Ikalany in “kwipan chisu chawonsu” mu mudimu wen

¹ Padingay mu Korint, mupostol Paul wadinga ni kusal mudimu wa kuchim antent, tukutwish kulond anch chinech chadinga ni kutek mimbu ku chisu chend cha kulejan. Pakwez, Midimu 18:5 ulondin anch: “Paul wipana chisu chawonsu mulong wa kurumburil rusangu ra Yesu kudi in Yuda. Wayirumburilanga kamu patok anch, Yesu, ndiy kamu Kristu Uzizidilau Many.” Ov mulong wak Paul wipana nakash mu mudimu wa kulejan? Ap anch avud mu Korint ading ikala kal akaritiy, Mwant walonda kud Paul anch mu musumb winou mwading muchidi kand in kwilej avud nakash akwikadish. (Mid 18:​8-11) Ov tukwet yiyingish ya chilik chimwing ya kwipan chisu chawonsu mu mudimu wetu? Mwawiy. Tukutwish kuman antu akwau ni kuyifundish uyakin.

² Sutish Chisu Chivud mu Mudimu wa Kulejan Mwi Ndol: Rutong retu riding ra kudandamen kwikal ni yivud ya kusal mu kulejan rusangu ruwamp ngond ni ngond. Pakwez angond amwing a pakampwil akat kutwinkishang chisu chivud mulong wa kwikal in “kwipan chisu chawonsu” mu mudimu winou. Mu angond inay mudi Ndol, pa chirung cha Chivurikish. Ov mikadil yey yikutwishishin kwikal niyey chibol nkwash ap kuwejinaku usu wey mu mudimu wa kulejan kwisambishil kwa muvu winou? In kulejan avud asadila mwamu atambwil yiyukish. (2 Kor. 9:⁠6) Anch ukat kusal yawonsu ukutwisha kusal, vurik anch Yehova usangeridin mudimu wey usadila nich muchim wey wawonsu. (Luka 21:​2-4) Yikalap nchik mikadil yey, itekina rutong ra “kwipan chisu chawonsu” mu mudimu wey wa kulejan mwi Ndol. Ni kangal wavuramen kutul rapor wey wa mudimu kwisudiel kwa ngond chakwel eza achindina usu wey pamwing ni wa antu akwau a Yehova.

³ Yang Ukayital Antu Asu Akumangena ku Chivurikish: Muvu wasutina ou mu mwab (teritwar) wa mutiy wetu, kuvul kwa antu akumangena ku Chivurikish kwading kwa antu 604 160. Uvud wa antu awonsu akumangena muvu winou kand kal tuwijika. Pakwez, marapor mamekeshin anch kudi yom yiwamp tuchingejina mulong wa “kwangul” kupandakena kujimb. (Mat. 9:​37, 38) Chawiy lel, mud kamu chitwishikina, irijeka mulong wa kuya ni kuyital antu asangeridina akumangena ku Chivurikish chakwel kuyikwash muspiritu. Kulabijok kuya ni kuyital antu mud inay kukutwish kumushil ‘Sakudimban ndond ya kwez kudiosh dizu dia want diakunyinau mu michim yau.’ (Mat. 13:19) Kuyichirikin swa kuya ni kuyital kukumekesh anch udi chakin kamu mwin “kwipan chisu chawonsu” mu mudimu wey.

⁴ Dandamen Kuyikwash Antu Alika Kal Kulejan: Mwi ngond wa Kasan twasambishin kusal usu wa pakampwil wa kuyikwash antu alika kal kulejan. Anch kuchidi kand antu kampand akadiau kwendil kud amakurump, amakurump afanyidin kwirijek kuya ni kuyendil kurutu kwa Ndol kupwa. Amakurump akwikasikesh kutal milong ya kashinsh yikwetay muntu ni mutapu uwamp wa kumukwash kumusadil kand Yehova nich usu. Ukwash winou wa rukat umekeshin anch amakurump akwatin nich makas maad chisend chau mud atufung a “amikoku a Nzamb.” (1 Pit. 5:2; Mid 20:28) Nimero wa Tour de Garde wa Mwinses 15, 1993, paj 22-23, upanin yiyul yiwamp yikutwishau kusadil amakurump pa chisu chimenau milad yitan ya milong yikutwisha kwikal ni antu alika kal kulejan. Chawiy lel, amwing akutwish kand kuyikasikesh mulong wa mudimu wa chingand mwi Ndol.

