Tudjalany Kwikepish
Nsand umwing kafung wamuchingejina Yehova ni wamupandakana muntu mwin dikand wadinga wijidina kal kwas njit. (1 Sam. 17:45-47, NW) Ikundj umwing mpich washimpisha muchim ni kujijaman mu mar. (Job 1:20-22; 2:9, 10, NW) Mwan a Nzamb wapwitina katumb ka malejan mend mawonsu padiay Tatukwend. (Yohan 7:15-18; 8:28) Mu chimwing ni chimwing cha yilikej yiney, kwikepish kwadinga nich usey nakash. Chawiy chimwing kand nlel, kwikepish kudi kwa usey nakash mu milong yawonsu yikata kutushiken.—Kol. 3:12.
2 Pitulejena: Chitudia atushalapol in Kristu, tukat kwambulijan nich kwikepish rusangu ruwamp pamwing nau antu a milad yawonsu, tukatap kuyirumburish kurutu kwa chisu mulong wa kabil kau, yashankuru yau, ap mulong wa ndond yikwetau mu chisak. (1 Kor. 9:22, 23) Anch amwing akwet chibeng ap akat kwitutul ni alikin uruu wa Want, tukatap kuyichirishin mud musadilau pakwez nich kushimpish muchim tukat kuya mu kuyikimb antu afanyidina. (Mat. 10:11, 14) Pa ndond pa kupakish kwimekesh nich ronganyin retu ap nich kwilej kwetu, tukat kupwitin manangu mau pa Dizu dia Nzamb, mulong twij anch dikwet usu wa kwitiyijish kupandakanamu chom chin chawonsu tukutwisha kulond. (1 Kor. 2:1-5; Heb. 4:12) Kusutil ku kumwimburij Yesu, tukat kupan ntumb yawonsu kudiay Yehova.—Marko 10:17, 18.
3 Mu Chikumangen: In Kristu afanyidin kand ‘awonsu kudjal kwitudish muntu ni mukwau.’ (1 Pi. 5:5) Anch twayiman akwetu mud atupandakenamu etu, tukez kukimb njil ya kuyisadil akadivar netu pa ndond pa kuyichingejin anch ching awiy atusadil etu. (Yohan 13:12-17; Flp. 2:3, 4) Tukwiyovap anch tukwet usey nakash ni tukutwishap kusal midimu mud kukomb mu Chot cha Want.
4 Kwikepish kutukwashin ‘kulikishijadin umwing ni mukwau mu rukat’ ni kulam chisambu ni uumwing mu chikumangen. (Efe. 4:1-3) Kukat kutukwash kuyiziyil antu atondinau kutakel chikumangen. (Heb. 13:17) Kukat kutubachik kwitiyij chiyul chin chawonsu ap dipup din diawonsu dikutwishau kutwinkish. (Kus. 141:5) Kwikepish kukat kand kutushikij ku kumuchingejin Yehova pituwanyishina yisend yitukutwisha kutambul mu chikumangen. (1 Pi. 4:11) Mud David, twij anch kupandikan kwengamidinap pa ukaliweny wa muntu pakwez pa chiyukish cha Nzamb.—1 Sam. 17:37, NW.
5 Ku Mes kwa Nzamb Wetu: Chipandikenamu yawonsu, tuswiridin ‘kwidutish kwishin kwa chikas cha dikand cha Nzamb.’ (1 Pi. 5:6) Ang chitufanyidin kurish nich mikadil ya kutupak, tukutwish kuswiriken nakash ukwash ukeza kulet Want. Pakwez tukat kushimpish muchim nich kwikepish, tukat kumuchingel Yehova eza kuwanyish ya kushilamu yend pa chisu chend chitenchikinay. (Jak. 5:7-11) Mud muchadinga chakin ku mutambu wa Job muntu mwin kushinshaman, kubangin kwetu kwa kusambish kwawiy oku: “dijin dia Yehova didandamena tumb.”—Job 1:21, NW.
6 Muprofet Daniel ‘wikepisha amwinend ku mes kwa Nzamb wend’ ni wayukishiwa nich kwitiyik kwa Yehova ni watana yisend yivud. (Dan. 10:11, 12) El niyetu tudjal chilik chimwing kwikepish, ni kwijik anch “Ku kwitudish ni kumwov [Yehova, NW] wom kwawiy kwa kupitil dipit, ni katumb, ni mwom.”—Jinsw. 22:4.