Yakul Ku Yipul Yen

◼ Ov, in kulejan akutwish kusadil Internet mulong wa kupan uman ap mulong wa kwilej ni antu adia mwingand yindjing?

In kulejan amwing asadila Internet mulong wa kwikal ni malejan ma Bibil mu jingand mulikishinau mudimu wetu wa kulejan ap mudia in kulejan akemp. Yisu yimwing, ashikena ku kwikal ni yibudikin yiwamp. Pakwez chiding cha ubaj anch in kulejan afundijadin uruu ap ma e-mail ni antu akad kwijikijan nau. (Tal Mudimu Wetu wa Want wa Kafunfut 2007, p. 3.) Ap anch chitongijok chikutwish kwikal cha kuyishikijin antu a kashinsh uruu wa Want, pakwez minsamb yiney yikutwish pamwing ap kumushikij mukadivar ap nambaz ku kwisamb ni arund ayimp ap in kupumbok. (1 Kor. 1:19-25; Kol. 2:8) Chikwau kand, mu jingand mulikishinau mudimu wa Want, uruu winou akutwish autang kudi anyikel a ngand. Kufund kwinoku kukutwish kwayitek akadivar ni anambaz mu ubaj. Chawiy lel, in kulejan kafanyidinap kukimb antu adia mwingand yikwau pa Internet chakwel ayileja rusangu ruwamp.

Chifanyidin kwijik kapamp kamwing biro wa mutiy anch tupanin uman wa chikashimwish kudi ngendj twatana mwingand yindjing, tufanyidinap kupakish kukudish kusanger kwend kupwa kwa kuchirik kwol kwau. Pakwez, tukutwish kumulej mutapu wa kusadil kapend ka jw.org chakwel ijika yom yikwau ap atambula jinsangu jikwau jidiokila ku biro wa mutiy wa kwol kwau. Tukutwish kand kumukasikesh chakwel aya ku Chot cha Want chidia kwol kwau. Chakin kamu, mu jingand jimwing mudingap Yot ya Want. Anch usotin anch amwendila kudi Atuman a pol pau, ufanyidin kwizwish fomu utazukinau anch Veuillez suivre l’intérêt (S-43) ni kumwinkish kalam wa ujindj, chakwel amutuma pa jw. org. Biro wa mutiy winou utakedila mudimu wa mwingand mudia muntu wamekesha kusanger, wij nawamp mikadil ya ngand yiney ni ndiy ukutwish kupan ukwash uwanyidina wa muspiritu.​—Tal Mudimu Wetu wa Want wa Kalol 2014 p. 7, ni Mudimu Wetu wa Want wa Kalang 2011, p. 2.

Anch muntu twendidina katat waya mwingand yikwau ap twilejina nend katat utwija ching kusu pa Internet udia mwingand yikwau, tufanyidin kulondul umutakel ulejenau kwiur oku. Pakwez, tukutwish kudandamen kukudish kusanger kwend djat ni pakumekenay in kulejan akutwisha kwilej nend kol kwau. Chad, anch muntu udi mwingand mujidikinau mudimu wetu wa kulejan, tufanyidin kubabal nakash pitwisambina nend piur pa mitu ya milong ya Bibil kusutil ku mikand, ku telefon, ap ku Internet.​—Mat. 10:16.