⁵ Yikwasha Antu Avud Kwikal in Kulejan Akad Kubatishiu: Ov aney awanyishin kal yitinau chakwel kwikal in kulejan asu a rusangu ruwamp? Ing antu ukata kwilej nau Baibel? Anch antu mud inay ayitiyidin kud amakurump, ov Ndol kadiap ngond ukweta chisu chifanyidina chakwel asambisha kulejan? Anch muntu umekeshin kuya kamu kurutu, anch wapwishin kal kwilej broshir Nzamb Witin ni buku Connaissance, dilejan dia Baibel dikutwish kudandamen mu buku wa kaad​—⁠mu buku Parole de Dieu, Paix véritable, ap Unis dans le culte. Rutong rey ridi ra kumukwash mwin kwilej kwikal ni ronganyin ra uyakin, awanyisha yitinau chakwel kwikal mwin kulejan wakad kubatishiu, ni kushiken kwipan ni kwikal Kaman wa Yehova mwin kubatishiu.​—⁠Efe. 3:​17-19; 1 Tim. 1:12; 1 Pit. 3:⁠21.

⁶ Kudandamen kwey ni kuyibangin in kwilej ney Baibel kwa kashinsh kukutwish kuyikwash chakin kamu kusal uyakin wikala iwau. Mukadivar umwing wasankana dichuku dimwing ikundj ni mband ananapina kal, awiy itiya nich musangar dilejan dia Baibel. Pakwez dijuku dined diashejisha dilejan kusut kwa mbing jisatu. Chakin kamu dilejan diasambisha. Chad, dijuku dimika dilejan kand kusut kwa rubing rikwau. Chad lel kupwa, mband waya kurutu djat ni ku dibatish. Mukadivar uvurikin anch, “kupwa kwa kutambul dibatish, mes mend mading mizwil nich mansoj ma musangar, chom chatuletina mwaad wetu am ni mukajam mansoj ma musangar.” Chakin, kwikal in “kwipan chisu chawonsu” mu mudimu wa rusangu ruwamp kuletining musangar ujim nakash!

⁷ Uprofet wa Baibel ni yisutina mu mangand yimekeshin anch twashikedin kal palemp mu chirung cha machuku ma kwisudiel. Katat chawiy chisu chifanyidinau antu a Nzamb awonsu kwikal in “kwipan chisu chawonsu” nich kwijikish rusangu ruwamp kudi antu akwau. Mupostol Paul ulejen nich kushinshik anch mudimu ukata kusalany “kiudiap wamwamu mu Mwant.”​—⁠1 Kor. 15:58.

[Caption on page 4]

Kwinang kukat kumushimanang Nzamb

Mu Chijil cha Moses mwading yany yadinga kulondil piur pa kwinang. Yayikadisha in Isarel antu amwing aurilau, antu afanyina kwikal in kwinang ku muspiritu ni ku mujimbu. (Lev. 11:​35, 36; 15:​1-11; Isa. 52:​11, NW) Kwinang kwadinga ni kumushiman Nzamb ni kukwash muchid kwikal ni ukash wa mujimbu.

Chawiy chimwing kand nlel, kwinang chidi chijiken cha atushalapol a Yehova. Pakwez, anch chinech chidi chakin kud antu awonsu mu uvud, ov mwawiy chidia kud muntu ni muntu pakach petu? Kutongin kwetu kujim mulong wa kutenchik kuwanyin ni kwinang kumekeshin kujimb kwa rusot retu ra kwikamen ku yany ya Yehova.

