Ov Ukwikalaku?
1 Kaman umwing wasala kal machuku mavud walonda anch: “Anch waburen dichuku dia kusambish dia chikunguril, waburen kal kamu yivud!” Ov mulong wak walonday mwamu? Mulong dichuku dia kusambish diding disambishil dia musambu umwing wa muspiritu upitishina uturijekidinau kud dirijek dia Yehova. (Isa. 25:6, NW) Kwikalaku kwetu kudiosh kamu kwinsambishil kumekeshin anch twitiyidin yitongijok ya mwin kuseng: “Am nasangar panlejau anch: ‘Tuyany ku chikumbu cha [Yehova, NW].’ ”—Kus. 122:1.
2 Pakwez, muvu wadap ou ku Yikunguril ya Distrik yimwing “Dizu dia Uprofet dia Nzamb”, uvud wa antu akumangena chakin ading akemp Diakatan ni Diampos. Chinech chirumburikin anch akadivar netu avud aburena kutesh yikunku ya chikunguril yalejana jinsangu ja usey piur pa dizu dia uprofet. Aburena kand urund usangarishina pamwing nau akadivar ni anambaz au.
3 Kangal Twalikin Midimu Yikwau Yitukangesha: Amwing chitwishikin aburedin kwez ni kukumangan Diakatan mulong wa kwakam kushadish mudimu wau. Pakwez, Atuman avud amana anch amakurump au a mudimu adinga ni kusot kuyinkish konje anch amwit kurutu kwa chisu. Mukurump wa mudimu umwing washimoka nakash pa kuman kujijaman kwa nambaz umwing chibol kwa kulik kuburen chikumangan ap chimwing ni yikunguril, chinech chamubachika ndiy kuya ni kukumangan ku chikunguril dichuku diakabuj!
4 Ufanyidinap kutong anch mukurump wey wa mudimu kakutwishap kukwinkish konje, ap kutong anch kuburen dichuku dimwing dia chikunguril kukusalap kwau chom. Nich kashinsh kawonsu, irijeka kumulej mukurump wey wa mudimu nich manangu, nich ukwash wa Mifund mulong wak kukumangan ku chikunguril chidi chikunku chimwing cha usey cha difukwil diey. (Heb. 10:24, 25) Kupwa tek ruchingej rey rawonsu mu kushilamu kwa Yehova, ni kwijik anch yikalap nchik yom yiwitina akukwinkishay anch watek bil nswir ja muspiritu pa ndond ya kusambish mu mwom wey.—Mat. 6:33; Heb. 13:5, 6.
5 Chijim kuman usey wa “yom yipandakena kuwap.” (Filp. 1:10, 11; Kus. 27:4) Chinech chitubachikin kwirijek kurutu kwa chisu chakwel kutambul sens ukwash udiokila ku ditenchik dined dia usey dia Yehova. Sambish kwirijek kudiosh kamu katat, ni ikal ni chiyul chakwel anch ukwikalaku machuku mawonsu masatu!