Midimu ya Rutung ya Mutiy —Mulad wa Mujikit Utumbila
1. Mudimu ik wasadikina mu rutung ra Yot ya Want ni mu mijikit yikwau ya program wa rutung wa mutiy, chad maswir ik machidiaku ni katat?
1 Mu mivu yitan yasutina ey, atungin ap kutunguril Yot ya Want 564 mu teritwar wa mutiy wetu. Ni katat, tusangeridin chakin mudimu wa usu usadilau akadivar nau anambaz, mu yikumangen yau, ayikwashina akadivar asadidila mu mudimu wa chisu chawonsu atuminau ku mutiy. Ap anch mudimu ujim nakash wasadikin kal, kuchidi kal yivud ya kusal mu kutung kwa Yot ya Want ni midimu yikwau ya kutung kand Yot ya Yitentam mu Limete, Kinshasa, mu Kisangani, mu Provens wa Kwingangel, ni mu Congo Brazzaville. Ov, mutapu ik tukutwisha etu awonsu kukwash mulad winou wa mujikit wetu utumbila tumusadidila Yehova?—Kuj. 7:15.
2. Mutapu ik tukutwisha kukwash mujikit wa rutung udiokila ku mutiy?
2 Ikal Mwin Kwipan: Anch udi mwin kulejan wabatishau kal, tukwitin wipana kwa kwisotil chakwel kusadil mu mijikit yiney kushalijan, nakash kamu chisu chitunginau ap kutunguril Chot chen cha Want. (Kus. 110:3) In kwipan awonsu afanyidin kusal mudimu ni kwikal nich spiritu wa kovijan. (Kus. 133:1) Ap anch ukwetap ukaliweny wa kutung, ukutwish kukwash mu kusal yivud mu mujikit wa rutung. Ukutwish kand kutambul diyiy mu ukaliweny wa rutung dikeza kukukwash kusal yivud mu machuku ma kurutu.
3. Mu mitapu ik yikwau tukutwisha kupan ukwash wetu mu kutenchik kwinoku?
3 Anch utwishinap kusal mud mwin kwipan, ukutwish kukwash kusutil kukuyikasikesh antu akwau atwishina kwipan chakwel kusal mudimu. Ukutwish kuwanyish midimu yikwau mu chikumangen pa ndond ya antu asadidila mu mujikit wa rutung ra mutiy. Mu kusambel kwirijek, amakurump akutwish kushinshikin anch chikumangen achitakedil nawamp chisu chisadilau amwing mudimu ku rutung ra Chot cha Want ap mu mujikit ukwau wa rutung ra mutiy. Chakin kamu, Yehova ukat kusangar chisu tusadila pamwing chakwel kutwal yisakin ya Want kurutu.—Heb. 13:16.
4. Mutapu ik tukutwisha kuyikwash antu asadila mijikit yiney ya rutung?
4 Twikalany in Kukasikeshan: Kutung ndond ja difukwil ni midimu yikwau ya Want kwitining yisu yivud ni mudimu ukash. Choviken patok anch, antu atazukinau chakwel kukwash mu mujikit wa rutung akutwish yisu yimwing kuya kulemp ni yikumangen yau. Twikalany amboku aswapela kuyijikitish ni kuyikasikesh antu ipanina mu mujikit wa rutung, awiy ipaninan chakwel kuwanyish “midimu yiwamp.”—Midimu 6:3; Rom 14:19.
5. Mutapu ik in kwipan mu mudimu wa rutung ukutwishau kwikal isikena?
5 Ikal Wisikena: Kulejan Want wa Nzamb udi mujikit wa kusambish wa difukwil dietu. (Marko 13:10) Nich rutong riner mu manangu, biro wa rutung uletin program chakwel anch in kwipan inay kangal ikal kulemp ni yikumangen chamwamu. Chawiy chimwing, in kwipan ku mudimu wa rutung ikasikeshin kwikal isikena mu kuwanyish yisend yikwetau. Afanyidin kwitenchik ni kushinshikin anch yisend ya chikumangen chau ayiwanyishin chisu chidiau awiy kulemp. Antu atondinau mud ayibol afanyidin kutongin nakash pa mudimu wau: mudimu wa chisu chawonsu wa kulejan. Pakwez, akutwish kupan chisu kanang ku mudimu chakwel kukwash kusutil ku kwipan ayinau mu kusadil pamwing nau antu akwau.
6. Yom ik yikata kusadik mu chikumangen anch antu awonsu asadil mu kovijan pamwing chakwel kutwal difukwil diakin kurutu?
6 Kambuy Paul warumburila anch yid ya chikumangen yikat kusal mudimu pamwing mu uumwing “chakwel mujimbu wawonsu ukutwish kukul ni kukasikan mu rukat.” (Efe. 4:16 Manswik Masu) Rukat retu mulong wa Yehova ni difukwil diakin yitubachikin kusadil pamwing mu kovijan chakwel kukwash mudimu wa kulejan rusangu ruwamp ni kukwash mu mijikit ya rutung ya Want.