Ov tukulond nchik mulong wa dijuku dietu? Ov dikat kupwish kalimish ka uruu wa Want tukata kulejanang? Ov chitwishikin anch antu amwing atadikisha kashinsh ketu anch twalond anch divu akez kadikarumun kwikal paradis mulong dijuku dietu dikweta usad, anch tulikin kukup kafus (pashiplom) ni anch rupang rizwil too nich yikau (yishoshot)? Anch chikumbu chetu chimeken mud chidiwilau ap anch chikat kununk didjimb diyimp mulong wa kwikis, ov tukutwish kulond anch tukat kupan ‘chilikej chiwamp cha kwinang chifanyidina mangand masu makutakelau nich Want wa Nzamb’?​—⁠Notre ministère 129-131.

Ing chidi nchik nich motak (kud antu aukweta) tukata kusadilang mulong wa kulejan? Ov motak umeken kamu winangina mukach ni pol, chakwel anch kakezap kulondil nayimp mudimu tukata kusal? Ing tukulond nchik piur pa maswin metu, sakosh wetu ni mulad wetu wa kwikil (kwileng)? Ov yiwapin ni yifanyidina, yakad kumwovish muntu ap umwing usany? Chakin kamu, chakwel kushal antu inangina, tufanyidin kwoyil mem ni kutut maswin metu chisu ni chisu.​—⁠w89 1/6 16-19.

Ov chom ik chifanyidina kusal anch mukadivar kanang ukat kudiul kwinang kwa mujimbu wend ap kwa dijuku diend mu chilik cha kuletin chikumangen usany? Chiwapidil pamwing ap kumukwash nich rukat mulong wa chimbu cha mivu yend ap mulong wa ubid kampand. Kusal mwamu chikwikal kusadil uwamp wa ku muchim. Muntu kanang ukutwish kwikal mwin kadiwij pakad ndiy kwijik; yiyul yipaninau nich kwitudish yikutwish kumubachik kurijek mwikadil wend. Antu akad kupan chilikej chiwamp ku mutambu winou kawanyishinap yitinau mulong wa kwikal ni yisend yijim mu chikumangen. Amakurump afanyidin kwilam mulong wa kulik kulet yany yau ayinau ap yom yikata kuyisangaresh.

Antu asangeridina uyakin mu chisu kanang ayitin kwez ku musambu wa muspiritu ukatau kusal ku Chot cha Want. Chisu chivud, tukat kuyitazukang nich musangar mulong chot chidi chiwamp ni chinangina. Pakwez, tufanyidin kusal usu wetu wawonsu chakwel chishala chinangina. Tushinshikinany ndond tudia. Nkwas, pansh ni rubumbu ov yinangin? Ov ukat kukombany misalany chisu chawonsu? Anch twijidina kal kuman tapi ukweta matayeng ma usad ni rubumbu rilamokina pench, ukutwish kushiken ku kuyiman mud yiwapin kwau. Pakwez antu ezina kapamp ka kusambish ku Chot cha Want akutwish kwikal ni chitongijok chiyimp. Tufanyidin kusal usu wetu wawonsu chakwel anch chot chikala kamu chinangina ni chifanyidina kwak angendj, nich kuchikomb ap kuchirijek nawamp anch yetu tukuchisala.

Pakad kulond dizu, tukutwish kumutumbish Nzamb nich mutapu wetu wa kwimekesh ni kwinang kwa dijuku dietu, kwa motak wetu ni kwa Chot chetu cha Want. Chilikej chetu chiwamp chikwikalap chom chipwakeshina, pakwez chikulet uman wa kwishitul ni kutentam kwa difukwil dietu. ​—⁠ 1 Kor. 10:​31, 32; Jak. 1:⁠27.