Yakul Ku Yipul yen

◼ Ov, nany ufanyidina kwizwish makupon ni yitinau ku Internet?

Yisu yivud mikand yetu yiding ni makupon makutwishau kwizwish ni kutum ku biro wa mutiy mulong wa kwit mikand ap kuyendil kudi Atuman a Yehova. Chikwau kand, tukutwish kusadil kapend ketu wa Web www.watchtower.org mulong wa kwit dilejan dia Bibil. Yitenchik yiney yiyikwashining antu avud chakwel ileja uyakin. Pakwez, milong yimekening chisu chisadidiningau kudi in kulejan yom yiney ya mudimu chakwel atenchika mutapu wa kuyikwash anamakwau a kumujimbu ap antu akwau kutambul ukwash wa muspiritu.

Antu amwing atuma mu mutapu wakad kuwanyin mikand ku biro wa mutiy ni inana ni kwiyov anch dirijek dietu diyibangidiningap ni diyidiwiling kusutil ku malist mamwing matuminingau ku kapend kinak. In kulejan atambula diladikij dia kutazuk muntu kanang walika kwitiyij kumuchirikin amutana ni mulong ni wamekesha ujim wend wa pakampwil. Chawiy lel, chitin kusadil pa kapend ketu ka Web ap kusutil ku makupon mafanyidina kuyisangaresh antu ayinau pakad kusutil kudi in kulejan asotina arund nau ap anamakwau a kumujimbu atambula mikand ap kuyichirikin. Chisu chikujinguninay biro wa mutiy anch mwin kulejan win wa watuma dipaper mulong wa kumanijan ni muntu mukwau, ukulik kwit kwinoku.

Ov, mutapu ik tukutwisha kumukwash mwanamakwetu wa kumujimbu ap arund netu a muspiritu asangaredina uyakin? Anch ey usotin ndiy atambula mikand, ov, mulong wak ukumutuminap kapamp kamwing mudi chipan? Anch ndiy wamekesha musangar ni usotin kumwendil kudi Atuman pakwez kiwijap mutapu wa kumanijan ni amakurump a mu chikumangen cha pol pen, ufanyidin kwizwish fomu Veuillez suivre l’intérêt (S-43) kusutil kudiay kalam wa ujindj wa chikumangen chen ukumutanga ni ukumutuma ku biro wa mutiy. Pakwez, anch muntu wasangaredina udi mwin rukan, udi mu yakamish ap mwin kukwachik maar, ap muyej udia mu rupital, ufanyidinap kumufundin biro wa mutiy pa mulong winou. Chawiy, ukutwish kumukasikesh chakwel amanijana ni akadivar akutwisha kumanijan nend mu mutapu uswapela ap ukufundin amwinend biro wa mutiy.