MUTU WA MULONG WA KWILEJ WA 37
Muziyila Yehova Nich Musangar—Mulong wak ni Mutapu ik?
“Chifanyidin etu kupandakeshamu kumuziyil Tatukwetu.”—HEB. 12:9.
MUMINY 9 Yehova Udi Mwant Wetu!
YIDIA MU MUTU WA MULONG WINOUa
1. Mulong wak tufanyidin kumuziyil Yehova?
TUFANYIDIN kumuziyilb Yehova mulong udi Sakatang wetu. Mulong wa diyingishin dined, ukwet mbil ya kutulej yom tufanyidina kusal. (Kuj. 4:11) Pakwez, tukwet kand diyingishin dikwau disadina anch tumuziyil Nzamb—mutapu wend wa kutakel udi uwamp nakash. Kudiokal pakur, antakel avud akweting ka usu kanang ni ka ulabu kampand piur pa antu akwau. Anch twayilakej antakel inay ni Yehova, tumen anch Yehova udi Ntakel ukweta manangu nakash, rukat ripandikena, ranaken, ni riy kusutamu antakel awonsu.—Kub. 34:6; Rom 16:27; 1 Yoh. 4:8.
2. Kukwatijan ni Hebereu 12:9-11, mayingishin ik tukweta ma kumuziyil Yehova?
2 Yehova ukatin anch tumuziyil, chakusambish, kadiap mulong tumwovil wom pakwez mulong tumukatil ni tumumen mudi Tatukwetu wa rukat. Mu mukand wend kudi in Hebereu, Paul urumburil anch tufanyidin “kupandakeshamu kumuziyil Tatukwetu” mulong ukat kutufumb “mulong wa kutukwash.”—Tang Hebereu 12:9-11.
3. (a) Mutapu ik tumekeshina anch tumuziyidil Yehova? (b) Yipul ik tukwakula?
3 Tukat kumuziyil Yehova kusutil kusal usu wa kumuziyil mu yom yin yawonsu ni kusutil kurishikish maku mayimp ma kukat kwitekin mbil piur pa yom yiwamp ni yiyimp. (Jnsw. 3:5) Chikat kutuswapel kumuziyil Yehova anch twilej yom yivud piur pa mikadil yend yipandikena kuwap. Mulong wak? Mulong mikadil yiney yimekedining mu yom yawonsu yisadiningay. (Kus. 145:9) Chitudandamedina kwilej piur pa Yehova, tukushiken ku kumukat nakash. Ni anch twamukat Yehova, tukwikalap ni kuswir kwa list wa yom tufanyidina kusal ni yom yitwakad kufanyin kusal. Tukat kusal usu chakwel yitongijok ni yovil yetu yikwatijan ni yom yidia yiwamp ni kwipuk yidia yiyimp. (Kus. 97:10) Pakwez yisu yimwing chikutwish kutukasiken kumuziyil Yehova. Mulong wak? Ni yom ik yikutwishau amakurump a chikumangen, atatuku, ni amaku kwilejin ku chilakej cha Guverner Nehemiy; Mwant David; ni Mariy, makwend a Yesu? Mutu wa mulong winou ukwakul ku yipul yiney.
MULONG WAK CHIKUTWISH KWIKAL CHIKASH KUMUZIYIL YEHOVA
4-5. Kukwatijan ni Rom 7:21-23, mulong wak chikutwish kwikal chikash kumuziyil Yehova?
4 Diyingishin dimwing dikutwisha kusal anch chitukasiken kumuziyil Yehova didi mulong twaswana chitil ni tudi antu akad kuwanyin. Chawiy chikata kusal anch tulik kukat kumuziyil Yehova chisu chawonsu. Kupwa kwa Adam ni Ev kumubwambwil Nzamb ni kudia dibuj diayijidikau, itekina ayinau mbil piur yom yiwamp ni yiyimp. (Dis. 3:22) Nlel, antu avud kalimishinap mbil ja Yehova ni akat kwitekin ayinau mbil piur pa yom yiwamp ni yiyimp.
