Yilejany Antu Akwau Rudim Rishitwila

¹ Ap anch adiokil ku ‘michid yivud, tubil tuvud, antu avud ni jindim jivud,’ Atuman’a Yehova adi antu adia mu uumwing, ukadivar wakin wa mangand mawonsu. (Kuj. 7:9) Uumwing winou umeken patok, mu mangand minam ma katat maurikina. Ov mutapu ik chitwishikina? Mulong atwinkishin kal “rudim rishitwila.”​—Sof. 3:​9, NW.

² Yibudikin Yishimokishina: Ov rudim rishitwila chidi chom ik? Kudi kutesh kuwamp kwa uyakin udia mu Dizu dia Nzamb piur pa Yehova ni piur pa ya kushilamu yend, nakash kamu uyakin piur pa Want wa Nzamb. Mud mwasambelay Yesu kulond, uyakin winou awangedin kwi njil yimwing yimekena pa divu, “kashalapol wakin ukweta manangu,” ni antu a “jindim jawonsu ja michid” akat kwak difukwil diakin.​—⁠Mat. 24:45; Zak. 8:23, NW.

³ Chilejinau antu rudim rishitwila, ayibachikin kwambatanish mwom wau nich yany ya Yehova. Ilejin kwikal nich “chitongijok chimwing ni rusot rumwing.” (1 Kor. 1:10) Malejan ma Nzamb masongishin kand mudiau awiy ngikadil yitentamina ni yishitwila, kulond kwa uyakin, nakash kamu nich kuyilej antu akwau rusangu ruwamp. (Titus 2:​7, 8; Heb. 13:15) Yikarumun yiney yishimokishina yikat kumushiman Yehova.

⁴ Chilikej, ikundj umwing watesha rusangu ruwamp kud mwin kulejan umwing, wading nich yipul yivud, yawonsu ayakula kusutin ku Baibel. Yateshay yamukasikesha, ndiy wasambisha kwilej Baibel tupamp twaad pa rubing ni kukumangan ku yikumangan. Washimoka mutapu wamwakau nich chirungil ku Chot cha Want, mulong antu avud pakach pa in kukumangan ading a ulombu wa yikit kushalijan. Mu chisu chikemp kusu, ndiy pamwing ni mukajend akarumuka mu mwom wau ni atambula dibatish. Kudiosh kamu pinipa, ndiy wayikwashin kal piswimp antu akwau 40 kumusadil Yehova, pamwing ni yid yivud ya dijuku diend. Mikalap nchik mar ma ubid wend, ndiy wasambishin katat kamu kusadil mud chibol.

⁵ Yilejany Antu Akwau: Yinship ya mangand yibachikin antu avud a kashinsh kushinshikin kand yitongijok yau ni mwom wau. Mud Yesu, tufanyidin kusot kuyikwash. Kuchirikinamu kwa kashinsh ni malejan ma Baibel yidi yom ya usey nakash chakwel kuyikwash antu a kashinsh kwilej rudim rishitwila.

⁶ Mulad wa misamb wamekena kwikal ni chibudikin chiwamp ni antu akweta midimu yivud udi wa kutakel kapamp kamwing dilejan dia Baibel diswimp pachidiau ku chikumbu. (km 5/02 p. 1) Ov wapakishinap kal kusal mwamu? Chisu wirijekina mulong wa kusal kuchirikinamu kusu, tond mwi wenjil wa Mudimu Wetu wa Want wa Chiwong 2002 mazu ma kusambish nich misamb mamufanyidina mwin chikumbu. Mazu ma kusambish nich misamb mavud madia mwi wenjil winou amasadil nich rutong ra kuya kapamp kamwing mu kwisambin broshir Nzamb Witin ap buku Ronganyin. Chirikin mazu ma kusambish nich minam chakwel ukutwish kusut kapamp kamwing kudiokal ku mazu ma kusambish kushik ku misamb ya umwing wa maparagraf. Tond mufund umwing ap yaad yidia mu paragraf mulong wa kuyitang ni kwisambinay, ni rijek chipul chimwing cha kupwish nich. Chipul chinech chikez kukukwash kwandam mu paragraf utenchikina kwisambin mu kuchirikinamu kulondwila.

⁷ Antu a Yehova akat kuman yiyukish yivud mud chibudikin cha kwilej rudim rishitwila. Tuyikwashany amboku antu akwau avud nich mushiku kwinung pamwing netu mu ‘kutazuk dijin dia Yehova’ ni mu ‘kumusadil chikij ku chikij.’​—Sof. 3:​9, NW.