Yipul ya in Kutang

Muntu wafunda Jinswir 30:18, 19 walonda anch “njil yilondwilay ikundj nend changadim” yid yom ‘yakaday kwijik.’ Ov, yom ik yakimbay kulond?

Chiyikasikedining antu avud kwov kurumburik kwa mazu minam, ap antu ija yom yivud piur pa Bibil. Verse wa kabuj ulondin anch: “Kudi yom yisatu yakushimok yipandikenamu kudi am, komb yidi kwau yinying yinakad kwijik: Njil yisutidina mbur pa ruzwizu ni njil yisutidilay nnak pa diyal, ni njil yisutidila wat piur pa karung, ni njil yilondwilay ikundj nend changadim.”​—Jnsw. 30:18, 19.

Kwinsambishin twatongang anch mazu “njil yilondwilay ikundj nend changadim” mading mamekeshin yom yiyimp. Mulong wak? Mulong maverse makwau mada mu shapitre winou misambidin yom yiyimp yakading kulond anch ‘kwawanyin kal.’ (Jnsw. 30:15, 16) Ni verse 20 wisambidin piur pa “mband wimikina dis” ulondina anch kasadinap kwend yom yiyimp. Chawiy mud mutapu mbur utwikina mwiur, nnak usutidina pa diyal, ap waat wa pakur usutidina pa karung yikushangap chijingidij, twatongang anch muntu ukutwish kusal yom pakad kusha chijingidij. Kukwatijan ni chitongijok chinech, twateshang anch mazu “njil yilondwilay ikundj nend changadim” mading mamekeshin yom yiyimp, charumburik anch nsand umudimbina changadim chakwel asal nend masandj.

Pakwez tukwet mayingishin ma kulond anch maverse minam misambidin yom yiwamp. Muntu wafunda mukand winou wading wisambidin kwend yom yiwamp yading yimushimwokishina.

Mamaniskri ma mu Hebereu ni mawiy mamekeshin anch maverse minam misambidin yom yiwamp. Kukwatijan ni buku Theological Lexicon of the Old Testament, dizu da Hebereu dikarumwinau mu Jinswir 30:18 anch “yinakad kwijik” “dimekeshin yom yimushimwokishina muntu, yakaday kutwish kutesh nawamp, ap yisangareshina nakash.”

Mulej Crawford Howell Toy wa ku Iniversite wa Harvard mu États-Unis warumburila anch maverse minam misambidinap yom yiyimp. Walonda anch: “Chitongijok chid cha kumekesh mutapu ushimwokishena yom yijimbwilawamu.”

Chawiy chovaken kutong anch mazu malejenau mu Jinswir 30:18, 19 mamekeshin yom yisangareshina chakin kamu ni yikasikena pamwing ap kwov kurumburik. Mud muntu wafunda Bibil, chitusangareshining kamu niyetu kuman mutapu utwikinay mbur mwiur, mutapu wendiningay nnak pa diyal ap anch kakwetap mend, mutapu waat ulimina ukata kusutin pa karung, ni mutapu ukutwishay nsand ni changadim kukatijan nakash ni kushakam pamwing mu musangar.