5 Chikutwish kuyikasiken ap antu amwija Yehova ni amukatina kumuziyil chisu chawonsu. Kambuy Paul warisha ni chikokujol mudi chinech. (Tang Rom 7:21-23.) Mudi Paul, tukatining kusal yom yitentamina ku mes ma Yehova. Pakwez tufanyidin kurishikish chisu chawonsu maku mayimp ma kusal yom yiyimp.
6-7. Disu diyingishin dia kaad dikutwisha kusal anch chitukasiken kumuziyil Yehova? Let chilakej.
6 Diyingishin dikwau dikutwisha kusal anch chikasikan kumuziyil Yehova didi anch yishankur ya ndond twapamina yikweting yibachikin padi etu. Yishankur yimwing ya antu yikwatijadinap ni rusot ra Yehova, chawiy tufanyidin kudandamen kusal usu wa kulik kutong mudi antu inay. El tushinshikinany chilakej chimwing.
7 Mu jindond jimwing antu akat kuyibachik ansand kwipan mu kukimb nfalang jivud. Nambaz utazukinau anch Maryc warisha ni chikokujol chinech. Kurutu kwa kwilej piur pa Yehova, waya ku shikol yijikena nakash ya mwi ngand yend. Dijuku dia Mary diamubachika kukimb mudimu wa nfalang jivud ni wafanyina kusal anch antu akwau amulimish nakash. Niyend wasangera chitongijok chinech. Pakwez, kupwa kwa kwilej piur pa Yehova ni kumukat waswimpa chitongijok chend. Ap mwamu ulondin anch: “Yisu yimwing nikat kumanang midimu yikutwisha kwinletin nfalang jivud, pakwez nij anch yikutwish kwinkangesh kumusadin Yehova mudi nimusadidina katat. Kukwatijan ni mutapu wanlilau, chikat kwinkasiken nakash kulond anch bwat. Nikat kumwilembilang Yehova chakwel ankwash kujijamen choziu cha kwitiy mudimu ukutwisha kwinkangesh kusal yom yivud mu mudimu wa Yehova.”—Mat. 6:24.
8. Yom ik tukushinshikina katat?
8 Tukat kutaninamu kusutin kumuziyil Yehova. Pakwez antu akweta umutakel kampand, mudi amakurump a yikumangen, atatuku, ni amaku, akwet diyingishin dikwau dia kulondul umutakel wa Yehova—mulong akwet chisend cha kuyikwash antu akwau. El tushinshikinany yilakej yimwing ya mu Bibil yitufundishina mutapu wa kusadin umutakel utwinkishinau kudi Yehova mu mutapu wa kumusangaresh ndiy.
YOM YIKUTWISHAU AMAKURUMP KWILEJIN KU CHILAKEJ CHA NEHEMIY
Amakurump akwashin midimu ku Chot cha Want mudi mwakwashay Nehemiy kutunguril mbumbu ja Yerusalem (Tal paragraf wa 9-11)d
9. Yikokujol ik yarishay nich Nehemiy?
9 Yehova wayinkishin kal amakurump a yikumangen chisend cha usey nakash cha kulam antu end. (1 Pita 5:2) Amakurump akutwish kwilej yom yivud kusutil kushinshikin mutapu Nehemiy wayisadinay antu a Yehova. Mulong wading Guverner wa Yuda, Nehemiy wading ni ulabu kampand. (Neh. 1:11; 2:7, 8; 5:14) Tongin pa yikokujol yimwing yarishay nich Nehemiy. Wajingunina anch antu ading ijondishin tempel ni kadingap kayiwanyishidina in Levi maswir mau ma ku mujimbu mudi mwading mulondina chijil. In Yuda kadingap kalimishina chijil cha Nzamb piur pa Sabat, ni amakundj amwing ata amband a michid yakad kumwifukwilang Yehova. Guverner Nehemiy wading ufanyidin kupwish chikokujol chinech chikash.—Neh. 13:4-30.
10. Mutapu ik wasalay Nehemiy piur pa yikokujol yarishay nich?
10 Nehemiy kasadinap nayimp ulabu wend kusutil kuyishindil antu a Nzamb kulondul mbil jend. Pakwez, wakimba umutakel wa Yehova kusutil malembil ni wayifundisha antu yijil ya Yehova. (Neh. 1:4-10; 13:1-3) Nich kwikepish Nehemiy wasala mudimu pamwing nau akadivar nend, ni wayikwasha kand kutunguril mbumbu ja Yerusalem.—Neh. 4:15.
