Mutapu wa Kupan Uman Kusutil ku Kusadil Kachom ka Kwendish Kakweta Ndond ya Kutek Mikand (Présentoir mobile)

Kupan uman nich tebur utenchikinau nawamp ka chom kwendish kakweta ndond ya kutek mikand udi mutapu uwamp wa kuyipwit antu akweta michim yiwamp ku uyakin. (Yoh. 6:44) Chawiy lel, amakurump ayikasikesha kutenchik uman wa patok mu jindond ja teritwar wa chikumangen mudia antu avud. Mulong ka tebur kinak kadiap ka kutek ching kusu pa ndond yimwing, chawiy lel, yisu yivud chitiningap kwit mbil kudi anyikel mulong wa kukashemunin. Ov, anany afanyidina kusal mudimu winou? In kulejan amekeshina njingunin muwamp, akweta kalimish, ni ija mutapu wa kwambamb nawamp. Yom yimwing ya kusadil ni ya kwipuk yilondwilaku ey yikuyikwash in kulejan chakwel ikala nich yibudikin yiwamp.

Yom ya kusadil:

Chifanyidin kumekesh urund, kuyak ni kuyikwash antu asutina. In kulejan amwing apanining moy wa urund, wa chirungul, ni kusip kwakin. Anch muntu kanang utadin pa tebur pasutinay, ukutwish kumulej anch, “Ukutwish kusend mukand usotina.”
Ufanyidin kwikal piswimp ni tebur winou. Mu jindond jimwing in kulejan ayifuvu amana anch chiwapining kwikal piswimp ni tebur winou. In kulejan akwau aman anch mulad winou usadining anch antu asutina idjidjeka kwiman ku tebur, chawiy lel akwata mupak wa kwikalaku palemp ni kuchingel djat pakwezay muntu ku tebur winou. Anch muntu wasej kapamp kamwing ku tebur winou, apakishin kwisamb nend, pamwing ap akutwish kumwipul anch “Ov, watonginap kal pa chipul chinech?”
Sadil Bibil anch chitwishikin.
Muleja muntu usendina mukand umwing wa kwilej nich mudi buku Chifundishinay Bibil, piur pa mutapu usadikininga dilejan dia Bibil. Muleja video Ov, Mulong wak Kwilej Bibil? udia mu telefon wey.
Fund adres wa muntu wamekesha musangar anch chitwishikin. Anch muntu winou kadiap wa mu teritwar wen, izwish fomu Suivre l’intêret (S-43), ni mupana kudi kalam wa ujindj pakad kulab.