Mazu Ma Ranaken Makasikeshining Urund Uwamp

“Lik kulond kwen kwikala ni ranaken machuku mawonsu.”​—KOL. 4:6.

1, 2. Mazu ma ranaken ma mukadivar mikala ni chibudikin ik chiwamp?

MUKADIVAR umwing ulejen anch: “Pinadinga mukulejan ku chis ni chis, natana muntu umwing wajimana nakash ni milamu yend yasambisha kuzal ni mujimbu wend wawonsu wanyikeka, napakisha kutongijok nend nich kwitudish piur pa Mukand wa Nzamb, pakwez ndiy wadandamena kujiman nakash. Mukajend ni anend asambisha kwinlondol, namana anch chawiy chisu nifanyidina kubudik. Nayileja in dijuku dined anch am neza mu chisambu ni nasota kuya mu chisambu. Nayileja Galate 5:22 ni 23, wisambidina piur pa rukat, kwitudish, kwishitul ni chisambu. Kupwa nabudika.

² “Pasuta machuku, pinadinga nisutina mwinjil yisutina pa chikumbu chinicha, namana dijiku dinidia diashakamang kal kurutu kwa chikumbu. Asambisha kwintazuk. Nasambisha kwiyipul anch ‘Chom ik chisotinau kusal katat?’ Ikundj winou wading usendin nsab wa mem matalela ni wanginkisha chakwel nina. Kupwa wita dilikishin mulong waburena kalimish ni wanjikitisha mulong wa ritiy ram rikash. Twaurika mu chisambu.”

3. Ov, mulong wak tufanyidin kukangesh chakwel kuyilikidil antu akwau atwovisha ujim?

³ Mu mangand ma katat mizwila nich yipwichik, tukat kusankanijan ni antu akweta ujim, pamwing ni mu mudimu wa kulejan. Mukulejan, chidi cha usey kumekesh “kwitudish ni kalimish.” (1 Pita 3:15) Anch mukadivar utwisambinang kwinsambishil walikidila ujim ni uyimp wa mwin chikumbu umwovisha ujim, mwikadil wa muntu winou kiwelap kuswimp mudi mwasalay; pakwez wela kand kujiman nakash. Mulong mukadivar wilama amwinend ni walonda mazu ma ranaken, chibudikin chading chiwamp.

Ov, Chom ik Chisadila Mazu Mikala ma Ranaken?

4. Ov, mulong wak chidi cha usey kusadil mazu ma ranaken?

⁴ Pitushakamina ni antu a pol ap adia mu chikumangen, ap ni yid ya dijuku, chidi cha usey kulondul chiyul cha kambuy Paul walonda anch: “Lik kulond kwen kwikala ni ranaken machuku mawonsu kutadila mudi mungu.” (Kol. 4:6) Mazu matadila, ni mafanyidina madi ma usey chakwel kwikala mambamb mawamp ni chisambu.

5. Ov, kwambamb kuwamp kurumburikinap ik? Let chilakej.

⁵ Kwambamb kuwamp kurumburikinap kulond yawonsu yiutongina ap yiukata kwov chisu chawonsu, pakurumbukidinau. Bibil ulejen anch ujim wakad kuyikel chidi chijingidij cha kuziyol, ap kuburen usu. (Tang Jinswir 25:28; 29:11.) Moses​—“mwin kwitudish nakash” kupandakan antu awonsu adinga aom​—walikidila chisu chimwing kubwambwil kwa muchid wa in Isarel kumushadishina kwitudish kwend ni wakanganya kumutumbish Nzamb. Moses walonda patok kulondulijan ni yovil yend, pakwez Yehova kasangarap. Kupwa kwa mivu 40 ya kuyitakel in Isarel, Yehova kitiyap anch Moses ayandjika mwingand ya kushilamu.​—Kuch. 12:3; 20:10, 12; Kus. 106:32.

