Antu Akata Kumuziyil Nzamb Awiy Ayukishiningau

Muprofet Moses walonda anch, ang twaziyil yijil ya Nzamb, tukez kutambul yiyukish yend. (Kuvurik Yijil 10:13; 11:27) Tukatap kumuziyil Nzamb mulong twoviling wom wa kutupup. Mikadil yiwamp ya Nzamb yitukwashining kumuziyil mulong tumukatining ni tukisining kusal yom yikutwisha kumunenganesh. ‘Anch chakin, tumukatil Nzamb, tuziyidil kand ku yijil yend.’​—1 Yohan 5:3.

Yiyukish ik tukutambula anch twamuziyil Nzamb? El tushinshikinany yiyukish yaad tukutwisha kutambul.

1. ANCH TWAMUZIYIL NZAMB TUKWIKAL NICH MANANGU

“Yam [Yehova] Nzamb wen, nikata kukulejany mulong wa kukukwashany, ni kukulejany njil yiufanyidinanya kuya.”​—ISAY 48:17.

Yehova Nzamb, Sakatang wetu utwij nawamp ni utwinkining umutakel tukweta nich kuswir. Anch tukatin anch Nzamb atukwasha kukwat mipak ya manangu, tufanyidin kwilej yom yikatinay Nzamb yidia mu Mifund Yitumbila ni kuyisadin mu mwom wetu.

2. ANCH TWAMUZIYIL NZAMB TUKWIKAL NICH MUSANGAR

“Ayuk kwau antu akata kutesh dizu dia Nzamb ni [kudilam]!”​—LUKA 11:28.

Nlel unou, mamiliyon ma antu makata kuziyil ku Dizu dia Nzamb makwet musangar wakin. El amboku tushinshikinany, chilakej cha ikundj umwing udia mu Espany wading mwin ujim nakash wayisadinanga antu akwau—ni mukajend win, nich chisum. Dichuku dimwing watanga rusangu rafunday muprofet Moses piur pa Josef, mwan ikundj wenday Jakob. Rusangu riner rading risambidin piur mwikadil wa kwitudish wa Joseph. Josef amulandisha mu uswik ni amuteka mu rukan pakad mulong, pakwez witudisha ni wikala mwin chisambu ni mwin kulikishin. (Disambishil, shapitre 37-45) Ikundj winou wa mu Espany walonda anch: “Chilakej cha Josef chankwasha nakash kukudish mwikadil wa kwitudish, kudimuk ni kwilam. Mudi chibudikin, katat nisangaredin mwom uwamp.”

Mifund Yitumbila yitwinkin umutakel piur pa mutapu tufanyidina kuyisadin antu akwau. Tukushinshikin yom yikwau yijim yidia mu mutu wa mulong ulondwilaku ou.