Yiyukish Yidiokila ku Kujikitish Mulong wa Rukat ra Yehova—Chikunku 1
Mupostol Yohan wafunda anch: ‘Etu tukwet rukat mulong [Yehova] watukata etu pakusambish.’ (1Yohan 4:19) Anch twatongin pa yom yawonsu yatusadilay Yehova, tudi abachikinau kumekesh niyetu kand kujikitish kwetu mu mutapu ujim nakash. Pa chinech, Yesu washa chilikej nich kupan mu kuziyil uman piur pa dijin dia Nzamb ni Want wend. (Yohan 14:31) Mulong wa ukwash wetu, tushinshikinany mitapu yimwing mutukutwisha kumekeshin kujikitish kwetu mulong wa rukat ra Yehova ni yiyukish yibudikidinaku.
2 Kulejan kwa ku Chikumbu ni Chikumbu: Yesu wayifundisha in kwilej end mutapu wa kusal nawamp mudimu wa Want wa kulejan. Kulondulijan nich yiyul yend awiy adinga ni kuyang kamu ku chikumbu ni chikumbu mulong wa kupalangesh rusangu ruwamp. (Luka 9:1-6; 10:1-7) Chitin rukat kud Nzamb ni kud mutej netu chakwel kudandamen kuya ku chis ni chis chisu tusankena kulik kubangaku ni rupompat. Pakwez, mu kuyang ku chikumbu ni chikumbu, tukat kutaninamu ayinetu ukwash mulong ritiy retu rikat kujijaman, kwitiyij kwetu kukat kwikal kukash, ni ruchingej retu rikat kukasikan.
3 Mu mudimu winou tusadila mwishin mwa umutakel wa angel, tukat kutan antu avud akweta nzal ni impu ya uyakin. (Kuj. 14:6) Antu amwing alonda anch adinga ni kulembil mulong wa kutambul ukwash chisu chezay Kaman ku chis chau. Anambaz aad Atuman ni mwanikanch umwing ading ni kulejan ku chikumbu ni chikumbu mu ditung dia Antilles. Chakwatau mupak wa kuchirik kwolikwau, mwanikanch waya kamu amwinend ni kukokal ku chis chilondwilaku. Changadim umwing wafungula chis. Chawiy lel, anambaz chamanau mwamu, aya ni kwambamb nend. Changadim winou wayita kwandam ni kuyirumburil anch udiokil kamu pa kulembil kud Nzamb mulong ayituma Atuman chakwel eza amufundisha Baibel!
4 Kupan Uman wa mu Balibal: Mulong mu materitwar mamwing chikasiken nakash kutan antu kwolikwau, chawiy lel, uman wa mu balibal udi mutapu umwing uwamp wa kupan uman kud antu. Chikwau kand, antu avud ashich mu jimpangu mudia yisak ya antu amwing ap mu yikumbu yilaminau nakash mukasikena kuya kulejan ku chis ni chis. Pakwez, kujikitish kwetu mulong wa rukat ra Yehova kutubachikin kukwat yisu yawonsu yimekena chakwel kuyishimunin antu rusangu ra Want, nakash kamu kupan uman wa mu balibal.—Jinsw. 1:20, 21.
5 Kuchirikinamu Kusu: Mulong tukat kukimb antu ajingunina ‘uzwendj wau wa muspiritu,” tusotin kusal yawonsu tukutwisha kusal chakwel kuwanyish nswir jau. (Mat. 5:3) Chinech chitin kuchirik kwichil mem pa mbut ja uyakin twakunina. (1Kor. 3:6-8) Nambaz umwing mu Australie wapana trakt kud mband umwing wamekana mud kadingap ni kusanger nakash. Ap mwamu, nambaz wadandamena kwikasikesh mulong wa kuya kumutal kwolikwend. Chamutanay mband mwinou kapamp kakwau, nambaz wamana anch kupwa kwa kwez kwend kwa kusambish, mband mwinou walanda Baibel umwing ku usey ukash. Nambaz wasambisha kwilej nend Baibel!
6 Kutakel Malejan ma Baibel: Mulad winou wa mudimu wetu ukutwish kwikal uwamp nakash ni kutuletin musangar ujim. Chidi chiyukish mud ik kuyikwash antu kwilej piur pa Yehova, kuyiman mutapu ukarumukinau mu mwom wau chakwel kumusangaresh ndiy, ni kutambul dibatish mud uman wa chijingidij cha kwipan kwau kud Nzamb!—1Tes. 2:20; 3 Yohan 4.
7 Mu nimero ukulondula, tukushinshikin yiyukish yikwau yikutwisha kudiokal ku kujikitish kwetu mulong wa rukat ra Yehova.