6. Ov, Kwikal ni ronganyin mu mazu metu kurumburikin ik?

⁶ Bibil witin kwilam ni ronganyin, ap kujingunin kuwamp, pitulondina. “Kuvul kwa mazu kukuburenangap kurumbuk pakwez ukukanda milamu yend udi mwin kubabal.” (Jinsw. 10:19; 17:27) Chikwau kand, kwikal ni ronganyin kurumburikinap kuburen kulond. Kurumburikin kulond “ni ranaken,” ni kusadil rudim mulong wa kwok pandond pa kwovish kuyip.—Tang Jinswir 12:18; 18:21.

“Chisu Cha Kuninet ni Chisu Cha Kulond”

7. Ov, yom ya mutapu ik yitufanyidina kulik kulond, ni mulong wak?

⁷ Mudi mutuswiridina kumekesh ranaken ni kwilam pitwisambina ni ambay netu a mudimu ap angendj mu mudimu wa kulejan, tuswiridin kand kumekesh ranaken mu chikumangen ni ku chikumbu. Kusal yom ni ujim pakad kutongin pa yibudikin kukutwish kuyipish nakash ukash wa muspiritu, wa yovil, wa mujimbu wetu ni wa antu akwau. (Jinsw. 18:6, 7) Chifanyidin kuyikel​—yovil yiyimp—​yimekeshina anch tudi antu akad kuwanyin. Masaal, kuswingishan, kuburen kalimish, ni ujim ukash yawonsu yidi yiyimp. (Kol. 3:8; Jak. 1:20) Yikutwish kushesh urund uwamp pamwing ni antu akwau ni Yehova. Yesu wafundisha anch: “Muntu mwawonsu ukumwovila mwanamakwend mu ritiy ujim akez kamutwal kudirumburish, muntu mwawonsu ukumuswingisha mwanamakwend mu ritiy anch ey udi muntu wa mwamu akez kamutwal ku dirumburish dijim chad muntu mwawonsu ukumupila mwanamakwend mu ritiy anch ey udi chisup! Chifanyidin kumudjibul mu dijiy dia kasu.”​—Mat. 5:22.

8. Ov, chisu ik tufanyidina kumekesh yovil yetu, ni mutapu ik?

⁸ Pakwez, kudi yom yimwing yitukutwisha kulond anch yiwapidil kwisambin. Anch chom chalonday ap chasalay mukadivar cha kwovish kuyip nakash ni utwishinap kumulikishin, kangal walikidil ujim uvulijana mu muchim wey. (Jinsw. 19:11) Anch muntu umwing wa kwovish ujim, sal usu wa kutakel yovil yey ni londul jinzau jifanyidina chakwel upwisha mulong. Paul wafunda anch: “Kangal wajingany nich ujim dichuku diakabuj.” Anch mulong wadandamen ku kwovish kuyip, ulejana nawamp pa chisu chiwanyidina. (Tang Efes 4:26, 27, 31, 32.) Isambina ni mukadivar ney piur pa mulong winou mu uyakin pakwez nich ranaken, ni muchim wa kuwapish urund.​—In Lev. 19:17; Mat. 18:15.

9. Ov, mulong wak tufanyidin kutakel yovil yetu kurutu kwa kwisamb ni antu akwau?

⁹ Chakin kamu, ufanyidin kukimb chisu chiwanyidina. Kudi “chisu chimwing cha kuninet ni chisu chikwau cha kulond.” (Mul. 3:1, 7) Chikwau kand, “muchim wa mwin kutentam ukat kutong nawamp mutapu wa kwakul.” (Jinsw. 15:28) Chifanyidin kusutish chisu mulong wa kwisamb kand pa milong yiney. Kusal mwamu pachovilay kuyip kukutwish kuyipish yom; pakwez chidi cha manangu kuchingel chisu chilemp chisuta.

