Program Musu wa Chikumangan cha Pakampwil cha Dichuku Dimwing

Mutu wa mulong wa program wa chikumangan cha pakampwil cha dichuku dimwing cha muvu usu wa mudimu ushindamedin pa Mufund ukasikeshina ulondila: “Chawiy Muziyilany Nzamb​—⁠Pakwez Rishany Nend Sakudimban.” (Jak. 4:⁠7) Winou udi umutakel ufanyidina kamu mu chirung chinech chikash! Kuziyilang kwetu ku yijil ya Nzamb kukat kututek kapamp kamwing mu kurish kamu nend Satan. Program ukez kutufundish mutapu wa kujijaman kurish nich milad yiyimp ya Djabul, ya kukimb kushesh ritiy. Ov yipau ik ya muspiritu tukutambula ku chikumangan chinech?

Kalam wa munyimuku ukez kulejan mutapu “Kumekesh Kuziyil kwa Winzamb Mud Yid ya Dijuku” kukasikeshining majuku chakwel kujijaman ku yipwichik ya mangand. Diskur dia kusambish dia dichuku dia mwin kulond ngendj, “Chirumburikina Kumurishish Djabul,” dikurumburil anch mulong wak ni mutapu ik tufanyidina kusal usu wa kashinsh chakwel kurish nich yitongijok ya Satan ya kusot kushesh mwom wetu wa muspiritu. Kudi yikunku yaad yambatena kamu nau ansand, chakwel afanyidin kamu niyau kubabel yitongijok ya Djabul. In Kristu avud adia katat amakurump alika kulondul maku ma mangand chisu chadingau ansand. Tukez kusanger kutesh jimwing ja jinsangu ja milong yamanau muntu ni muntu ipend.

Chitin kand kud awonsu asadila chisak cha ukamuntu kuziyil ku wintakel. Pa chinech, diskur dia nsudiel dia mwin kulond ngendj dikez kukasikeshin mitambu yinying mufanyidina kumeken patok kuziyil kwetu kwa winzamb: (1) ku maguvernema, (2) mu chikumangen, (3) mu midimu ya ku mujimbu, ni (4) mu dijuku. Udi program ufanyidina kamu mud ik!

Antu asotina kutambul dibatish ku chikumangan chinech cha pakampwil cha dichuku dimwing afanyidin kumwijikish kalam-ntakel kurutu kwa chisu chifanyidina. Etu awonsu tufanyidin kufund dichuku dia ngond dia chikumangan pa kalandrie wetu ni kwirijek chakwel kukumangan ku program mwawonsu wa chikumangan. Yiyukish tutambwila yikez kwikal ya chikupu anch twamuziyil Yehova chikupu.