Ilejina Kudi in Kulejan Akweta Ukaliweny Uvud

Tuyisangaredining chakin kamu in kulejan akweta ukaliweny uvud wa kulejan adia mu chikumangen. Amwing pakach pau amusadidin kal Yehova nich kushinshaman mu mivu yivud. Akwau atambula pamwing ap ukaliweny uwamp wa kulejan katat kamu ak. In kulejan inay amana mutapu ik watakelay Yesu chikumangen cha win Kristu mu machuku minam mansudiel kusutil ku kupalangesh mudimu wa kulejan ni wa kuyikadish in kwilej. (Mat. 28:19, 20) Mu kwipan mu mudimu winou wa kulejan, atambula “ukash upandakena ukash wawonsu” parishau ni yikokujol ni yoziu ya pakampwil. (2 Kor. 4:7) Kudi yom yivud tukutwisha kwilej kudi in kulejan inay akweta ukaliweny uvud wa kulejan. Anch akwet chisu, asangaredining kuyilej antu akwau yom yilejau. (Kus. 71:18) Chawiy tufanyidina kwitekin yisu ya kwilejin kudi awiy. Ov, mutapu ik tukutwisha kusal mwamu?

Mu Mudimu wa Kulejan. Chakwel twikala ni yibudikin yiwamp mu mudimu wa kulejan, in kulejan asu ap akweta ukaliweny awonsu afanyidin kuyifumb. Asu akutwish kwilej yom yivud pamenau mutapu uwanyishinau in kulejan akweta ukaliweny mudimu wau wa kulejan. (Tal mutu wa mulong “[Garde ton zèle pour le ministère] Lam Mushiku Wey mu Mudimu wa Kulejan, udia mu Chinong cha Kalam cha Kasan 15, 2015,” mu Français, paragraf wa kasatu udia mu ka mutu ka mulong kalondina anch: “Aide les moins expérimentés.”) Ov, mutapu ik wataninamu kusutil ku kusal pamwing ni in kulejan akweta ukaliweny mu mudimu wa kulejan?

Ov, ukutwish kumutazuk mwin kulejan ukweta ukaliweny uvud chakwel asala ney mu mudimu wa kulejan? Anch mwin kulejan udi chilim, ukutwish pamwing ap kutakel malejan mey ma Bibil kwol kwend. Kupwa kwa kwilej, mwipula mwin kulejan winou yamanangay, ni mwita chiyul.

Sal Nau Pamwing Mudimu wa Kulejan: Sal usu wa kuyijik in kulejan akweta ukaliweny uvud mu kusal nau pamwing. Mwita umwing pakach pau eza ku difukwil diey dia mu dijuku ni mwipula yom yamanay. Anch mwin kulejan udi chilim, tenchik yom chakwel usala nend difukwil dia mu dijuku kwol kwend. Mwipula akuleja mutapu ik wajinguninay uyakin. Ov, yiyukish ik yatanay? Ov, kuya kurutu ik kwamanay mu chikumangen? Ov, musangar ik watanay mu kumusadin Yehova?

Ikal mwin kutesh ni wisikena mu yom umuchingedina. Pitudia in kulejan kushalijan alabina kal, muntu ni muntu pakach petu ukweting yipan yishalijadina mu mudimu wa kulejan. (Rom 12:6-8) Amwing apamina kal, ni chinech chikutwish kuyikangesh kusutish chisu chivud netu. Pakwez, tukutwish kwilejin kudi awiy yom yivud mulong wa ukaliweny wau wa kumusadil Yehova ni kushinshaman.