Swapej Kulondul Maswir

Kudiosh pasambisha kapend ketu ka Web katenchikau, kwit kwa malejan ma Bibil pa kapend kinak kuyil ni kuvulijan nakash. Chikwau kand, kwit kwinoku kwasadika kusutil ku yitenchik yisu ya kupan uman wa patok. Biro wa mutiy ukwashining ditenchik dined disadika swa mu mutapu utwishikina. Chilakej, anch kwit kwinoku kusadikining pa jw.org, amakurump adia mu teritwar mudia muntu wamekesha musangar yisu yivud akutambul umutakel ukudiokal ku biro wa mutiy kupwa kwa kusut machuku maad. Marapor ma mudimu wa chingand mamekeshin anch antu amwing ita dilejan dia Bibil alonda anch kandikal ayakula pasutin kal mbing jivud. Ov, mutapu ik tukutwisha kwikal nich kashinsh anch ukwash winou akez kuyinkishau kurutu kwa kushadish musangar wau?​—Mar. 4:14, 15.

Anch muntu kashichingap mu teritwar wen umekeshin musangar, kapamp kamwing izwish fomu ou Veuillez suivre l’interet (S-43) ni mwinkishay kalam wa ujindj kurutu kwa chikumangen chen chikwezap. Mu dichuku dimwing ap maad, kalam wa ujindj ufanyidin kwijikish rusangu riner ku chikumangen chifanyidina ap kurijikish ku biro wa mutiy kusutil ku kusadil pa jw.org pa ndond ya yom ya Chikumangen. Amakurump afanyidin kutal chisu chawonsu pa kapend ka Web. Anch atanap rusangu ra kumwendil muntu kanang, afanyidin kulondul maswir pakad kulab. Mwin kulejan mwin mwawonsu witinau kumwendil muntu, ufanyidin kutek chisend chinech pa ndond ya kusambish. Anch muntu kwikilay ku chikumbu chend, pamwing ap ukutwish kumushil ka mukand kalejena mutapu wa kutan jinsangu jey.