“Ud wa Usey Nakash!”

1-2. Yom ik yikutwisha kutukwash kwijik anch tud a usey ku mes ma Yehova?

ATUSHALAPOL a Yehova ad a usey nakash ku mes mend, pakwez amwing pakach pau akat kwiyov anch Yehova kayikatinap kwend. Chid mwamu pamwing ap mulong muntu kampand wayisadina yom yimekeshina anch kakwetap kamu usey. Ov, niyey chakushikenap kal? Anch mwawiy, mutapu ik ukutwisha kushiken kwikal ni kashinsh anch Yehova ukukatin?

² Ukutwish kutaninamu nakash anch washinshikin nsang ja mu Bibil jimekeshina chitongijok cha Yehova piur pa antwend. Mwanend Yesu, wayilimishang antu ni wayimanang anch akwet usey. Kusutin kusal mwamu, wamekesha anch ndiy ni Tatutwend ayikwatin nich usey nakash antu akata kwiyov anch kakwetap kwau usey. (Yoh. 5:19; Heb. 1:3) Mu mutu wa mulong winou, tukushinshikin: (1) mutapu Yesu wayikwashay antu kwijik anch ad a usey ni (2) mutapu tukutwisha ayinetu kwikal ni kashinsh anch tud a usey ku mes ma Nzamb.​—Age 2:7.

MUTAPU YESU WAYIKWASHAY ANTU KWIJIK ANCH AD A USEY

3. Yesu wayisadina mutapu ik In Galaliya ading amukimbina mulong wa kuyikwash?

³ Palejanangay Yesu mu Galaliya, antu avud ezang kumutesh ni kuyok. Yesu wamana anch “ading aziyin ni kujiljil mud amikoku akad kafung.” (Mat. 9:36.) Antakel au a chirelijon ayimanang mud antu akad kwijik yom ni ayitazukang anch “antu ayindamishinau kal.” (Yoh. 7:47-49) Pakwez Yesu wayikwatang nich usey ni witekinang chisu cha kuyok. (Mat. 9:35) Chikwau kand, mulong wa kuyikwash antu avud, Yesu wayifumba antwimbuy end mulong wa kulejan ni wayinkisha ulabu wa kwok ayej ni ayilim.​—Mat. 10:5-8.

4. Yom ik twilejina piur pa mutapu wayibanginay Yesu antu ikepishina ading akatina kutesh mafundish mend?

⁴ Kusutin kuyisadin antu ading amuteshina mu mutapu uwamp ni kalimish, Yesu wamekesha anch ndiy ni Tatukwend ading ayikwatin nich usey antu ading aduburilau kud antu avud. Anch umusadidin Yehova pakwez ukwetap kashinsh anch ukukwatin nich usey, tongin pa chilakej cha Yesu, mutapu wayibanginay antu ikepishina ading akatina kutesh mafundish mend. Kusal mwamu kukutwish kukukwash kwijik anch Yehova ukukwatin nich usey.

5. Rumburil mutapu wading mwom wa mband Mwin Galaliya wokay Yesu.

⁵ Yesu wayifundishang antu mu ruvudin, pakwez wading kand uyibangidin. Chilakej, mu mudimu wend wa kulejan mu Galaliya, Yesu wamutana mband umwing wading uyedina rulong ra mash kudosh mivu 12. (Mar. 5:25) Mulong mayej mend mamwikadisha wijondila, chawiy muntu mwawonsu wafanyina kumukwat niyend wela kwikal wijondila. Kafanyinangap kand kwibomb ni antu akwau. Chikwau kand, kafanyinap kwibomb ni antu ku misambu ni difukwil da antu awonsu. (Lev. 15:19, 25) Pakad kwidjidjek, mband winou wading umen mar ku mujimbu ni mu manang.​—Mar. 5:26.

