel udia mu 1 Korint 14:40?

¹¹ Anch tudi in kuyibangin akadivar netu, tukulondul umutakel wa Bibil ulondina anch: “Yom yawonsu yisadika nich kalimish ni pakad kanrumbangesh.” (1 Korint 14:40) Akadivar akweta yikunku ku yikumangan akat kulimish mbil yiney anch apwish yikunku pa chisu. Mu kusal mwamu, kamubangidinap kwau ching mwin kulond ukwambakena pakwez abangidin kand chikumangen chawonsu. Tong mutapu ukwiyovau antu akwau nayimp anch yikumangan yalab ni kupwa. Akadivar amwing afanyidin kwendish motak chintamp chilemp mulong wa kuya kwol kwau. Akwau afanyidin kwandam mu bis ap mu train chakwel ashirika. Ni akwau kand akwet ambay a uruw akad kwikal Atuman achingejina anch ambay nau achirikang ku chikumbu pa chisu kanang.

12. Mulong wak amakurump awanyidin kuyilimish ni kuyikat? (Tal mushet ulondina anch “Ikal Mwin Kuyibangin Antu Atakedila.”)

¹² Amakurump a chikumangen asadin mudimu nakash mu chikumangen ni mu mudimu wa kulejan, chawiy awanyidin kuyilimish ni kuyikat. (Tang 1 Tesalonik 5:12, 13.) Chakin kamu ukat kujikitish nakash mulong wa yom yawonsu yisadinau mulong weyey. Ukutwish kumekesh mwamu mu kuyiziyin nich muchim umwing ni kuyikwash mulong ‘akat kukulamany chisu chawonsu mudi antu akupana kuchind.’—Hebereu 13:7, 17.

YIBANGINA ANTU UTANINA MU MUDIMU WA KULEJAN

13. Yom ik tukutwisha kwilejin kusutin mutapu wayisadinay Yesu antu?

¹³ Mu uprofet wisambidina piur pa Yesu, Isay walonda anch: “Kakez kabukunap mushiy udia piswimp ni kubukuk, ap kakez kajimishap kasu kadia piswimp ni kujim.” (Isay 42:3) Rukat radingay nich Yesu mulong wa antu ramubachika kumekesh ranaken. Wijikang yovil ya antu ading aziyila mudi “mushiy udia piswimp ni kubukuk” ap “kasu kadia piswimp ni kujim,” chawiy wayisadinang mu mutapu uwamp ni kushimpish muchim. Ap an akemp akata kwikal pamwing ni Yesu. (Marko 10:14) Chakin kamu, tukutwishap kuyitesh antu ap kuyifundish mudi mutapu wasalay Yesu! Pakwez tukutwish kumekesh anch tuyibangidin antu a mu teritwar wetu kusutin mutapu twambambina nau, chisu tuyila kuyital ni kulep kwa chisu tukata kushakam nau.

14. Mulong wak tufanyidin kutong piur pa mutapu twambambina nau antu?

¹⁴ Mutapu ik tufanyidina kwambamb nau antu? Nlel mamiliyon ma antu “aziyin ni kujilijil” mulong wa kwisak kwa kukatul milamu ni kwa chisum ni mulong wa antakel a chipolitik ni a relijon a mangand minam. (Mateu 9:36) Mudi chibudikin, avud kamuchingejidinap muntu ni kakwetap ruchingej. Chawiy mazu tusadidina ni mutapu wa kulond ufanyidin kumekesh kudi antu anch tukwet ranaken ni tuyibangidin! Antu avud akwet kuswir kwa kutesh uruu wetu chidiap anch mulong tusadidin Bibil nawamp pakwez mulong tuyibangidin nakash ni tuyilimishin.

15. Mitapu ik yimwing tukutwisha kuyibangin antu a mu teritwar wetu?

¹⁵ Kudi mitapu yivud tukutwisha kumekesh anch tuyibangidin antu a mu teritwar wetu. Tufanyidin kwipul mu mutapu uwamp ni wa kalimish. Chibol umwing wasadina mu teritwar mwadinga antu akad kulondolang nakash, wipuka kwipul yipul yikutwisha kuyovish antu usany anch kijap kamu nawamp chakul. Kakatap kwipul mudi anch, “Ov, wij dijin dia Nzamb?” ap “Ov, wij anch want wa Nzamb chom ik?” Pakwez wakata kulond mudi anch, “Nilejin mu Bibil anch Nzamb ukwet dijin diend. Ov, nikutwish kukulej dijin dined?” Mutapu winou kakutwishap kuusadin kwi ndond kwawonsu, mulong antu ni yaku yau yishalijadin. Pakwez tufanyidin chisu chawonsu kuyisadin antu a mu teritwar wetu mu mutapu uwamp ni wa kalimish. Mulong wa kusal mwamu, tufanyidin kamu kuyijik nawamp.

16, 17. Mutapu ik tukutwisha kumekesh kuwap patukwatina mupak wa (a) chisu cha kuyendin antu? (b) kulep kwa chisu tukwambamba nau?

¹⁶ Chisu ik tufanyidina kuya kuyital antu? Chisu tuyila kulejan ku chis ni chis, antu kachingejidinap anch tukwez mulong katutazukangap. Chawiy chidi cha usey nakash anch tuyendila pa chisu chikatinau kwambamb nau. (Mateu 7:12) Chilakej, ov, antu a mu teritwar wey akatining kulal chisu chilemp kwinsudiel kwa rubing? Pamwing ap ukutwish kusambish mudimu wa kulejan mu balibal, pa ndond padia antu avud ap kuyichirikin antu wija kamu anch adiaku ni akatin kwambamb ney.

¹⁷ Asaa inch tufanyidina kwambamb nau? Antu avud akwatiken nakash, chawiy chiwapin kukepish mambamb metu, nakash anch tudi kwinsambishin. Chidi chiwamp nakash kupwish mambamb metu swa-swa pa ndond pa kusal asaa avud. (1 Korint 9:20-23) Anch antu aman anch twij anch akwatiken, akutwish kukat kwambamb niyetwetu chisu chikwau pitukweza kand kuyital. Anch twamekesh mikadil yidiokila ku spiritu wa Nzamb, tukwikal chakin kamu ‘ambay a mudimu pamwing ni Nzamb.’ Yehova ukutwish kutusadin mulong wa kumukwash muntu kanang kwilej uyakin!—1 Korint 3:6, 7, 9.

18. Anch twayibangin antu akwau, yiyukish ik tukuchingeja kutambul?

¹⁸ Chawiy el amboku etu awonsu tuyibangina antu a dijuku dietu, akadivar nau anambaz netu ni antu tutanina mu mudimu wa kulejan. Mwamu, tukwikal ni yiyukish yivud, kusambish nlel djat ni machuku ma kurutu. Mudi mulondinay Kuseng 41:1, 2 anch: “Wayuk muntu ukata kuyitong ayimanamar, chawiy [Yehova] ukumukamunin mu dichuku dia mar. [Yehova] ukamulam, ukamwikadish mwom, chad ukez kayuk pansh panap.”