Itiyijany Winyikel Wa Yehova
“Mulong rukat ra Nzamb rawiy er, chakwel tukulam yijidik yend; ni yijidik yend kiyikutukasikenip.”—1 YOH. 5:3.
1, 2. (a) Ov, mulong wak antu avud akisin chitongijok cha kuziyil ku winyikel ilel? (b) Ov, antu alikina kuziyil akwet chakin kamu want ipau? Rumburil.
“WINYIKEL” antu avud ilel kasotiningap kutesh dizu dined. Antu avud akisining kuziyil ku rusot ra muntu windjing. Antu alikina kuziyil ku winyikel wa antu akwau akweting mikadil yiney, “kwikil muntu ukwinleja chinikusala.” Pakwez, ov, chakin kamu antu akwet want ipau? Chakapuk chaya mwang! Antu avud a pakach pau alondwil yijil yikwau yivud yitenchikinau “nich yaku ya antu a mangand minam.” (Rome 12:2, MM) Kulep ni kwikal nich want ipau, adi “mu uswik wa yom yikuvunda,” anch twasadil mazu ma kambuy mwin Kristu Pita. (2 Pita 2:19) Akat kwend “kulondul mudi mukat kusalau in mangand minam, ni mudi mukat kusalay mwant wa usu wa chipepil,” Satan Djabul.—Efes 2:2.
2 Mwin kufund umwing walonda nich kwibaz anch: “Niyinkishinap anvaj am ap mwin kupesh ap ntakel wa relijon ap nsil ap Bibil mbil ya kwikwatin mupak piur pa yinisotila kusal anch yawiy yiwamp.” Chakin kamu, kudi antu amwing akata kusadilang nayimp winyikel wau ni kitufanyidinap kuyiziyil. Ov, kulik wintakel win wawonsu wawiy mutapu uwamp? Kushinshikin mu wiswimp jinsangu jidia mu jurnal kukutwish kwatwinkish chakul. Chidi cha ushon anch pa chisu chimwing chiswiridiningau kamu antu wintakel, antu avud alikin kamu kuwitiyij.
Mutapu Tumeninga Winyikel
3. Ov, mutapu ik wamekeshau in Kristu a mu mivu chitot ya kusambish anch kadingap ni kuziyil nich wimputames ku winyikel wa muntu?
3 Mudi in Kristu, tukwet ngikadil yishalijadina nich ya mangand. Chirumburikinap anch tukat kusal yawonsu yitwedilau kusal mu wimputames. Pakwez, pa yisu yimwing tufanyidin kulik kuziyil ku rusot ra antu amwing ap anch akwet mwaz wa winyikel. Mwamu chadinga kand ku mutambu wa in Kristu a mu mivu chitot ya kusambish. Chilakej, payilikishau atwimbuy kulejan, awiy kaziyilap ku mbil ya mwin kupesh mujim ni antu akwau adinga anyikel adinga mu Dirumburish Dijim. Kalikap mwikadil uwamp mulong wa kuziyil ku winyikel wa muntu.—Tang Midimu 5:27-29.
4. Yilakej ik yidia mu Mifund ya Hebereu yilejena anch antu avud a Nzamb asala chinyim nich yadinga yisadilau antu avud?
4 Atushalapol avud a Nzamb a mu chirung cha kurutu kwa Ukristu mwamu mwasalau. Chilakej, Moses walika “kumutazuk anch, mwan [wa changadim, MM] wa Farao, pakulay; ndiy watonda kuman mar nau antu a Nzamb,” ap anch kusal mwamu kwamuletina “[ujim wa mwant, MM].” (Heb. 11:24, 25, 27) Yosef wajijamena kumusarumun kud mband wa Potifar, muntu wadinga nich usu wa kwifundakesh ni kumusal uyimp. (Dis. 39:7-9) Daniel “watonga kulik kwijondish nich yakudia ni maar ma nviny yikat kudiay mwant,” ap anch mwikadil pa mulong winou wadingap uswapela kuwitiyij kudiay mukurump wa rupang ra Babilon. (Dan. 1:8-14) Yilakej yiney yilejen anch, kulondul rusangu ra pasak, antu a Nzamb adinga nich mwikadil ukash piur pa chitentamina, kwikalap nchik yibudikin ik. Kayiziyilap kwau antu mulong wa kwitapil dilau diau. Niyetu kitufanyidinap kusal mwamu.
