Kwirijek kurutu kwa chisu kuletining musangar
1 Kubudikin mu mudimu wa chingand kuletining musangar ujim. (Kus. 89:15, 16) Mwaning, kwirijek chidi chom chimwing chijim anch tusotin kuman musangar sens. Anch twirijek nawamp nakash, anch twasal mudimu nakash, musangar wetu ni wawiy ukwikal ujim.
2 Tusadilany yom ya mudimu yitwinkishinau: Tusambishany kwirijek kwetu nich kutang ni kushinshikin malejan ma Mudimu Wetu wa Want. Ukweting chisu chivud yitongijok yirijekinau nawamp mulong wa kutukwash kupan uruu wa Want mutapu uswapela ni ukweta mabuj. Tukumutan yilikej ya mitapu kushalijan ya kwakul ku yikangesh misamb. Atulejiningamu yitongijok yifanyidina piur pa mutapu wa kusal yichirikinimu yisu yikweta mabuj, nich rutong ra kusambish dilejan dia Baibel. Tukwet want ipau wa kwambatanish yiyul yiney nich yitutongina anch yifanyidin. Chikwau kand, tukwet buku Comment raisonner, buku utukwashina nich milad yivud ya kusambish misamb ni kwakul ku yikangesh misamb, chawiy lel tukwet mitapu ya kwikal ni mabuj mu mikadil yawonsu tukata kusankan.
3 Tushinshikinany mukand tukupana, ni tutondamu mulong ujim umwing ap yaad yisangarishina yitukutwisha kumulej mwin kwisamb netu. Rusangu rujim ritwateshina ap kutang rikutwish kutwinkish ndond ya kusambishin mambamb. Tutongina kurutu kwa muten yikangesh misamb yijikena, ni kulam yitongijok kanang piur pa mutapu tukutwisha kuyakwil. Chad lel tusalany aminit akemp a kuchirikin yitukulonda ku chis.
4 Tukumanganany ku yikumangan ya mudimu yawonsu: Tutany matu ku yiyul ya Mudimu Wetu wa Want yisambidinau ap yichirikidinau pa chisu cha Chikumangan cha Mudimu ni yakumenaku yisadinau. Tufundany yitongijok yitusangarishina yitukutwisha kuwejin ku mutapu wetu wa kupan. Tuvurikany mikadil yimwing yijikena yitukata kusankan mu chingand, ni kutongin mitapu tukutwisha kupan uman mutapu ukweta mabuj. Twisambinany yom yiney ni antwarubil akwau kurutu ni kwinyim kwa chikumangan.
5 Tukutwish kuchingej chakin anch ang ‘twirijek mulong wa midimu yawonsu yiwamp,’ tukez kayikwash akwau kuman njil ya mwom nich musangar ujim ni mabuj mapandikena kuwap.—2 Tim. 2:21.