Yisal ya Ranaken Yikasikeshining Urund Uwamp

10. Ov, mutapu ik ukutwisha yisal ya ranaken kukasikesh urund?

¹⁰ Mazu ma ranaken ni kwambamb kuwamp kukwashining kutenchik ni kulam urund. Chikwau kand, anch twasal usu wetu wawonsu chakwel tukasikesha urund wetu ni antu akwau chikutwish kuwapish mambamb metu nimawiy. Kushakam ni antu akwau mu uyakin, yisal yiwamp​—kukimb yisu ya kuyikwash, kuyinkish chipan chidiokila ku muchim, kwakan nawamp—​yikutwish kusal anch mambamb mikala mawamp. Yikutwish kwikal mudi wamutekin kal muntu winou “makal ma kasu” pa mutu wend ni yikutwish kulet mikadil yiwamp, ni kuswapej kwisambin patok.​—Rom 12:20, 21.

11. Ov, mutapu ik wapwishay Yakob milong ni Esau, ni kwading yibudikin ik?

¹¹ Kashankur Yakob wijika yom yiney. Yayend mpamb, Esau, wova ujim nakash chawiy lel Yakob wachina mulong wova wom anch Esau ukez kamujip. Pikwasuta mivu yivud Yakob wachirika. Esau weza ni antu 400 chakwel amusankana. Yakob wamulembila Yehova chakwel amukwasha. Chawiy lel, ndiy wayituma antu kudi Esau nich chipan chijim cha anam. Chipan chinech chawanyisha rutong rend. Pasankanijanau, muchim wa Esau witudisha, ni waya mau wamubwikat Yakob.—Dis. 27:41-44; 32:6, 11, 13-15; 33:4, 10.

Yikasikesha Antu Akwau ni Mazu ma Ranaken

12. Ov, mulong wak tufanyidin kusadil mazu ma ranaken pitwisambina ni akadivar netu?

¹² In Kristu akat kumusadil Nzamb, kakatap kuyisadil antu akwau. Pakwez, tusotining kuyisangaresh antu akwau. Mazu metu ma ranaken makutwish kupipesh yakamish yikwetau akadivar ni anambaz netu. Pakwez, kuyiswingish nakash, kukutwish kupandakesh yakamish yau ni kuyisal amwing atonga anch ashadishin kal dilau dia Yehova. Pakwez, isambany nich kashinsh pamwing ni akwen piur pa yom yikasikesha, “pakwez londany nching kusu mazu mawamp makutwisha kukasikesh antu kukul mu ritiy mudi muchifanyidina ni kuyiyukish antu awonsu akumatesha.”​—Efes 4:29.

13. Ov, yik yifanyidinau kulam mu manangu (a) pakatau kupan chiyul? (b) pafundinay mikand?

¹³ Pakampwil, amakurump afanyidin ‘kwitudish’ ni kushakam ni chisak cha amikoku mu rukat. (1 Tes. 2:7, 8) Pakatau amakurump kupan yiyul, rutong rau rifanyidin kwikal ra kuyipan nich “muchim witudishina,” ap anch isambin ni antu “akata kukangeshijan.” (2 Tim. 2:24, 25) Amakurump afanyidin kand kwikal nich mazu ma ranaken pafundinau mikand pichiswiridina pachifundidinau chisak chikwau cha amakurump ap biro wa mutiy. Afanyidin kwikal awamp ni in nkeu, kwambatan ni yitutangina mu Mateu 7:12.

Sadil Mazu ma Ranaken mu Dijuku

14. Ov, Paul wayinkisha amakundj chiyul ik, ni mulong wak?

¹⁴ Chiswapeling kulik kwitiy usu wa mazu metu, wa mutapu tutadila, ni yitusadina pakad kulond piur pa antu akwau. Chilakej, amakundj amwing kakutwishap kwijik mutapu ukweta mazu mau usu ukash piur pa amband. Nambaz umwing walonda anch, “Chingakamishining nakash pakatay nfumwam kwinswejin nich dizu dikash ni ujim.” Mazu makash makutwish kwikal nich usu ukash piur pa mband kupandakanamu pa ikundj ni makutwish kushal mu muchim wend chisu chilemp. (Luka 2:19) Chinench pakampwil chidi chakin piur pa mazu madiokila kudi muntu ukatinau kudi mband ni usotina kumulimish. Paul wayiyula amakundj anch: “Muntu ni muntu amukata mukajend wakad kumuzazimwokin.”​—Kol. 3:19.