5. Ov, mutapu ik ushalijadina kuman kwetu winyikel nich kuman kwa mangand?
5 Kutakaman kwetu kufanyidinap kukufanikesh nich kuchinchik kwa muchim; ni kitudiap mudi antu amwing akata kubwambwil kwau mulong wa chipolitik. Pakwez, tukwatin mupak wa kwitiyij winyikel wa Yehova kupandakanamu wa muntu. Piyikata yijil ya muntu kupwitijan nich ya Nzamb, mupak piur pa chitufanyidina kusal ukasikenap. Mudi mwasalau atwimbuy mu mivu chitot ya kusambish, tukat kumuziyil Nzamb mudi nyikel kadiap antu.
6. Ov, mulong wak chiwapining chisu chawonsu kuziyil ku yijil ya Yehova?
6 Chom ik chatukwasha twitiyija winyikel wa Nzamb? Tulondwiling yilondilau mu Jinswir 3:5, 6 anch: “Mukungamena [Yehova] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.” Twitiyijin anch chom chin chawonsu chitwitinay Nzamb chidi mulong wa kuwap kwetu. (Tang Kuvurik Yijil 10:12, 13.) Chakin kamu, Yehova wijingunisha amwinend kudiau in Isarel mudi “nikata kukukwashany, ni kukulejany njil yiufanyidinanya kuya.” Kupwa wawejinaku kand anch: “Anch en wadiany in kutesh malejan mam, ing yiyukish yam yelang kwikal kudi en mudi wit wakad kuumang mem! Kupandakan kwelang kwikal kudi en mudi mambek makata kwezang ku chikum cha karung.” (Isay 48:17, 18) Tuchingejin mazu minam. Twitiyijin anch chiding chisu chawonsu mulong wa ukwash wetu kuziyil ku yijil ya Nzamb.
7. Chom ik tufanyidina kusal anch tuteshinap kamu kurumburik kwa chijil chidia mu Dizu dia Nzamb?
7 Twitiyijin ku winyikel wa Yehova ni kumuziyil ap anch kituteshinap kurumburik kwa diyingishin dia chitwitinay chidia mu Dizu diend. Riner ridiap ritiy ra wimputames, pakwez kudi kuchingejin. Kumekeshin ruchingej rakin ridiokila mu muchim anch Yehova ndiy kusu wija chituwapidila. Kuziyil kwetu kudi uman wa rukat retu, mulong kambuy Yohan wafunda anch: “Rukat ra Nzamb rawiy er, chakwel tukulam yijidik yend.” (1 Yoh. 5:3) Pakwez kudi mulad ukwau wa rukat retu kitufanyidinap kuvuramen.
Tufumbany Manangu Metu ma Kujingunin Nich
8. Ov, ‘kufumb manangu metu ma kujingunin’ nich kukwatijadin nchik ni kwitiyij winyikel wa Yehova?
8 Bibil utulejin anch tufanyidin ‘kufumb manangu metu mulong wa kujingunin kuwap ni kuyip.’ (Heb. 5:14) Chawiy lel, rutong retu kiridiap ra kuziyil ku yijil ya Nzamb mulong kwau wa kuziyil kusu. Pakwez, tusotil twikal atwishina “kujingunin kuwap ni kuyip” kwengamidina pa yijil ya Yehova. Tusotil tumana manangu ma jinjil ja Yehova, chakwel anch tutwisha kulond mulong mwalonday nfund a kuseng anch: “Yijil yey yidi kal mu muchim wam.”—Kus. 40:8.
