Kampany Uletining Yibudikin

Mbing jisatu kurutu kwa kusambish chitentam chau cha distrikt, yikumangen yikez kwipan kand mu kampany wa kuyitazuk antu amekeshina musangar mu teritwar chakwel eza kukumangan. Didi diyingish diwamp mulong wa kampany wa muvu winou. Yisu yivud antu itiyijina diladikij ni ezina ku chitentam cha distrikt asangaredining mutapu usadikininga madiskur ma Muspiritu, kutenchik kuwamp kwa madepartema mawonsu kudi in kwipan kwa kwisotil, mwikadil uwamp ni uumwing tumekeshininga. (Kus. 110:3; 133:1; Isay 65:13, 14) Ap mwamu, ov, kampany wetu ukulet yibudikin, pakampwil mwindond yidia antu amekeshina musangar afanyidin kudiokal kulemp chakwel eza kukumangan ku chitentam cha distrik?

Kupwa kwa chitentam cha distrikt cha muvu wa 2011, biro wa mutiy watambula mukand wadiokila kudi mband umwing watana dipaper dia diladikij mu chis chend. Chisu chawonsu wajingamanga pakokilanga Atuman a Yehova ku chis chend. Ndiy wafunda anch: “Nading nich chikumbu chiwamp nakash, nfumwam usangareshina, ni natonga anch nading nich yom yawonsu yikutwish kwinletin musangar. Chaushon, natanap kwam musangar, ni mwom wam kiwadingap chakin kamu nich rutong. Chawiy nakwata mupak wa kwendish motak ulemp wa makilometre 320 chakwel niya kutesh program wa Diampos.” Ndiy wasangera nakash chitentam ni washikena ku kumutazuk nfumwend ku telefon chakwel amuleja anch ukuchingel kand kutesh program wa Diarubing. “Natesha nawamp madiskur mawonsu, natanijana ni Atuman a Yehova avud ni nakwata mupak wa kulik kujingam kwa mutapu winou djat ni kwinsudiel.” Kupwa kwa kuchirik ku chikumbu, wasambisha kwilej ni kupwa kwa angond anying ndiy wikala mwin kulejan wakad kubabatishiu. “Chawiy lel, nikwet musangar wa kutan dipaper dia diladikij mu chis cham mulong mwom wam udi katat nich rutong!”

Antu amwing atambwila diladikij akez kukumangan ku chitentam. Chawiy lel, ikalany nich mushiku wa kwipan mu kampany winou wa usey. Ezany nich maladikij mashadinap mu ul musadikidina chitentam chen ni ukumasadilany chakwel upanany uman wa kukashimwish.

[Kamushet kadia pa paj wa 5]

Ov, Mutapu ik Tukeza Kupan Diladikij?

Chakwel tuwanyish teritwar wetu, tufanyidin kulond mu wiswimp. Tukutwish kulond chom kanang mudi chinech: “Walankany. Tusadin usu wa kwangan diladikij ed. Dined didi dieyey. Ukutanamu yom yivud.” Ikal nich musangar. Pitupanina mu kampany pa kupwa kwa jimbing, tufanyidin kupan kand magazet anch chitwishikin.