Yiyukish Yidiokila ku Kujikitish Mulong wa Rukat ra Yehova—Chikunku 2
1 Mu chikunku cha nsudiel cha ngond wasutina cha mutu wa mulong winou, twisambidin mitapu yinying mutukutwisha kumekeshin kujikitish kwetu mulong wa rukat ra Yehova mu mudimu. (1Yohan 4:9-11) Pinap tukuwejinaku mitapu yikwau yitan chakwel kusal mwamu. Chisu tusadila nakash mulong wa kuyikwash antu akwau muspiritu, tukat kutan yiyukish.
2 Uman wa Kukashimwish: Yiney yidi njil yimwing yiwamp nakash chakwel kuyitan antu afila nzal ni akweta impu ya kutentam ni kupan mikand yikweta ukwash kud awiy. Chidi cha usey nakash ‘kwitekin chisu chifanyidina’ ni kupan uman mu milad yawonsu ni kud muntu mwawonsu tukusankana. (Efe. 5:16) Chikutwish kutwit kukungin usu pamwing chakwel kupan uman mwi njil yiney, pakwez anch twasanger rukat ra Nzamb ni maswir ma antu, tukushiken kupan uman chisu chin chawonsu chitwishikina.—2Tim. 1:7, 8.
3 Mishoner umwing watana yiyukish yivud mulong wa kusambish misamb ni muntu wadinga ni kuya nend pamwing mu weny mu motak. Ikundj mwinou wamekesha kusanger. Wachirikinamu kand kuya ni kumutal, ni asambisha dilejan dia Baibel. Ikundj mwinou weza ku uyakin ni kuya kurutu djat ni kwikal mukurump wa chikumangen!
4 Kufund Mikand: Pamwing ap tukutwishap kuya ku chikumbu ni chikumbu mulong wa ubid (ulim) kanang wa mujimbu ap mulong wa chirung chiyimp. Tukutwish kupan uman mu wiswimp kusutil ku mikand kud antu twija, antu afishina mukatish nau, ap antu akad kwikal ku yikumbu yau mu teritwar. Tukutwish kuvunginamu umwing wa matrakt metu mafanyidina pa chisu chinech ukweta uruu ushindamedina pa Baibel ni ukumukasikesha mwin kumutang kwakul anch ukwet yipul kanang. Sadil adres wey ukata kutambwil mikand ap wa Chot cha Want, kangal wasadil amboku adres wa biro wa mutiy.
5 Kupan Uman Kusutin Telefon: Yiney yidi njil yiwamp ya kuyishiken antu tukata kukangany kutan mu mudimu wa ku chikumbu ni chikumbu. Anch twasal mwamu nich kudimuk nakash, nich uwamp wa muchim, kulond kuwamp ni ukaliweny wa kusadil ronganyin retu nakash, tukutwish kutan chakul chimwing chiwamp. Mudimu Wetu wa Want wa Kasan 2001 paj 5-6, upanin yiyul yiwamp ya mutapu wa kutan yibudikin yiwamp.
6 Chisu chadingay nambaz umwing ni kupan uman wa ku telefon, wamwipula mband umwing anch watonginap kal nakash yiyilamidina ndiy ni dijuku diend machuku ma kurutu. Mband walonda anch wading ni kutong kamu nakash. Wamuleja anch mulong wa kuburen kwend ruchingej, wiyaurila kal pa rend ku chikumbu. Mulong wa rukat ra kashinsh ra nambaz, mband winou witiya kutanijan nend ku chiku chidia piswimp. Mud chibudikin, mband winou witiya dilejan dia Baibel!
7 Kuyak Angendj: Anch tuyikatin amutej netu, tukez kwikal itenchikina kushinshik ngendj mwawonsu ukweza ni kwendil kwi ndond tukata kukumangen ni kumwink ulong nich musangar. (Rom. 15:7) Afanyidin kwiyov anch adi mukach mwa antu atongidina chakin kuwap kwau kwa muspiritu. Anch tukat kuyimekeshin kusanger kwetu kwakin ni kuyit kwilej Baibel, akutwish kwikal abachikinau kwitiy ukwash wetu.
8 Ngikadil Yetu Yiwamp: Kusutil ngikadil yetu yiwamp, kwawiy tukata kutumbishin uyakin. (Titus 2:10) Antu adia mu mangand pakatau kulond yom yiwamp piur petu mud Atuman’a Yehova, akat kumushiman Nzamb wetu. (1Pita 2:12) Chinech ni chawiy chikutwish kuyikwash antu akwau kusambish kwandam mwi njil ya mwom.
9 Ov tukutwishap kuchirikin mitapu yiney yitan chakwel kumekesh kujikitish kwetu mulong wa rukat rijim ra Yehova mulong wetwetu ni kusambish kuyisadil? (1Yohan 4:16) Anch twasal mwamu, tukez kwangul yiyukish yivud.