9. Mutapu ik tukutwisha kusal kukwatijan nich kom ketu ni yijil ya Yehova, ni mulong wak chidi cha usey anch tusala mwamu?
9 Chakwel tusanger yijil ya Nzamb mudi mwasalay nfund a kuseng, tuswiridin kutongijokin pa yitutangina mu Bibil. Chilakej, pitwilejina piur pa yom kanang yitinay Yehova, tukutwish twiyipul anch: ‘Ov, mulong wak chijil chinech ap chany chinech chidi cha manangu? Ov, mulong wak chidi mulong wa kuwap kwam kuziyil? Ov, yibudikin ik yiyimp yayishikena antu adiwula chiyul cha Nzamb pa mulong winou?’ Anch kom ketu kasal kukwatijan nich jinjil ja Yehova pa mulong winou, tukutwish twikal tayad kukwat mipak yikwatijadina nich rusot rend. Tukutwish twijik “mudi mudia rusot ra Mwant” ni kupwa kulondul nich kuziyil. (Efes 5:17) Chidingap chiswapela chisu chawonsu.
Satan Usotil Kukisish Winyikel wa Nzamb
10. Mwi njil ik yimwing musotilay Satan kukisish winyikel wa Nzamb?
10 Satan wasambisha kal kudiosh pakur kukisish winyikel wa Nzamb. Spiritu wend wa want ipend umeken mu jinjil jivud. Tal, chilakej, kuburen kalimish piur pa ditenchik dia uruw dia Nzamb. Antu amwing akatining kushakam pamwing, oku akwau atenchikin mutapu wa kujip mauruw mau. Antu adia mu chisak chikwau akutwish itiyij yalonday mband umwing wijikena mwin kusengan masengan anch: “Chikasikening kwikal ni ikundj ap mband umwing kusu.” Wawejinaku kand anch: “Am nimwijap muntu ap umwing ushinshamena kudi mbay nend wa uruw.” Kutongijokin pa kujipol urund wend, mwin kusengan mukwau wijikena walonda anch: “Nitiyijinap kamu anch kulondulijan nich mutapu watangau tufanyidin kwikal ching ni mbay a uruw umwing kusu mu mwom wetu.” Tukusal nawamp twiyipula anch, ‘Ov, nitiyijin winyikel wa Yehova pa mulong wa uruw bil anch, ngikadil yijondila ya mangand anch uruw kiufanyidinap kushal chikupu yangandamin kal?’
11, 12. (a) Ov, mulong wak chikat kuyikasiken ansand kwitiyij winyikel wa Yehova? (b) Shimunin uman umwing ulejena yibudikin yiyimp yidingaku ya kulik kulondul yijil ni yany ya Yehova?
11 Ov, udi nsand mu dirijek dia Yehova? Anch mwawiy, ukutwish wikal diloz dia pakampwil dia yoziu ya Satan ya kukisish winyikel wa Yehova. “Mak mayimp ma mujimbu” pamwing nich yipwichik ya arund yikutwish yakushikij ku kutongin anch yijil ya Nzamb yikasiken. (2 Tim. 2:22, MM) Kangal chom chinech chikushikena. Sal usu wey umana manangu madia mu yijil ya Nzamb. Chilakej, Bibil ukulejin anch “chinany kusotan.” (1 Kor. 6:18) Iyipula kand, yipul yiney: ‘Ov, mulong wak chijil chinech chidi cha manangu? Ov, kuziyil pa mulong winou kukwinkwash mutapu ik?’ Ufanyidin wijik anch antu amwing adiwula chiyul cha Nzamb ashikena ku yibudikin yikash mulong wa kurumbuk kwinoku. Ov, chakin kamu asanger katat? Ov, akwet mwom upandakenamu kuwap wadingau nich padingau mu dirijek dia Yehova? Ov, chakin kamu ajingunina kal ujindj wa musangar uburedinau atushalapol akwau a Nzamb?—Tang Isay 65:14.
