Lejanany Dizu dia Nzamb Nich Kutentam
1 Padingay ni kupan uman kud mukurump umwing, ‘Filip waburila mu kan mwend, wasambishin pa chikunku chinech cha Mukand wa Nzamb, wamuleja rusangu ruwamp ra Yesu.’ (Midimu 8:35) Filip wading ni “kulejan dizu dia uyakin nich kutentam.” (2Tim. 2:15) Pakwez, nlel, atulam in kwendangan amen anch in kulejan avud akat kusadilang Baibel pachipatu pa chisu chikatau kupan uman. Ov ukat kusadilang Baibel mu mudimu wey?
2 Dizu dia Nzamb wawiy musul wa yom yawonsu yitukata kwitiyij ni kufundish. (2Tim. 3:16, 17) Diawiy dikata kuyipwitin antu piswimp ni Yehova ni kuyifumb mulong wa mwom wau. Chawiy lel chidia cha usey kusadil Baibel mu mudimu wetu kupandakanamu kwau misamb ya chamwamu piur pa mitu ya milong ya kwisambin yikata kutusangaresh. (Heb. 4:12) Antu avud chijau yom yikemp piur pa Baibel, tufanyidin kutang mu Baibel chakwel kuyilej umutakel upanina Baibel ni ruchingej ra machuku ma kurutu rilejenay mulong wa antu.
3 Tang Kapamp Kamwing mu Baibel: Ukutwish kupakish kuya mu kulejan wakad sakosh wa kusendin abuku. Ukutwish kutek mukand usotina kupan mu kasakosh kakemp ni kusend Baibel mu chikas chey ap mu dibeng diey. Kupwa, chisu ukusambisha misamb ni muntu kanang, ukutwish kubudish Baibel chakwel kangal muntu waman anch usotil kumusadil diskur. Iman amwiney mutapu wa kwel anch mwin kukutesh atwisha kulondul ney pamwing mu Baibel chisu utangina. Pamwing ap ukutwish kumwit kutang verse kanang nich dizu dizambukina. Kusanger kujim kukat kwez chisu chikutwishay kutesh chom chilondina Baibel kupandakanamu kuyiteshin kud ey. Chakin, chakwel kumukwash atesha chitongijok cha mufund, kasikeshin mazu mamekeshina chitongijok chijim.
4 Mazu ma Kusambish Nich Misamb Nich Verse Umwing wa Baibel: Kupwa kwa kwiyijikish, ukutwish kulond anch: “Antu akat kukarumukin ku misul kushalijan mulong wa kutan umutakel mu mwom wau. Ov utonginap nchik, kwisu kudia musul upandakena kuwap wa umutakel uwamp? [Mulika muntu akula.] Ov utonginap nchik piur pa mazu minam? [Tang Jinswir 2:6, 7, ni mulika muntu akula.] Manangu ma mwan a muntu mamekeshin kukangany kumwing kukash, makat kuyishikij antu avud ku kuburen ruchingej. Pakwez, manangu ma Nzamb, ma mekening kwikal chisu chin chawonsu makashinsh ni madia ni ukwash.” Kupwa lejan mukand usotila kupan, ni isambina chilikej chimwing chidiamu cha ukwash wa manangu ma Nzamb.
5 Yesu wasadila Mifund mulong wa kuyikwash antu adinga ni michim yiwamp. (Luka 24:32) Paul walejana kusutin Mifund yom yadingay ni kufundish. (Midimu 17:2, 3) Ruchingej retu ni musangar wetu mu mudimu yikez kwiwejinaku anch twikal nich ukaliweny nakash wa kulejan Dizu dia Nzamb nich kutentam.