6. Mutapu ik wayerikay mband wading ni mayej ma rulong ra mash?

⁶ Mband winou wading kamu umen mar nakash ni wading ukimbin anch Yesu amwoka. Pakwez kamusejinap Yesu kapamp kamwing. Mulong wak? Pamwing ap wova usany ni kutong anch akumuduburil. Ap kand watonga anch Yesu ukumwiyep mulong wez kal mukach mwa antu oku ndiy wijondil. Chawiy wakwata kusu ku rizez ra disun dend, ni kashinsh anch ang wasal mwamu ukutwish kuyerik. (Marko 5:27, 28) Ritiy rend ramukwasha—disuden wayerika. Chawiy Yesu wipula anch nany wankwata kal, ni mband winou witiyina anch ndiy wamukwata. Yesu wasala nchik pijikay?

7. Yesu wamukwasha nchik mband wading uyedina? (Marko 5:34)

⁷ Yesu wamukwasha mband winou mu mutapu uwamp ni wa kalimish. Wajingunina anch wading ukat “kuzalizal nich wom.” (Mar. 5:33) Yesu watesha mutapu wiyovilay, chawiy wamukasikesha. Wamutazuka kand anch “Mwanam mband”​—mazu mamekeshina anch kadingap kimedina kusu pa kumulimish, pakwez wading umukatin. (Tang Marko 5:34.) “Yiney yawiy kwau ndond yimwing kusu yilejenau mu Bibil ang Yesu wamutazuka muntu mband anch ‘mwanam mband.’ Wasadina dizu dined pinap mulong wamana kamu anch mband winou wading wovil wom.” Mband winou wiyova kamu nawamp nakash! Kusutin yom yalonday Yesu, wamukasikesha mband winou. Chawiy kovap usany ap kwifish nich mulong waya mu rumb ra antu ni kukwat ku rizez ra disun dend. Yesu wamukwasha kand kuman anch wading mwan mband ukweta usey ku mes ma Tatukwend wa mwiur ukweta rukat.

8. Yikokujol ik yarishay nich nambaz umwing wa mu Brezil?

⁸ Nlel atushalapol a Nzamb akat kurish ni mayej makata kuyiziyish ni kusal iyova anch kakwetap usey. Maria, chibol wa rawonsu uda mu Brezil, wavadika pakad mend ni chikas cha kamaku. Urumburil anch: “Kushikol anzengolang nakash mulong wa ulim wam. Ambay nam ampilolang majin mansalang nayimp. Ap mu dijuku dam yisu yimwing ansadinang yom yimekeshina anch nikwetap usey.”a

9. Mutapu ik wamukwashau Maria kuman anch ukwet usey ku mes ma Yehova?

⁹ Mutapu ik wamukwashau Maria? Pikalay Kaman wa Yehova, ambay nend In Kristu amukasikesha ni amukwasha kwiman amwinend mud mumumenau kud Yehova. Ulondin anch: “Ang nel anch nifunda dijin da muntu win mwawonsu wankwasha, kaye wam ukukep! Nimujikitishin Yehova ni muchim wam wawonsu mulong wangikishin dijuku da mu spiritu disangareshina nakash.” Akadivar nau anambaz amukwasha Maria kwiyov anch ukwet usey ku mes ma Nzamb.

10. Yikokujol ik yikwau yading yirishinay nich Mariy Mandalen? (Tal kand yipich.)

¹⁰ Shinshikin muntu mukwau wakwashau kud Yesu—Mariy Mandalen. Wading ukwet ayilembil sambwad! (Luka 8:2) Wasalang pamwing ap yom yiyimp mulong wa ayilembil inay, mud chibudikin, amwiyepang kud antu akwau. Mu chirung chinicha chikash cha mwom wend, wafanyina kwiyov anch kwikil umubanginaku, kadap mu diking, ni kakwetap mwin kumukwash. Chimeken anch Yesu wayopata ayilembil amumeshang mband winou mar ni wikala mwin kwilej wend. Mutapu ik ukwau wamukwashau Mariy Mandalen kud Yesu kwiyov anch ukwet usey ku mes ma Nzamb?

