Salany Usu Ukash Chakwel Kwijikish Chitentam cha Distrik “Mulondulany Kristu!” In Kulejan Akez Kupan Kand Diladikij dia Pakampwil
1 Muvu wadiap ou kampany wa kwijikish mu mangand mawonsu Chitentam cha Distrik “Dipandish didi Piswimp!” wadinga ni usu ukash piur pa antu adinga asangaredina. Antu itiyija diladikij dia pakampwil imenap kapamp ka kusambish yakudia ya mu spiritu yipandakena kuwap pakach pa Atuman a Yehova. (Is. 65:13) Asangera urund wau nich ukadivar wetu wa chirungil, wa uumwing wa win Kristu. (Kus 133:1) Mulong wa kuyikwash antu avud kukumangan ku Chitentam cha Distrik “Mulondulany Kristu!”, tukez kusambish kand mudimu wa kupan diladikij dia pakampwil pa mangand mawonsu.
2 Yibudikin ya Muvu Wadiap Ou: Kwambatan nich marapor twatambwila kudiokal mu yikunku yawonsu ya mangand, yibudikin yiwamp nakash yamekana kusutil ku kwijikish Chitentam cha Distrik “Dipandish Didi Piswimp!”. Mu jindond jivud antu amekesha kusanger nawamp nakash. Chilakej, jurnal umwing wapalangesha mutu wa mulong umwing wafunday mu milong musamban piur pa kampany winou, ni kulond anch: “Chakwel atana muntu mwawonsu kurutu kwa Chitentam Atuman ading akat kusal usu wa kuyibachik amutej nau—asadin mudimu yisu yivud, mu kwend jindond jilemp, ni kulejan mau-mau.” Mu musumb ukwau, kupan diladikij kwarijekau kwayisangaresha in kupalangesh jinsangu a mu musumb, ni kwayibachika kusambish kupalangesh jinsangu. Piswimp majurnal masatu malejana mu mutapu uwamp piur pa mudimu wetu kurutu kwa chitentam. Kabamb-a-nsangu umwing wafunda mitu ya milong yivud yadinga ni mapaj kusutamu maad mu dichap dia Rubing dia jurnal umwing. Jurnal winou walejana kachom pa kachom piur pa yitiyij yetu, ukadivar wetu, kupan kwa invitation, ni chitentam. Chisu mwin kulejan umwing walejana diladikij ku chikumbu chimwing, mwin chikumbu wa mukaturij wamwel anch: “Mwawiy. Nading nikat kutang piur pa chinech mu jurnal!” Mwin chikumbu mukwau walonda anch: “Nading nikat kutang milong yen, katat washikany kal pinap! Ov, dined diawiy diladikij diam?” Ni kuwejinaku kand anch: “Chidi chom chiwamp nakash kudi Atuman a Yehova kusal mwamu.”
3 Antu avud asangeridina eza ku jindond ja chitentam nich diladikij diau ku chikas. Antu amwing asangeridina adiokala ku misumb ya kulemp mulong wa kwez kukumangan ku chitentam. Usu ukash twasadina chakwel kuyitazuk antu akwau wakwasha chakwel antu ikalaku avud, chilakej mwin ngand yimwing uvud wa antu 27 pa chitot eza ku chitentam kupandakanamu muvu wasutina.
4 Kupwish Teritwar: Ukutwishany kusambish kwangan mapaper ma diladikij mbing jisatu kurutu kwa kusambish chitentam chen. Chifanyidin kusal usu wawonsu chakwel kupwish teritwar mwawonsu wa chikumangen. Mu yikumangen yikweta materitwar majim nakash, in kulejan akutwish kusha nich kubabal diladikij ku yikumbu kwakad antu pa rubing ra nsudiel kurutu kwa chitentam. Chikumangen chifanyidin kusal usu wa kwangan mapaper mawonsu ma diladikij ni kupwish teritwar anch chitwishikin. Mapaper ma diladikij ma pa mutu akutwish kumasadil kudi ayibol adia mu chikumangen.
5 Yiukutwisha Kulond: Ukutwish kulond mwamu: “Tukat kusal usu wawonsu chakwel kwangan diladikij dined mulong wa chinship cha usey chikeza kusadik. Ndiy kopi wey. Ukez kutan mutapu ulejenau kachom pa kachom mu diladikij dined.” Sal anch minsamb yikala yiswimp mulong wa kupan diladikij kudi antu avud. Chakin kamu, anch mwin chikumbu ukwet yipul, itekina chisu cha kuyakul. Anch antu asangeridin, fund majin mau ni yichirikina muntu ni muntu panrend anch chitwishikin.
6 Chidi kamu chom cha usey mudi ik anch twa sal usu wa kumulondul Kristu! (Yohan 3:36) Chitentam chetu cha distrik chezina kurutu oku chikez kuyikwash antu awonsu akeza kusal mwamu. Chakin kamu tukutwish kuchingejin anch uman umwing ukash akez kuupan mulong wa usu winou ukash tukeza kusal wa kulejan Chitentam cha Distrik “Mulondulany Kristu!”. Pakwez, ikal nich mushiku wakutazuk antu avud nakash anch chitwishikin chakwel akumangana. Yiyukish yikash ya Yehova yikala amboku piur pa usu usadina amwiney piukata kwinung mu kusal mudimu winou ukash usadinau mu umwing.