Chifanyidin Kwichil Mem pa Jimbut Chakwel Jikula
1. Ov, chom ik tufanyidina kwichil mem chakwel chikul?
1 Mbut jakunau mu chir afanyidin kujichil mem chakwel jikula. Chawiy chimwing ni jimbut ja uyakin jikuniningau mu michim ya antu mu teritwar wetu. (1 Kor. 3:6) Tufanyidin kuchirikinamu ni kwichil mem pa jimbut jinej ja chifanikesh jisadidinau mu Dizu dia Nzamb anch tusotil jiminya, jikula, ni jivulijana.
2. Ov, mutapu ik tukutwisha kutek mufulandal wa kumuchirikin kand muntu wamekesha musangar?
2 Ipul Chipul: Chisu urijekina minsamb yey, ov, mulong wak ukurijekap kand chipul chisangareshina chikutwishau kwakul chisu umuchirikidina muntu wamekesha musangar? Ipul chipul chinech kwinsudiel kwa minsamb yen ya kusambish, ni tenchik chakwel uman mutapu wa kumuchirikin. Antu avud amening anch chiding chiwamp kutond malejan mamwing mu buku Chifundishinay Bibil makutwishau kwisambin pa chisu chimekeshinau mutapu wa kusal dilejan dia Bibil.
3. Ov, jinsangu ik ukutwisha kufund chisu ukutanijana ni muntu usangaredina uyakin?
3 Fund Yom Kanang: Anch washik piswimp ni kupwish minsamb yey ya kapamp ka kusambish, itekina chisu cha kufund yom kanang. Fund dijin dia muntu ni adres wend. Chidi kand chiwamp kufund dichuku ni chisu wambamba kal nend, yom wisamba kal nend, ni mikand wamwinkisha kal, anch yidi yivud. Ov, walonda anch ndiy wadingaku mu relijon kanang? Ov, ukwet dijuku? Ov, wamekesha musangar wend ni jinsangu jend? Jinsangu mudi jinej jikez kukukwash chakwel utenchika mambamb ma machuku ma kurutu. Chikwau kand fund chisu watenchika kal ni chipul ukeza kwakul.
4. Ov, mulong wak tufanyidina kuchirik kwisamb ni muntu umekeshina musangar wa uyakin?
4 Dandamen: Satan kakezap kulik mausu mend chakwel ‘adiosha dizu’ diakunau mu muchim wa muntu. (Mar 4:14, 15) Chawiy lel, kangal waziy anch ukwet chikokujol cha kutan muntu usangaredina kand uyakin ku chikumbu. Ov, ukutwish kufund mukand ap kusha ka mukand mwinshin mwa chis? Chibol umwing wasambisha dilejan dia Bibil dia ku chis ni mband umwing pakwez kandingap ni mutapu wa kumutan kand ku chikumbu, chawiy ndiy wamutumina mukand. Chisu chamutanay nambaz ku chimbu chend, mband wamekesha mutapu chisal chinech chamupukuna ku muchim kusutil ku kumekesh musangar wend kudiay. Mudi mutukata kwichil mem pa jimbut ja uyakin, tukutwish twatan musangar ukutwisha kudiokel ku kuman mutapu jikudila, jiyila kurutu, ni “kusong mabuj makum masatu, akwau mabuj makum musamban, chad akwau mabuj chitot.”—Mar 4:20.