Tuyifundishany Akwetu Chakwel Amenaku Ukwash
1 Yehova usotin antu awonsu atambula ukwash. (Is. 48:17, NW) Wij yiletininga musangar wa kashinsh. Rusot rend rujim ridi anch antu ipuka mar ni kusanger mwom kusutin kuziyil ku yijil yend. Tutambwiling ukwash nakash mu kushakam kulondulijan ni njil ya Nzamb. (Kus. 34:8) Ov mutapu ik tukutwisha kuyifundish akwetu kusal chilik chimwing?
2 Yom ik Yisotiningau Antu? Ov yom ik yisotiningau antu a ndond yitushicha? Ov udap mulong wa kwikal ku matu zoong kol kwau, kukasikesh uruu wau, machuku ma kurutu ma aanau, ni milong yikwau yifanikena nich? Pakwetingau milong, ov kwisu kukatau kukarumukin mulong wa kuman ukwash? Akutwish kwengamin padi ayinau, manangu mau, ap yiyul ya akwau. Mwi njil yiney, avud ayirumbangeshining nich yitongijok yakad kutwish kusadil ni yakad ukwash pa ndond pa kumenaku ukwash. Tufanyidin kuyilej anch yiyul yipanina Dizu dia Nzamb yipandiken kulemp yiyul yikwau yawonsu. (Kus. 119:98) Ov tukuchisal nchik? Nich kuyilej anch kudiosh kamu katat, akutwish kwikal ni mwom upandikena kuwap anch asal usu wa kwilej Baibel ni kusadil yilondinay.—2 Tim. 3:16, 17.
3 Mwom wa Dijuku Uwamp: Antu akemp kusu awiy ajingunina anch yiyul yidia mu Efesus 5:22–6:4 yikwashining kupwish milong ya dijuku. Mwamu kamu muchadinga kud ambay aad a uruu akwata chiyul cha kwaurik, kupwa kwa mivu dikum ya uruu. Pakwez mband wasambisha kwilej Baibel, amufundisha yijidik ya Baibel piur pa uruu. Chadingay ni kusadil yadingay ni kwilej, mfumwend wamana kukarumuk kwa mukajend, ni ndiy wasambisha kwilej. Kupwa walonda anch: “Katat twaman kal dishin dia mwom wa dijuku wa musangar wa kashinsh.”
4 Rutong ra Kashinsh mu Mwom: Nsand umwing wadinga ni kuna damb wadinga ni kwit ukwash kud Atuman’a Yehova, amurumburila anch Yehova wadinga ni kumulam. Ulondin anch: ‘Najingunina anch Sakatang ukwet rutong mulong wa antu ni ukupan mwom wa chikupu kud antu itiyidinay. Ukutwishanyap kutongin musangar unova pa kutesh mwamu. Nlel nikwet ukash wa mujimbu uwamp, chisambu cha manangu, ni urund wa piswimp nakash ni Nzamb.’
5 Muntu mwawonsu ukutwish kuman ukwash mu Dizu dia Nzamb. Anch twadisadil mud mutakel wetu, tumekeshin anch njil ya Yehova yipandiken kulemp jinjil ja mangand minam. (Kus. 116:12) Twitapidil dilau dia kupan uruu winou ni kuyifundish akwetu chakwel amenaku ukwash. Anch twasal mwamu, tukez kuman mabuj mapandikena kuwap.