Program Musu wa Chikumangan cha Pakampwil cha Dichuku Dimwing
1 Yisaj ni jinjil jikwau ja kupalangesh jinsangu ni alej a ku mashikol ma ku mujimbu patumbishinau dipit dia yom ya ku mujimbu, Dizu dia Nzamb ditukasikeshin “Kwikal Ampich mu Midimu Yiwamp.” (1 Tim. 6:18) Winou wawiy mutu wa mulong wa program wa chikumangan cha pakampwil cha dichuku dimwing chikusambisha pa Mwinses 2002. Ov, kukasikesh ik tukeza kutambul ku chikumangan chinech?
2 Kalam wa munyimuku ukez kwisambin kurumburik kwa “Kwikal Ampich ku Mes ma Nzamb,” ni ukez kuyipul antu amwing akata kwikasikesh kwikal nich mapit ma muspiritu. Mu diskur diend dia kusambish pa dichuku dinidia, mwin kulond ngez ukez kurumburil mutapu usadilau antu a Nzamb “Midimu Yiwamp mu Chisu Chinech cha Kwangul.” Muntu ni muntu pakach petu akez kumukasikesh kushinshikin mutapu ukutwishay kusadil pamwing ap kand mu chilik chimwing chijim nakash mu mudimu wa kwangul upaninay Nzamb mbil chakwel ausala nlel.
3 Tukweting musangar mud ik pitukata kuyiman in Kristu ansand adandamedin kulondul mapit ma muspiritu! Chinech chikat kumutumbish Yehova ni kuyikwash ansand kwitekin mufulandal uwamp mulong wa yisend ya mudimu yidia kurutu. Chikunku “Kuyishiman Ansand Mulong wa Midimu Yiwamp ya Kumutumbish Yehova” chikez kwisambin midimu yiwamp yasadilau kud in Kristu ansand ap pol pen.
4 Yibudikin ik yidiaku ya kudandamen kulondul midimu yiwamp? Mwin kulond ngez ukez kwambambin chom chinech mu diskur diend dia nsudiel, “Dandamenany mu Midimu Yiwamp ni Kwangul Yiyukish ya Yehova.” Ndiy ukez kwisambin piur pa yom yinying mutukata kwangwil yiyukish yipitishina: (1) mud muntu ipend, (2) mud majuku, (3) mud chikumangen, ni (4) mud dirijek dia mangand mawonsu.
5 Antu ipanina kal kud Yehova akez kwikal nich mutapu wa kutambul dibabatish. Anch udi tayad mulong wa kutambul dibabatish, mwijikisha kalam-ntakel kurutu kwa chisu.
6 Anch ijikish dichuku dia ngond dikusadika chikumangan mu teritwar wen, swakej kusal yitenchik yifanyidina kurutu kwa chisu chakwel kwikal pakach pa in kukumangan. Ikasikesha kushik kurutu kwa chisu chakwel utwisha kwinung mu kuwang kwa muminy wa kusambish ni malembil ma kusambish. Kwikalaku ni kuta matu ku program mwawonsu wa chikumangan cha pakampwil cha dichuku dimwing kukez kukukasikesh chakwel kudandamen kulondul njil yimwing yikwikadishina chakin kamu mpich ku mes ma Nzamb wetu, Yehova.