12 Tushinshikinany yirumburil yarumburilay mwin Kristu umwing Sharon, pasutil kal mivu anch: “Mulong wa kudiwul chijil cha Yehova, nakwachika mayej majipena SIDA. Nikat chisu ni chisu kuvurikang mivu yivud ya musangar yinasutisha mu kumusadil Yehova.” Ndiy witiyija anch chadinga usu kujiril yijil ya Yehova ni anch chamufanyidina kuyilam nich kalimish kajim. Yijil ya Yehova yidi mulong wa kutulam. Sharon wafa kupwa mbing musamban kupwa kwa kufund mazu madia kwiur oku. Mudi muchimekena mu chom chikash chamushikena, Satan kakwetingap chom chiwamp cha kuyinkish antu adia mu ditenchik diend. Mudi “samakasu mwin,” ndiy ukat kushilamu yom yivud, pakwez kakatap kuyiwanyish, kudi kamu kushil kwamushilayim Eve. (Yoh. 8:44) Chakin kamu, chidi chiwamp chisu chawonsu kwitiyij winyikel wa Yehova.
Ilamany Pantaliken Nich Spiritu wa Want Ipau
13. Mu jinjil ik jimwing mutuswiridina kwilam pantaliken nich spiritu wa want ipau?
13 Mu kwitiyij winyikel wa Yehova, tuswiridin twilama pantaliken nich spiritu wa want ipau. Ngikadil ya kwibaz yikutwish yatwovish anch kituswiridinap wintakel wa muntu ap umwing. Chilakej, tukutwish twalik chiyul cha antu atakedila mukach mwa antu a Nzamb. Nzamb watenchika kal dirijek kusutil ku chisak cha kashalapol ushinshamena ni kubabal chiletina yakudia ya muspiritu pa chisu chau. (Mat. 24:45-47) Tufanyidin nich kwikepish twijika anch yawiy njil yisadidilay Yehova mulong wa kuyibangin antu end ilel. Ikalany mudi atwimbuy ashinshamena. Chisu chipwakalau in kwilej amwing, Yesu wayipula atwimbuy anch: “Ni yen kand usotilany kuya?” Pita wamwakula anch: “Mwant, tukuya kudi nany? Ey yey ukweta mazu ma mwom wa chikupu.”—Yoh. 6:66-68.
14, 15. Ov, mulong wak tufanyidin kuziyil nich kwikepish ku chiyul cha Bibil?
14 Mu kwitiyij winyikel wa Yehova mudi kwitiyik ku chiyul chengamidina pa Dizu diend. Chilakej, chisak cha kashalapol ushinshamena ni kubabal chikat kutubabesh anch “tulamany ni kwikuchik.” (1 Tes. 5:6) Chiyul chinech chidi cha usey ukash pakampwil pa machuku manam ma kwisudiel mikadilau kal antu avud “in kwikat ayinau, in kukat nfalang.” (2 Tim. 3:1, 2) Ov, ngikadil yiney yipalangena yikutwish yatukwat? Inge. Jintong jakad kwikal ja muspiritu jikutwish jatuladik mu tul twa muspiritu, ap tukutwish twikal nich ngikadil ya kusot ching mapit ma ku mujimbu. (Luka 12:16-21) Chawuy lel, chidi cha manangu mudi ik kwitiyij chiyul cha Bibil ni kwipuk mwom wa choy upalangena mu mangand ma Satan!—1 Yoh. 2:16.
