Tulejanany Uyaj wa Yehova
1 Nfund-a-kuseng walonda anch: “Muwangilany [Yehova] en awonsu ushichanya pa mangand! Londany rusangu ra uyaj wend pakach pa michid yawonsu ni yisalijok yend yikwamushen.” Anch twatong yasalay Yehova, yisadilay, ni yikutusadilay kand, michim yetu yitubachikin kulejan uyaj wend!—Kus. 96:1, 3.
2 Mu Mudimu Wetu: Atuman a Yehova akwet ntumb ya kusend dijin dia Nzamb ni kudishiman patok pa mangand mawonsu. (Mal. 1:11) Kudi kushalijan mud ik nau abishop a Kristendom, adioshina mu kwitutul dijin dia Nzamb mu yikarumun yau ya Bibil! Mudimu wa kwijikish dijin dia Nzamb udi wa kuswapej, mulong antu afanyidin kutazuk pa dijin diend mu ritiy chakwel apanda ku mar majim mezina. (Rom 10:13-15) Chikwau kand, chisambu cha ngand ya kabuj, pamwing ni chisambu pakach pa antu ashicha pa divu, chimedin pa kutumb kwa dijin dia Nzamb. Chakin, midimu ya Nzamb yawonsu yinungin ku dijin diend.
3 ‘Yehova udi mujim ni chifanyidin kumushiman nakash.’ Pakwez chakwel anch antu ‘apana kud Yehova uyaj wa dijin diend,’ afanyidin kwijik uyakin piur pendendiy. (Kus. 96:4, 8) Pakwez, amwing alikin anch Nzamb kwikil. (Kus. 14:1) Akwau amuswingishin ndiy mud chileku (wakad usu), ap alondil anch kakatap kubangin milong ya akaantu. Pituyikwashina antu a michim yitok kwak ronganyin rakin piur pa Sakatang wetu, ntong jend, ni untu wend wa rukat, tumutumbishin Yehova.
4 Ku Yisalijok Yetu: Kushakam mu kwovijan ni yijidik ya kutentam ya Yehova kukat kumutumbish. Yisalijok yetu yiwamp yikusutap yakad kumekan. (1 Pi. 2:12) Chilakej, kwinang kwetu ni kudjal kwetu kuwamp kukutwish kuyikasikesh antu akwau kutubaz, kutwinkish mutapu wa kulond ya yiyukish ya kushakamin mu yijidik yidia mu Dizu dia Nzamb. (1 Tim. 2:9, 10) Musangar mud ik tukweta ‘pamenau antu akwau midimu yetu yiwamp ni kumutumbish Tatukwetu udia mwiur’!—Mat. 5:16.
5 Kusutil ku kulond ni yisalijok yetu, tumushimanany Nzamb wetu mujim pichuku ni pichuku, ni kwakul lel chad ku kutazuk kwinoku kwa musangar: ‘Muwangilany Yehova, shimany dijin diend. Pichuku ni pichuku lejanany rusangu ruwamp ra dipandish diend.’—Kus. 96:2.