Program Musu wa Chitentam cha Pakampwil cha Dichuku Dimwing

Mutu wa mulong wa program musu wa chitentam cha pakampwil cha dichuku dimwing cha muvu wa mudimu wa 2008 ulondin anch: “Etu Tudi Kam—Yehova Udi Muumb Wetu,” wimedin pa Isay 64:8, NW. Chiyul cha Bibil chikezau kutwinkish kusutil ku program winou chikez kukudish kalimish ketu ni chovu cha manangu, kutentam, ni usu, ni rukat ra Yehova Muumb Mujim.

Diskur dia kalam wa munyimuku dilondin anch: “Ikalany Yilond ya Kalimish mu Mujikit wa Kulejan,” dikez kutulej mutapu usangaredinau antu avud chiyukish cha kutambul ronganyin ra uyakin ni kurilejan kudi antu akwau. Diskur dilondin anch: “Kutongijokin kukez Kukulam” dikez kutulej mutapu kukat kutuchidij kutongijokin nakash pa yiyul yitentamina ya Yehova. Mwin kulond ngez ukez kwisamb ni in kukumangan piur pa mitu ya milong: “Kangal Wilikejany mu Chaku Cha Mangand Minam” ni “El Akuumbany Kudi Muumb Mujim.” Anvaj ni ansand akez kuyikasikesh mu yikunku yilondina anch: “Ansand Asadidilau Kudi Yehova” ni “Chisend cha Usey cha Anvaj mu Mudimu wa Kuumb.” Kusutil ku yakumenaku ni ma interview, tukez kusanger kutesh ni kuman yisadilau akadivar ni anambaz etu mu mudimu wau wa kulejan. Antu asotila kwijikish kwipan kwau kusutin ku kubabatishiu mu mem afanyidin kumulej kalam ntakel kurutu kwa chisu. Send Chinong cha Kalam chey cha kwilej pa rubing ra chitentam cha pakampwil cha dichuku dimwing.

Chom chawonsu chitonginay Muumb Mujim ukat kuchisal. Pakwez chidi chisend cha muntu ni muntu udia pakach petu kutond mutapu ukusadilay malejan minam mulong wa kukarumun mwom wend. Antu aziyidila nich manangu ku yany ni yitenchik ya Yehova akutwish, kuyiumbiril, kuyiwapish, ni kuyikarumun ikala yilond ya usey mudi mukim wa kam mu mushet (chikombol) wa muumb a yom ya kam. Pitukata kusadil mu kwovijan ni Yehova, tukat kuushiman ukaleng wend ni kutambul yiyukish yivud.