Asha Chilakej cha Kushinshaman
1 Muvu wa 1937 wikala nsambishil ya mulad usu wa mudimu wa chisu chawonsu—mujikit wa uchibol wa pakampwil. Amakundj ni amband ayifuvu, ija yivud mu mudimu wa win Kristu, itiyija ayinau kuya ni kusadil kwi ndond kwayitumau kud dirijek. Chikwau kand, kupwa kwa makum ma mivu, ayibol a pakampwil adandamena kusha chilakej cha kushinshaman chifanyidina kwilakej.—Heb. 6:12.
2 Atakela mu Kulejan: Kwisambishil, ayibol a pakampwil atakela mu mudimu wa kulejan kusutil ku kusadil mafonograf mu kulejan ku chikumbu ni chikumbu. Asadinang mazu mimedina pa Bibil makwatangau pa disk chisu cha kuchirikinamu kusu. Ayisadila mu misumb yijim mwasalau yikumangen. Kupwa, ayibol a pakampwil ayituma mu jindond mwadinga kuswir nakash kwa in kulejan Want. Adandamena kuyendil antu awonsu adinga ni kusanger uruu wa Want ni kutakel malejan ma Bibil. Mud chibudikin cha usu wau wa mushiku, asala yitot ya yikumangen. Kulejan kwau kwa mushiku kwakwasha kujimbish kwa dirijek tumena nlel. (Is. 60:22) Ayibol a pakampwil adandamedin kusend chisend cha usey nakash mu kupalangesh rusangu ruwamp “kudi awonsu atangilau mwishin mwa diur.”—Kol. 1:23.
3 Afanyidin Kuyilakej: Ayibol a pakampwil amwing asala makum ma mivu mu mudimu wa chisu chawonsu. Mu kusut kwa mivu, ritiy ra amakundj inay ni amband ashinshamena aritata mu mikadil kushalijan. (1 Pi. 1:6, 7) Alika kuzangam nich mapit mau ma ku mujimbu mulong wa kuya kusadil kwi ndond kwadinga maswir ma pakampwil. Katat amwing ananapin kal ni akat kuyelol, ap kurish nich mikadil ya mar. (2 Kor. 4:16, 17) Pakwez, akat “kusong mabuj ni mu upal wau.” (Kus. 92:14) Akat kumuchingej Yehova ni kutambul chiyukish chend.—Kus. 34:8; Jinsw. 10:22.
4 Chakin kamu tufanyidin kuyijikitish nakash ayibol a pakampwil. Anch ukwetany chiyukish cha kwikal nau ayibol a pakampwil mu chikumangen chen, itenchikany chakwel kwikal nau pamwing ni kutaninamu ku yom yijau. Sangerany mudimu wau mud in kulejan Want akweta ritiy. Ikalany akasikeshinau kusutil ku kushinshaman kwau. Awonsu akwimburija ritiy rau akutwish niyau kwitapil dilau dia Yehova ni kutambul chiyukish chend mulong “ndiy ukat kusangar mulong wa in kusal yakin.”—Jinsw. 12:22.