Yakul Ku Yipul yen

◼ Mu Mitapu Ik ya Pakampwil Tukutwisha Kuyikwash Ayibol?

Mu muvu wa mudimu wa 2009, akadivar ni anambaz piswimp ni 800 000 asadil mudimu mudi ayibol a rawonsu ni ayibol a pakampwil. Atushalapol a chisu chawonsu inay ipanin mulong wa kusong mabuj pa chisu chau, usu wau, ni mapit mau ma kumujimbu chakwel apalangesha rusangu ruwamp ra Want. (Jinsw. 3:9) Musangar mudi ik wa Yehova usangaredinay mausu mau! Mu jinjil ik tukutwisha kumekeshin chitongijok cha Yehova ni kukasikeshin musangar wau pamwing ni kudandamen mu mutapu winou wa mudimu?

Chakin kamu, kutond kwetu kwa mazu mawamp kukutwish kuyikasikesh chakwel adandamen kusal mudimu mudi ayibol. (Jinsw. 25:11) Ov, tukutwish kutenchik program wetu wa pa rubing chakwel tusal nau pamwing mudimu wa kulejan? Pa chisu tusadila nau mudimu pamwing, tukutwish ni yetu twapan ukwash chakwel akepishaku usey wau kufutin motak. (1 Kor. 13:5; Fil. 2:4) Tukutwish kand kumekesh ukwash wetu wa rukat kusutil ku kukasikesh kumekesh kwakan ni pa yisu yimwing kuyitazuk ayibol chakwel eza ku chikumbu chetu mulong wa kudiaku yakudia.​—1 Pita 4:8, 9.

Mifund yilondin nich kashinsh anch Yehova ukez kuyinkish antu akimbininga chakusambish Ukaleng wend yom ya usey. (Kus. 37:25; Mat. 6:33) Mutapu umwing usadidiningay udi kusutil ku ukadivar wa Ukristu (1 Yoh. 3:16-18) Chawiy lel, chifanyidinap ayibol kuburen mijikit ya nfalang chakwel ayibangilang kudi antu akwau. Ni kafanyidinap kuyilej antu akwau chakwel ijik mutapu wa kuyikwash pa yisu yidiau mu maswir. Pakwez, tukutwish kuyikwash ayibol ashinshamena ni “yom yikemp” mu mutapu ufanyidina kusutil ku kwikal tayad ni kuyibangin.​—2 Kor. 8:14, 15.

Pa chisu Febe, mwin kulejan wa mushiku wa mu chirung cha mivu chitot ya kusambish mu chikumangen cha Sanisherey chayay ku Rom, Paul wayikasikesha akadivar in Rom anch: “Mwakany nawamp mu dijin dia Nsalejetu mudi mufanyidinau antu a Nzamb kusal. Mukwashany yom yawonsu yikwetay nich kuswir.” (Rom. 16:1, 2) Tukwet chisu cha kumekesh rukat rimwing er mu kuyikasikenshang antu a mu chikumangen chetu alejeninga rusangu ruwamp pakad kwikal mudi ayibol a rawonsu ni ayibol a pakampwil.​—Mid. 5:42.