Sadil Bibil Nawamp
1. Yom ik ufanyidina kusal mu kwirijek mulong wa mudimu wa chingand?
1 Wikalap nchik mukand win wawonsu tutongina kupan mu mudimu wa kulejan, chidi cha ukwash kutond mufund ulangwishina maku wa kuyilej antu akututesha. (Heb. 4:12) Kutond mufund usadidinau mu mukand upanina kukukwash kupan mukand mud muchifanyidina. Mwi ndond jimwing, in kulejan amen anch chidi cha ukwash kulam Bibil ku makas pasejinau piswimp ni muntu ap palejenau ku chikumbu ni chikumbu.
2. (a) Mutapu ik tukutwisha kusambish mambamb metu nich mufund? (b) Mitu ya milong ik ya Bibil yisangarishina antu mu teritwar?
2 Sambish Nich Mufund: In kulejan amwing asambishining mambamb mau nich kumwipul mwin chikumbu chipul chiswapela cha kutongish pa mufund wa Bibil ukutangau. Chinech chikat kupwitin manangu swa pa Dizu dia Nzamb. Ov, yimwing ya minsamb yilondwila ey yikutwish kwikal ya ukwash mu teritwar wey?
◼ “Anch wadi ukwet ulabu wa kusal mwamu, ov, welangap kuyisal yom yiney?” Tang Kujingunik 21:4.
◼ “Mulong wak tushicha mu machuku ma mar makash mwamu?” Tang 2 Timote 3:1-5.
◼ “Ov, utongin anch chisak chetu chelang kwikal nawamp nakash anch muntu mwawonsu ulondwil chiyul chinech?” Tang Mateu 7:12.
◼ “Ov, utongin anch aney akez kasanger mikadil yilejenau panap?” Tang Kuseng 37:10, 11.
◼ “Ov, utongin anch kukez kwikal dichuku dikuwanyina mazu minam?” Tang Isay 33:24
◼ “Ov, wij nawamp kuswimp kwa winyikel ulejenau panap?” Tang Daniel 2:44.
◼ “Ov, wovap kal jakumwipul Nzamb chipul ech?” Tang Job 21:7.
◼ “Ov, chitwishikin kuyiman kand akatish netu afila kal?” Tang Yohan 5:28, 29.
◼ “Ov, afu ij yisadinau antu adia om?” Tang Mulej 9:5
3. Mutapu ik tukutwisha kuyikwash antu chakwel ova nawamp mifund ya Bibil tutangina?
3 Rumburil, Ilikej, Sadil: Anch muntu usotil kwambamb, kangal wasutish minsamb mau-mau. Tek chisu cha kurumburil, cha kwilikej, ni cha kusadil mufund utangina chakwel wovakana nawamp kud muntu. (Neh. 8:8) Anch antu atesh nawamp ni itiyij yifundishina Dizu dia Nzamb, dikutwish kulet kuswimp kuwamp mu mwom wau.—1 Tes. 2:13.
4. Mutapu ik tukutwisha kusadil Bibil nawamp mu kuchirikinamu kusu?
4 Dandamen kusadil Bibil nawamp piukudishina kusanger. Ukutwish kusadil mulad wawiy umwing mu kuchirikinamu kusu: (1) Tond mufund ufanyidina. (2) Langwish chipul chiswapela cha kutongish chitadila mufund. Kupwa utanga. (3) Urumburila, wilikeja, ni usadila. Ikasikesha kuwejin ronganyin ku yijay muntu piur pa Dizu dia Nzamb chisu ni chisu uyila ni kumutal. Ukutwish kutakel dilejan dia Bibil pakad kulab!