11. Kukwatijan ni 1 Tesalonik 2:7, 8, mutapu ik ufanyidinau amakurump kuyisadin antu adia mu chikumangen?
11 Pamwing ap amakurump kakutwishap kurish ni milong mudi yarishay nich Nehemiy pakwez akutwish kumwimburij mu mitapu yivud. Chilakej, akat kusal mudimu nakash mulong wa kuyikwash akadivar ni anambaz nau. Ni kakatap kwiyov anch adi a usey kuyisutamu antu akwau mulong wa umutakel ukwetau. Pakwez, akat kuyisadin antu adia mu chikumangen nich rukat. (Tang 1 Tesalonik 2:7, 8.) Rukat rau rikurikina ni kwikepish kwau yikat kumekanang mu mutapu wau wa kwisamb ni antu akwau. Andrew, mukurump ukweta ukaliweny ulondin anch: “Najingunina anch ang akadivar nau anambaz aman anch mukurump udi muntu muwamp ni uswapela kusejin, chikat kuyipukun nakash ku muchim. Mikadil yiney yikat kuyibachik antu mu chikumangen kusal mu uumwing nau amakurump.” Tony mukadivar mukwau wasadina kal mudi mukurump mu mivu yivud ulondin anch: “Nikat kusal usu wa kusadil chiyul chidia mu Filip 2:3 ni kusal chisu chawonsu usu wa kuyiman antu akwau mudi adi a usey kwinsutamu am. Chinech chikat kwinkwash kulik kuyishindin antu akwau chakwel anziyil.”
12. Mulong wak chidi cha usey kudi amakurump kwikal ikepishina?
12 Amakurump afanyidin kwimburij chilakej cha kwikepish cha Yehova. Ap anch Yehova udi mukaleng wa mangand mawonsu, ukat “kutal mes pa mangand” mulong wa kumudiosh “kazwendj mu rufunfut.” (Kus. 18:35; 113:6, 7) Pakwez Yehova uyikisin nakash antu in kwibaz ni in kwitutul.—Jnsw. 16:5.
13. Mulong wak mukurump umwing wading ukwet kuswir kwa ‘kulam rudim rend’?
13 Mukurump umuziyidila Yehova ufanyidin ‘kulam rudim rend.’ Chikwau kand, anch kasadinap mwamu ukutwish kumulond nayimp muntu walikang kumulimish. (Jak. 1:26; Gal. 5:14, 15) Andrew, twajimbula kal kwiur oku ulondin anch: “Yisu yimwing novang ja kumulond nayimp mukadivar ap nambaz unamanang anch kanlimishinap mudi mukurump wa chikumangen. Pakwez natongijokinang pa yilakej ya mu Bibil ya amakundj ading ashinshamena, ni kusal mwamu kwankwasha kwilej usey wa kwikal muntu wikepishina ni witudishina.” Amakurump akat kumekesh anch amuziyidil Yehova kusutil kwambamb nau akadivar ni anambaz nau ap amakurump akwau mu chikumangen mu mutapu uwamp ni wa rukat.—Kol. 4:6.
YOM YIKUTWISHAU ATATUKU KWILEJIN KU CHILAKEJ CHA MWANT DAVID
14. Chisend ik chapanay Yehova kud atatuku, ni ukatin anch asadina mu mutapu ik umutakel wau?
14 Yehova wamwinkisha tatuku chisend cha kwikal ntakel wa dijuku, ni Nzamb umuchingejidin anch ayifumb anend ni kuyipup. (1 Kor. 11:3; Efes 6:4) Pakwez chinech chirumburikinap anch tatuku ufanyidin kusadin umutakel winou mu mutapu ukatinay. Yehova ndiy Sakatang wa dijuku, chawiy atatuku akez kupan kuchind kudi Yehova piur pa mutapu ulaminau majuku mau. (Efes 3:14, 15) Atatuku akat kumekesh anch amuziyidil Yehova anch asadin umutakel wau mu mutapu umusangareshina Yehova. Akutwish kwilej yom yivud kusutil kwilej mwom wa Mwant David.
