Tumanany nich usey ujim dijin dipandakena kuwap dia Yehova
1 Satan wayipisha katumb ka dijin dia Nzamb payishikijay anvajetu a kusambish ku kusal chitil. Djabul wadimbana nich kubabal anch Yehova wamudimba Adam. (Dis. 3:1-5) Mulong dijin dia Nzamb diambaten ni ukash wend wa kushikij dizu diend, kulond kwa Satan mading makasu mamwing mayimp nakash. Yehova watokishin dijin diend ni kudiwapish, nich kushikij pakemp pakemp rutong rend ra winzamb.—Isa. 63:12-14, NW.
2 Tudi antu ‘atazukinay Yehova mu michid mulong wa dijin diend.’ (Midimu 15:14, 17, NW) Chinech chitwinkishin ndond ya kumekesh mutapu twiyovila piur pa kutumbish dijin dined. Kud etu, dijin dia Yehova dipandaken chakin kuwap, mulong dijin dined dimekeshin yom yawonsu yiwamp, kuwap, rukat, ranaken, ni kutentam. Tukwatiken nich wom wa kumwakam pa kuman kujimb kwa dijin dia uyaj dia Nzamb. (Kus. 8:1; 99:3; 148:13) Ov, chinech chifanyidin kutubachik kusal chom ik?
3 Tutumbishany dijin dia Nzamb: Tukutwishap kusal dijin dia Nzamb dikala ditumbila, mudi mudidinga kal ditumbila. Pakwez nich ngikadil yetu yishitwila ni mudimu wetu wa Want wa kulejan, tukutwish kumekesh anch tumen dijin dia Nzamb nich usey ujim. Tukutwish kulond anch: “Mujikitishany Yehova, en antu! Tazukany pa dijin diend. Yijikishany antu yisal yend. Lejanany anch dijin diend dizambukin piur.” (Isa. 12:4, NW) Ov, mutapu ik tukutwisha kuchisal?
4 Tukutwish kwisakin chisu chin chawonsu mulong wa kulejan dijin dia Yehova ni yawonsu yidirumburikina. Yikala mu mudimu urijekinau ap wa kukashimun, ku chikumbu ni chikumbu ap ku makashiny ni makashiny, mu mukombil ap ku telefon, mudimu wetu wa kulejan umutumbishining Yehova. Anch twatan antu in kusanger uruu wetu, tufanyidin kukanijan nau mulong wa kuchirik kuya ni kuyital ni kuyifundish yivud piur pa Yehova. Chinech chirumburikin anch tufanyidin kamu kulimish kukanijan kwinoku ni kujijaman kusal usu wa kusambish malejan ma Baibel. Chisangarishin kuman anch muvu ni muvu yitot ya tunan twa antu akat kushiken kwijik, kulimish ni kutumbish dijin dipandakena kuwap dia Yehova.
5 Kwinungin kwetu nich muchim wetu wawonsu ku mudimu wa kutumbish dijin dia Nzamb kukat kumekesh pitwimanyidina mu chipul chabudishay Satan mu Eden. Winou wawiy mudimu ujim, wa kalimish tukutwisha kusal. Tudimanany nich usey ujim ni tushimanany nich mushiku dijin dia Yehova dipandakena kuwap!—1 Jins. 29:13, NW.