Program Musu wa Chitentam cha Munyingumuku

Ov, chitwishikin mutapu ik kuyijijamen antu apompatina nich chisum chikash difukwil diakin? Mutapu ik tukutwisha kupandakan mausu makata kutubachikin mu mangand makad kumwijik Nzamb? Program wa chitentam cha munyingumuku cha muvu wa mudimu wa 2009 chikez kwakul ku yipul yiney yijim. Mutu wa mulong ulondil anch: “Pandikanany Tuyimp Nich Kuwap.” (Rome 12:21) Tushinshikinany yidia mu program.

Kalam wa distrik ukez kusal madiskur malondila anch: “Akasikeshinau Kupandakan Tuyimp Nich Kuwap,” “Dimukinany Kwichingej Nakash Ayinen!,” “Mar Mawonsu Makupwa Katat Kamu Ak!,” ni “Tukasikeshany Ritiy Retu Chakwel Tumapandakana Mangand.” Kalam wa munyingumuku ukez kutusadil madiskur malondila anch: “Muten Wen wa Kulank mu Tul Wez Kal!,” wimanyidin pa Rome 13:11-13, ni “Kangal Walengumok pa Dichuku dia Yakamish,” wimanyidin pa Jinswir 24:10. Tuchingedin kand chikunku chikwau chikezay kusal kalam wa munyingumuku chilondila anch: “Tangany Muchim ku Maswir ma Munyingumuku.” Chikunku chikwau chikeza kwikal cha dikasikesh chidi “Ov, Ukutwish ‘Wakwash ku Mudimu’—Ku Kwikal Chibol?” Pa ma sempozium maad, wa kusambish ulondil anch: “Imanany Dang ku Yisal ya Yoziu ya Satan.” Ukez kutukwash tujingunina ni tulika yoziu yijingamena ya Djabul pa milong ya winchij (Technologie), kwipuwangesh, ni mu milong ya kwilej. Sempozium “Ikalany Akash, Wimanany mu Dichuku Dined Diyimp” ukez kutulej mutapu utufanyidina kusadil kamu chiyul chapepilau chidia mu Efes 6:10-18.

Kupandakan musul wa tuyimp ni kulejan uruu wa Want kuyiling pamwing. (Kubur. 12:17) Pakad kwidjidjek Satan udandamedin nakash kuyirishish Atuman a Yehova! (Isay 43:10, 12) Pakwez Djabul ukez kukangany nayimp mulong twakwatin kal mupak wa ‘kupandakan tuyimp nich kuwap.’ Itenchika mutapu uwamp chakwel weza wisakina sens yikunku yawonsu yinying ya chitentam cha munyingumuku.