Malembil ma tatuku mwin Kristu mafanyidin kumekesh ku dijuku diend anch wikepishin (Tal paragraf wa 15-16)e
15. Mulong wak Mwant David udi chilakej chiwamp chifanyidinau atatuku kushinshikin?
15 Yehova wamutonda David mudi ntakel kadiap kusu mulong wa dijuku diend pakwez kand mulong wa muchid wawonsu wa Isarel. Mulong wading mwant, David wading ni ulabu nakash. Yisu yimwing wasadina nayimp ulabu wend ni warumboka nakash. (2 Sam. 11:14, 15) Pakwez wamekesha anch umuziyidin Yehova kusutil kwitiy dipup. Chisu chalembilay, wamuleja Yehova mutapu wading wiyovilay. Ni wasala usu wa kuziyil ku chiyul cha Yehova. (Kus. 51:1-4) Chikwau kand, wikepisha ni witiya yiyul kadiap kwau ching ya amakundj pakwez kand ni yading yidiokila kudi amband. (1 Sam. 19:11, 12; 25:32, 33) David wilejina ku kurumbok kwend ni wateka mudimu wa Yehova pa ndond ya kusambish.
16. Malejan ik makutwishau atatuku kwilejin ku chilakej cha David?
16 Tushinshikinany malejan mamwing makutwishau atatuku kwilejin ku chilakej cha Mwant David: Kangal wasadin nayimp umutakel wakwinkishau kudi Yehova. Itiyin kurumbok kwey, ni itiy yiyul yimedina pa Bibil ya antu akwau. Anch wasal mwamu, dijuku diey dikukulimish mulong wa kwikepish kwey. Piulembila pamwing ni dijuku diey, mwazurila Yehova muchim wey—el antu a mu dijuku diey atesha mutapu umuchingejidina Yehova. Cha usey nakash, sal mudimu wa Yehova wikal chom cha usey nakash mu mwom wey. (Kuv. 6:6-9) Chilakej chey chiwamp chidi chipan cha usey nakash ukutwisha kupan ku dijuku diey.
YOM YIKUTWISHAU AMAKU KWILEJIN KU CHILAKEJ CHA MARIY
17. Chisend ik chayinkishinau kal amaku kudi Yehova?
17 Yehova wayinkishin kal amaku chisend cha usey nakash mu dijuku, ni wayinkishin kal umutakel kampand padiau anau. (Jnsw. 6:20) Chakin kamu, yom yisadinay ni yilondinay maku yikutwish kwikal ni chibachikin padi anend mu mwom wau. (Jnsw. 22:6) Tushinshikinany yom yikutwishau amaku kwilejin ku chilakej cha Mariy, makwend a Yesu.
18-19. Yom ik yikutwishau amaku kwilejin ku chilakej cha Mariy?
18 Mariy wading wij nawamp Mifund. Wading umulimishin nakash Yehova ni wakasikesha urund wa pakampwil ni Yehova. Wading uziyidin kwa kwikatin ku umutakel wa Yehova ap anch kusal mwamu kwafanyina kuswimp yom yivud mu mwom wend.—Luka 1:35-38, 46-55.
Anch maku waziyang kal ap anch wajimanang kal ufanyidin kusal usu nakash chakwel amekesh rukat kudi antu a mu dijuku diend (Tal paragraf wa 19)f
19 En amaku, ukutwishany kwimburij chilakej cha Mariy mu mitapu kushalijan. Mutapu ik? Chakusambish, kusutil kukasikesh urund wen wa piswimp ni Yehova mu kwilej Bibil ayinen ni kulembil. Cha kaad, kusutil kuswimp yom yimwing mu mashakamin men mulong wa kumusangaresh Yehova. Chilakej, pamwing ap akulila kudi anvaj ajimanang nakash ni ayilondolang nayimp nakash anau. Chawiy ukutwish pamwing ap kutong anch kusal mwamu wawiy mutapu uwamp wa kuyilil aney. Ap kupwa kwa kwilej mbil ja Yehova, chikutwish kukukasiken kwikal witudishila ni ushimpishina muchim pantaliken nau aney, pakampwil anch akubwambwil chisu waziyang kal. (Efes 4:31) Pa yisu mudi yiney, ufanyidin kumuchingejin Yehova kusutil malembil. Maku utazukinau anch Lydia ulondin anch: “Yisu yimwing nalembilang nakash chakwel kangal nalond nich ujim anch mwanam wambwambwil. Pinamukandang mwan, nimikang kulond ni namulembilang Yehova mu muchim chakwel ankwasha. Malembil mankwashang kwitudish.”—Kus. 37:5.