15 Yakudia ya muspiritu yiletinay chisak cha kashalapol ushinshamena ni kubabal ayipalangeshin mu yikumangen kudi amakurump atondau kal. Bibil utubabeshin anch: “Yiziyilany awiy adia in kutakel en ni kwitudish kudi awiy, mulong adi in kulam a mipim yen ni pakez kapanau kuchind; asala yom yiney nich musangar, kangal nich ushon, mulong mwamu kichikunikwashanyip en.” (Heb. 13:17) Ov, chom chinech chirumburikin anch amakurump adia mu chikumangen kakatap kurumbuk? Bwat kwau! Nzamb umen kurumbuk kwau kumupandakanamu muntu ap wisu. Chikalap nchik mwamu, ndiy utuchingejin anch tumuziyila. Kusadilang mu kwovijan nau, ap anch adi akayitil, kuletin uman anch twitiyijin winyikel wa Yehova.
Usey wa Kwikepish
16. Mutapu ik tukutwisha kumekesh kalimish mulong wa Umutu wa Yesu piur pa chikumangen cha Ukristu?
16 Etu awonsu tufanyidin tuvurika anch Yesu ndiy udia Mutu wakin wa chikumangen. (Kol. 1:18) Diyingishin dimwing ditufanyidina kuziyil nich kwikepish ku wintakel wa amakurump atondau kal, ni “[t]uyitumbishany nakash.” (1 Tes. 5:12, 13) Chakin kamu, amakurump adia mu chikumangen akutwish amekesh anch niyawiy aziyidil kusutil ku kulejan ku chikumangen nich kushinshaman uruu wa Nzamb, kangal yitongijok yau ayinau. Awiy kakatap kuwejinaku ku “mazu mafundilau” chakwel alejanaku yitongijok yau yimwing.—1 Kor. 4:6.
17. Ov, mulong wak spiritu wa kwibaz uyipin?
17 Antu awonsu adia mu chikumangen aswiridin kwilam pantaliken nich kusot ntumb yau ayinau. (Jinsw. 25:27) Chakin kamu, chom chinech chadinga mupit kudi mwin kwilej umwing wasankanijanay nend kambuy Yohan. Ndiy wafunda anch: “Diotref ndiy usotil kwikal piur mukach mwau, walika kutwak nich kalimish. Chawiy anch nez, nikez kanivurishan ya yom yasalay; atusesa etu nich mazu mend mayimp.” (3 Yoh. 9, 10) Tukwet chom cha kwilejin ku chom chinech nlel. Tukwet diyingish diwamp dia kubwit chitongijok chin chawonsu cha kusot ukurump tukutwisha kuman mu etu ayinetu. Bibil utulejin anch: “Kwibaz kukat kusambeliku chad lel kusheshik, ni muchim wa kwibaz ukat kulet kuwa.” Antu itiyijina winyikel wa Nzamb afanyidin kujijamen mupit wa kwibaz, mulong kukat kulet kuwa.—Jinsw. 11:2; 16:18.
18. Chom ik chikutukwasha twitiyija winyikel wa Yehova?
18 Inge, sal dikal diloz diey dia kujijamen spiritu wa mangand wa want ipau ni itiyij winyikel wa Yehova. Chisu ni chisu, tongijokin nich kusanger pa chisend chijim chiukweta cha kumusadil Yehova. Kwikal kwey mukach mwa antu a Nzamb udi uman ulejena anch ndiy wakupwita kusutil ku mwiku wend utumbila. (Yoh. 6:44) Kangal wakwat nich usweral urund wey ni Nzamb. Sal usu mu mwom wey wawonsu chakwel ulika spiritu wa want ipey ni chakwel witiyij winyikel wa Yehova.
Ov, Uvurikin?
• Kwitiyij winyikel wa Yehova kwitin ik?
• Kufumb manangu ma kujingunin nich kwambaten nchik nich kwitiyij winyikel wa Yehova?
• Mu jinjil ik jipakishinay Satan kukisish winyikel wa Nzamb?
• Ov, mulong wak kwikepish kudi kujim mu kwitiyij winyikel wa Yehova?
[Chipich chidia pa paj wa 18]
“Etu tufanyidin kumuziyil Nzamb chipandakena antu”
[Chipich chidia pa paj wa 20]
Chiding chisu chawonsu cha manangu kulondul yijil ya Nzamb