Branch Letter

Atutwambil Akatish:

Nich nsambishil ya muvu usu winou wa mudimu, kwiwejidin munyimuku usu 1 mu teritwar wa mutiy wa Congo. Teritwar wa mutiy wetu ukwet katat minyimuku 137 ni madistrik 12.

Kudi midimu yivud nakash yasadikina mulong wa kutenchik Yitentam ya Distrik 92 ni yikwau 7 ya machuku maad mu teritwar mwawonsu wa mutiy. Mafundish amapanin mu jindim 11, kuwejaku ni rudim ra yijingidij, yitentam yimwing yading ni program wa kwiswipish. Tukujikitishinany en awonsu akadivar, wakasinanya weny ulemp mulong wa kuya ni kukumangan ku yitentam yiney yijim ya muspiritu.​—⁠Kuv. 31:⁠12.

Pasut kal piswimp muvu umwing asambishin kutung Yikumbu ya Kushakam yisatu ya maetaj maad mu rupang ra Betel wa Kinshasa. Yikumbu yiney yikwikal ni tupalikany 84. Mudimu wa kusambish wading wa kutung mufulandal ufanyidina mulong wa Yikumbu ya Kushakam yiney yisatu. Asadidil piswimp maton 16 000 ap mud uvud wa makaminyo 1 000 ma mayal matutinau, mulong wa kurijek ni kuband nich ndond ya kutungin mufulandal.

Chapu cha rutung cha munomu chawiy chitungina yikumbu yiney. Departema wa Rutung wa Betel ukwet mudimu wa Kushinshikin Nawamp yawonsu yitunginau. Kudi kwovijan kuwamp nau in kutung. Umwing wa in kutung walonda anch: “Yiney yidi ndond yimwing ya kutung yishalijadina. Antu awonsu akat kutwinkish moy, ni in kutakel mudimu en ni yawiy akat kuyilangwish antu awonsu tusadina nau mudimu, chidingap kwau mwamu ndond jikwau tukata kutung”. Mukwau walonda anch: “Nzamb udi kamu chakin ni yenen mulong kudiosh kamu pa chisu chikash twasambishina kutung mufulandal kunoku ku Kinshasa, kwadingap ruvul mukash mud chidinga chaku.”

Kutung kudandamedin kwambatan nich program utekinau. Pa chisu chifanyidina, pakupwishau Yikumbu ya Kushakam yiney yisu, dijuku dia Betel wa Kinshasa dikwikal diwanyishinau kamu nawamp mulong wa kuyisadil akadivar adia mu chingand cha Congo. Mujikit winou wawonsu wa mushiku mu kuyish kurutu yisakin ya Want udi kamu wa kushiman! Ukwash wen wa kupan nfalang mulong wa mudimu winou tuusangaredin kamu nakash. (Jinsw. 3:​9, 10) Yehova ayukish usu wetu tukungina pamwing chakwel ‘kumusadil mulong wa kushiman uyaj wend.’​—⁠Efe. 1:⁠12.

Akadivar nen,

Biro wa Mutiy wa Congo