Tutany Urund wa Piswimp Nakash Nend Yehova
1. Chom ik chajinguninay nambaz umwing chakwel kutenchik mwikadil wend wa muspiritu?
1 Nambaz umwing mwin Kristu walonda anch: “Nidi mu uyakin pasutil kal mivu 20 nikat kuyang ku yikumangan ni mu kusalang mudimu wa chingand.” Pakwez, wawejinaku kand anch: “Nashikedin ku kutong anch, ap anch yom yiney yikwet usey ujim nakash, kiyawiyip kwau kusu ayinay yikutwisha kwinkwash pa chisu kanang anch mwikadil wikal ukash. . . . Nij katat anch nifanyidin kutenchik yitongijok yam ni kusambish program wa dilejan dia usey chakwel nitwisha kumwijik chakin kamu Yehova ni kushiken ku kumukat ni kusanger yatwinkishay Mwanend.”
2. Ov mulong wak chidia cha usey kuta urund wa piswimp nend Yehova?
2 Kuta urund wa piswimp wa muntu ipend pamwing ni Yehova kwitin kusal usu. Kwitin yivud kupandikanamu kwikal kusu nich chaku cha kusal mudimu wa Ukristu. Anch tukangeny kwisamb ni Yehova pakad kujing, pa kusut kwa chisu chitwishikin anch ez ikala mud murund umwing wa pa muchim utwakad kwisambang nend kand. (Kuj. 2:4) Tushinshikinany dilejan dia Baibel dia muntu ipend ni malembil mutapu yikutwisha kutukwash kuta urund wa piswimp nakash nend Yehova.—Kus. 25:14.
3. Kutenchik ik kwa dilejan dia muntu ipend kukutwisha kutukwash kumusejin Nzamb piswimp?
3 Malembil ni Kutongijokin Yidi ya Usey: Dilejan dia muntu ipend dikata kudish muchim dikwet yom yivud ya kusal kupandikanamu kwau kutek tushony pa manans ma usey nakash madia mu yom ya dilejan ni kutang mifund yijimbwilau. Kutwitin etu awonsu kutongijokin pa yitulejina rusangu riner piur pa jinjil ja Yehova, yany yend, ni untu wend. (Kub. 33:13) Kutesh kurumburik kwa yom ya muspiritu kukwet usu pa yovil ya muchim wetu ni kukat kutubachik tutongijokina pa mwom wetu. (Kus. 119:35, 111) Dilejan dia muntu ipend difanyidin kusadik nich rutong ra kumusejin Yehova piswimp. (Jak. 4:8) Dilejan dia kashinsh ditining chisu ni ndond yiwamp ya kwilejin, ni chakwel kusal mwamu pakad kujing chitining kwipup. (Dan. 6:10) Ap anch ukwatiken nakash mu mwom wey, ov ukat kwitekin chisu dichuku ni dichuku mulong wa kutongijokin pa ngikadil yamushena ya Yehova?—Kus. 119:147, 148; 143:5.
4. Mutapu ik malembil ni dilejan dia muntu ipend yikata kutukwash kuta urund wa piswimp nend Yehova?
4 Malembil madiokila ku muchim madi chikunku cha usey nakash cha dilejan dia muntu ipend. Chakwel anch uyakin wa Baibel ulangwisha yovil ya michim yetu ni kutubachik ku “kumujikitish Nzamb, ni kumwifukwil mutapu uwamp nich kalimish ni wom,” tuswiridin spiritu utumbila wa Nzamb. (Heb. 12:28) Chawiy lel, tufanyidin kusambish chisu chin chawonsu cha dilejan nich kumwit Yehova atwinkish spiritu wend utumbila. (Mat. 5:3) Pitutongijokidina pa Mifund ni kusadil yom yikwashina dilejan yipanina dirijek dia Yehova, tukat kumufungwil Yehova muchim wetu. (Kus. 62:8) Kukwat dilejan mu mutapu winou chidi chisal cha difukwil ku tukata kumekeshin kushinshaman kwetu kud Yehova ni kukat kukasikesh kwipan kwetu kud ndiy.—Jud 20, 21.
5. Ov mulong wak chidia cha usey kud etu kutongijokin pa Dizu dia Nzamb dichuku ni dichuku?
5 Mud mudinga urund win wawonsu, urund wetu nend Yehova ufanyidin kwikal wijidishina chisu chawonsu chakwel ukasikana mu mwom wetu. Chawiy, tukutwish komb, kwilamin chisu dichuku ni dichuku chakwel kusejin kudiay Nzamb, ni kwijik anch niyend, ukez kusejin kud etu—Kus. 1:2, 3; Ef. 5:15, 16.
[Caption on page 1]
[Study Questions]