Tumekeshany Kusanger kwa Pakampwil—Mu Kwikal in Riy
1 “[Yehova] udi mwin riy.” Kus. 145:8 Ap anch udiap nchik Mukaleng Mwin Mangand, ukat kumekesh uwamp, ranaken ni urund mu kusadil pamwing nau antu akad kutentam. (Dis. 13:14; 19:18-21, 29) Tukutwish kuwapish kulejan kwetu kwa rusangu ruwamp mu kumwimburij Nzamb wetu mwin riy. (Kol. 4:6) Chinech chitin kusal yivud kulik kusu kumekesh yisal yiwamp ni kalimish mu kulond kwetu.
2 Ku Chis ni Chis: Yom ik tufanyidina kusal anch twamutan mwin chikumbu pa chisu chakaday kuchingejin ap chikwatikenay chakwel kwambamb nend? Mu mwikadil winou tukutwish kusadil manangu chakwel kulejan mu wiswimp ap kumwit mulong wa kuchirik kumutal chisu chikwau. Nich kalimish tufanyidinap kuyishindil antu kutambul mikand yetu anch alikin. Kuyilimish antu akwau kukutubachik kand kulimish yom yau, mud kupat ku chis cha rupang ni yis ya yikumbu, ni kuyifundish anetu kusal chilik chimwing. Tufanyidin kushinshikin anch mukand win wawonsu ushadila ku chikumbu kwakad kwikal antu kaumenap kudiau amusuta njil. Chakin, riy rikutubachik kuyisadil antu akwau mud mutusotila anch niyawiy atusadilang.—Luka 6:31.
3 Kulejan Mwi Njil: Pitulejena mwi njil, tukutwish kumekesh yaku yiwamp ya kulik kujik mwi njil ya kusutin antu akwau ni kulik kwikungin kwi ndond kulandishidinau. Tufanyidin kudimukin mikadil ya antu akwau, ni kwisamb nau antu akutwisha kwikal nich chisu chikemp pa ndond pa kwisamb nau antu asadila yom ya mau-mau. Yisu yimwing, tukutwish kwikal nich kuswir kwa kulond nich dizu dia piur mulong wa masok ma mwi njil. Pakwez, tufanyidin kusal mwamu nich kalimish, pakad kwimekesh.—Mat. 12:19.
4 Pitulejena Uman wa ku Telefon: Kuyilimish antu akwau kukutubachik kulejan uman wa ku telefon mwi ndond mukutwisha kwikal zong. Tukat kumekesh yaku yiwamp chisu twiyijikishina ayinetu pakad kulab ni kulejan diyingishin dia kutazuk kwetu. Kulond kapamp kamwing ku telefon ni kusadil dizu diovakena kukutukwash kuyandjik antu akwau mu minsamb ya Bibil yikasikeshina. (1 Kor. 14:8, 9) Kusutil ku kwikal adimukina, in kalimish, ni in masip mu mitapu yiney kushalijan, tukat kumwimburij Yehova, Nzamb wetu mwin riy.