20. Chikokujol ik chirishiningau nich amaku amwing, ni mutapu ik ukutwishau kuchipandakan?
20 Amaku amwing akutwish kurish ni chikokujol chikwau—chikutwish kuyikasiken kumekesh anch ayikatin anau. (Tit. 2:3, 4) Amaku amwing ayilila kudi anvaj amwing akad kuyimekeshinang anau rukat. Anch wawiy mutapu wakulilau, ufanyidinap niyey kwimburij kurumbuk kwa anvaj ey. Maku umuziyidina Yehova ufanyidin kwilej mutapu wa kuyimekeshin anend rukat. Chikutwish kumukasiken kuswimp yitongijok yend, yovil yend, ni mutapu wa kusal yom. Pakwez, chiswapel kuswimp ni anch wasal mwamu ndiy ni dijuku diend akwikal ni musangar.
DANDAMEN KUMUZIYIL YEHOVA
21-22. Kukwatijan ni Isay 65:13, 14, yiyukish ik tukutwisha kutambul anch twamuziyil Yehova?
21 Mwant David wading wij anch kumuziyil Yehova chidi chom chiwamp nakash. Wafunda anch: “Yijidik ya [Yehova] yitentamin, yikat kusangaresh muchim. Malejan ma [Yehova] madi zwang, makat kutaurish mes. Yom yiney yawonsu yikat kumubabesh kashalapol wey. Muntu mwawonsu ukata kuyilam ukuman kuwap kujim.” (Kus. 19:9, 12) Nlel unou, tukutwish kuman kushalijan kudia pakach pa antu amuziyidila Yehova ni adiburila chiyul chend cha rukat. Antu amuziyidila Yehova “akez kawang nich musangar [mulong wa mwikadil uwamp wa muchim].”—Tang Isay 65:13, 14.
22 Anch amakurump, atatuku, ni amaku asal usu wa kumuziyil Yehova nich musangar, mashakamin mau makuwap, majuku mau makwikal ni musangar, ni chikumangen chawonsu chikwikal mu uumwing nakash. Cha usey nakash, akusangaresh muchim wa Yehova. (Jnsw. 27:11) Winou udi musangar ujim nakash tukutwisha kwikal nich!
MUMINY 123 Tuziyilany Nich Kushinshaman Mbil ya Uteokras
a Mutu wa mulong winou ukwisambin mulong wak tufanyidin kumuziyil Yehova. Ukwisambin kand yom yikutwishau amakurump a chikumangen, atatuku, ni amaku—awonsu akweta umutakel—kwilejin ku chilakej cha Guverner Nehemiy; Mwant David; ni Mariy, makwend a Yesu.
b KURUMBURIL KWA MAZU KANANG: Antu abachikinau kumuziyil muntu kanang akweting chitongijok chiyimp piur pa dizu kuziyil. Pakwez, antu a Nzamb akat kutond ayinau kumuziyil ndiy, chawiy kakwetingap chitongijok chiyimp piur pa kumuziyil.
c Mu mutu wa mulong winou majin mamwing amaswimpin.
d KURUMBURIL KWA YIPICH: Mukurump wa chikumangen ukat kutenchik yom ku Chot cha Want pamwing ni mwanend ikundj, mudi mwakwashay Nehemiy kutungiril mbumbu ja Yerusalem.
e KURUMBURIL KWA YIPICH: Tatuku umulembil Yehova pamwing ni dijuku diend.
f KURUMBURIL KWA YIPICH: Mwan usutishin chisu mu masengan ma video ni kasalangap devwar wend wa ku shikol. Makwend waziyang kal mulong wa mudimu wasalangay, umupupin mu mutapu uwamp pakad kusadin mazu mayimp.