15. Rumburil mulong wak ikundj ufanyidin kumulam nawamp mukajend.

¹⁵ Pa chinech, mukadivar umwing mbay wa uruw walejana mulong wak ikundj ufanyidin kushakam nawamp ni mukajend, mulong “anipandiken en kuziy.” Ndiy walonda anch: “Anch ukwatin nung yiwamp nakash ni ya usey, ufanyidinap kuyikwat nich usu nakash, yikutwish yabarik. Ap anch ayirijek, yilim ya kubarik kwinoku yikudandamen kumekan patok. Anch ikundj wasadil mazu makash pantaliken ni mukajend, ndiy ukutwish kumwovish kuyip. Mazu minam makutwish kuyipish urund wau.”​—Tang 1 Pita 3:7.

16. Ov, mutapu ik ukutwishay mband kutung dijuku diend?

¹⁶ Amakundj niyawiy akutwish kuyikasikesh ap kuyiziyish kusutil ku mazu ma antu akwau, kuwejinaku ni yilondinau akajau. “Mband wa manangu,” ukutwishau ‘kuchingejin’ chakin kamu kudi nfumwend ukat kubangin yovil ya nfumwend mudi musotinay kubangin yovil yend. (Jinsw. 19:14; 31:11) Chikwau kand, mband ukutwish kwikal ni chibachikin chikash mu dijuku, mu uwamp ap mu uyimp. “Mband mwin manangu ukat kutung chikumbu chend pakwez mband chisup ukat kuchiumbwol nich makas mend amwinend.”​—Jinsw. 14:1.

17. (a) Ov, mutapu ik ufanyidinau ansand kwambamb nau anvaj au? (b) Ov, mutapu ik ufanyidinau amakurump kwambamb ni ansand, ni mulong wak?

¹⁷ Anvaj ni an afanyindin niyawiy kusadil mazu ma ranaken pambambinau umwing ni mukwau. (Mat. 15:4) Pitwisambina ni ansand, kudimuk kukez kutukwash twipuka ‘kuyiswidiosh’ ap ‘kuyovish ujim.’ (Kol. 3:21; Efes 6:4.) Ap anch chifanyidin kuyikand an, anvaj ni amakurump afanyidin kuyilej ni kalimish. Mwamu, amakurump akez kuyikwash ansand kuwapish mikadil yau ni kulam urund wau ni Nzamb. Chifanyidinap kumekesh kudi an anch twaziy kal kuyikand, mulong niyawiy akutwish kuziy. Ansand akutwish pamwing ap kuvuramen yiyul yawonsu yitambwilau, pakwez akez kavurik mutapu ukatau antu akwau kwisamb nau.

Lond Yom Yiwamp Yidiokila mu Muchim

18. Ov, mutapu ik tukutwisha kudiosh manangu ni yovil yiyimp mu muchim wetu?

¹⁸ Kupwish ujim kurumburikinap kwikal ni chifu cha muntu witudishina. Rutong retu rifanyidinap kwimen pa kulam mu muchim wetu yovil yikash. Kupakish kuninet pitukweta ujim mu muchim kukutwish kusambish kutwovish kuyip chisu chawonsu. Chidi mudi kushat pa pedal wa kwimik nich motak ni kushat pa pedal wa kuwejinaku mau pa chisu chawiy chimwing. Chinech chikutwish kwendish nayimp motak ni kuuyipish. Chawiy lel, kangal walam ujim mu muchim ni kuudiosh pa chisu chikwau. Mulembila Yehova chakwel akukwasha kudiosh yovil yiyimp mu muchim wey. El spiritu wa Yehova akarumuna manangu mey ni muchim wey chakwel wambatana ni rusot rend.​—Tang Rom 12:2; Efes 4:23, 24.

19. Ov, yisal ik yikutwisha kutukwash chakwel twipuka kupwitijan kwa ujim?

¹⁹ Sal yom yikutwisha kukukwash kutakel yovil yey. Anch waman anch udi mu mwikadil ukash ni wasambish kwov ujim, ufanyidin kudiokal mu mwikadil winiwa, ni kutudish yovil yey. (Jinsw. 17:14) Anch muntu wambambina nend wasambish kujiman, sal usu wa kulond nich ranaken. Vurik anch: “Kwakul kwa kalimish kukat kudiosh ujim, pakwez dizu dikash dikat kuswejish ujim.” (Jinsw. 15:1) Chiyul chovishina kuyip ap chiletinau nich ujim chikez kuyipish yom ap anch achiletin nich dizu dia kalimish. (Jinsw. 26:21) Chawiy lel, anch mwikadil umwing wapak kwilam kwey, ikal mwin ‘kushimpish muchim pakulond, kushimpish kand muchim wakad kujiman swa.’ Lembil chakwel spiritu wa Yehova akukwasha kulond yom yiwamp, ni kulik kulond yom yiyimp.—Jak. 1:19.

Dilikishin Didiokila ku Muchim

20, 21. Ov, chom ik chikutwisha kutukwash chakwel tuyilikishina antu akwau, ni mulong wak tufanyidin kusal mwamu?

²⁰ Cha ushon, kwikil muntu pakach petu uyikedila rudim rend mu mutapu uwanyidina. (Jak. 3:2) Chikalap nchik usu ukezau kusal, yid ya dijuku ni akadivar netu akatish ni anambaz akutwish pamwingap kutwel yom yakad manangu yikutwisha kutwovish ujim. Pandond pa kuchirish swaa uyimp, shinshikin nich kushimpish muchim mulong wak alonda ni asala mwamu. (Tang Mulej 7:8, 9.) Ov, adinga mu yipwichik, mu yakamish, kiyovap nawamp, ap adinga arishina nich mulong umekena ap wakad kumekan?

²¹ Yom yiney yikutwishap kulikishin kubarok. Pakwez, kujingunin kwetu kwa yom yiney kukutwish kutukwash kwijik mulong wak yisu yimwing antu alondining ni asadining yom yakad kufanyin ni kukutwish kutubachik kulikishin. Etu awonsu tulondining ni tusadining yom yikata kuyovish antu akwau ujim, ni tukwet ruchingej anch akez katulikishin nich ranaken. (Mul. 7:21, 22) Yesu walonda anch pakwel anch Nzamb atulikishina, tufanyidin bil etu kuyilikishin antu akwau. (Mat. 6:14, 15; 18:21, 22, 35) Pakwez, tufanyidin kuswapej mu kulikishin, chawiy lel tukez kulam rukat​—“mwoj [utukasina] mu umwing uwanyidina”—​mu dijuku dietu ni mu chikumangen.​—Kol. 3:14.

22. Ov, mulong wak chidi cha usey kusal usu wa kusadil mazu ma ranaken?

²² Milong yitukangeshina kwikal nich musangar ni uumwing yikuvulijan mu ditenchik dined dia ujim dishejidina kwinsudiel kwad. Kusadil kuwamp kwa yiyul yidia mu Dizu dia Nzamb kukez kutukwash chakwel tusadila nawamp rudim retu, ni kulik kurisadil nayimp. Tukez kasanger urund wa chisambu mu chikumangen ni mu dijuku, ni chilakej chetu chikez kupan uman uwamp nakash kudi antu akwau piur pa Yehova “Nzamb [wetu] muwamp.”​—1 Tim. 1:11.

Ov, Ukutwish Kurumburil?

• Ov, mulong wak chidi cha usey kukimb chisu chiwanyidina mulong wa kwisambin piur pa milong?

• Ov, mulong wak yid ya dijuku yifanyidin kudandamen kwisamb umwing ni mukwau “nich ranaken”?

• Ov, mutapu ik tukutwisha kwipuk kulond yom yovishena ujim?

• Ov, chom ik chikutwisha kutukwash kulikishin?