11. Yesu wamukwasha Mariy Mandalen mutapu ik kuman anch wading ukwet usey ku mes ma Nzamb? (Tal kand yipich)

¹¹ Yesu wamwita Mariy Mandalen kumutwalaku mu mudimu wend wa kulejan.b Mud chibudikin, wadandamena kutaninamu pamuteshangay Yesu ukat kuyifundish antu akwau. Dichuku davumbukay Yesu, wamubudikina kand Mariy Mandalen. Wading pakach pa in kwilej a kusambish ambamba ni Yesu dichuku dinida. Yesu wamwinkisha kand chisend cha kuyilej atwimbuy end anch wavumbukang kal. Winou ud chakin kamu uman umekeshina anch wading ukwet usey ku mes ma Yehova!​—Yoh. 20:11-18.

12. Rumburil mulong wak mutapu wamulilau Lidia wamubachika kutong anch amudjubwil.

¹² Mud pamwing ap mwiyovay Mariy Mandalen, nlel antu avud iyovil anch ayidjubwil. Nambaz Lidia, uda mu Espany ulondin anch kurutu kwa kumuval, makwend wakimba kudosh madikaj. Ap padingay uchid mwanikanch nakash, makwend kamubanginangap ni wamulondang yom yikash. Ulondin anch: “Mulong maku kanmekeshinap rukat mu mwom wam, chawiy nading nisotin anch antu akwau ankat ni kwikal arunam. Nadingap nitongina anch akutwish kamu kwinkat, mulong maku wangikisha kashinsh anch nading muntu muyimp.”

13. Yom ik yamukwasha Lidia kwiyov anch ukwet usey ku mes ma Yehova?

¹³ Kupwa kwa Lidia kwilej uyakin, malembil, dilejan da pakampwil, mazu ni yisal ya rukat ya ambay nend In Kristu yamukwasha kwiyov anch ud wa usey ku mes ma Yehova. Ulondin anch: “Yisu yivud nfumwam ukat kwinlej anch winkatin nakash. Tupamp tuvud, ukat kwinvurish mikadil yam yiwamp. Mwamu mukatau kand kusal arunam akatish.” Ov, wij muntu ukweta kuswir kwa kwikal ni kashinsh ka kwiyov anch ukwet usey ku mes ma Yehova?

MUTAPU TUKUTWISHA KWIMAN AYINETU MUD MUTUMENAY YEHOVA

14. 1 Samwel 16:7 utukwashin nchik kuman mutapu Yehova uyimenay antu? (Tal kand mushet “Mulong Wak Yehova Uyikwatin Atushalapol End Nich Usey?”)

¹⁴ Vurik anch Yehova kakumenap mud mukumenau antu akwau mu mangand. (Tang 1 Samwel 16:7.) Usey ukukwatinay nich wimedinap pa mutapu umekena, ndond ukweta mu mangand, ap mashikol wileja. (Isay 55:8, 9) Chawiy, imana amwiney mud mukumenay Yehova pa ndond pa kwiman mud mukumenau antu akwau mu mangand. Chid cha usey kutang nsang jimwing jida mu Bibil jimekeshina mutapu Yehova wayikwatay nich usey antu ading idjidjekina mud Eliya, Nawom ni Ana. Ukutwish kufund yom yakushikena mu mwom wey yimekeshina anch Yehova ukukatin kamu ni ukukwatin nich usey. Chikwau kand, ukutwish kutan nsang jivud mu mikand yetu piur pa mitu ya milong yimekeshina anch ud wa usey.c

15. Mulong wak Yehova wamumana Daniel mud muntu “wa usey nakash”? (Daniel 9:23, NWT)

¹⁵ Vurik anch kushinshaman kwey kwawiy kukwikadishina wa usey ku mes ma Yehova. Chisu chimwing, padingay ni mivu 90, muprofet Daniel ‘waziya nakash.’ (Dan. 9:20, 21) Yehova wamukasikesha mutapu ik? Nzamb wamutuma mwangel Gabriyel kumuvurish Daniel anch wading “wa usey nakash” ni anch watesha malembil mend. (Tang Daniel 9:23, NWT.) Yom ik yamukwasha Daniel kwikal wa usey ku mes ma Nzamb? Yid mikadil yiwamp yadingay nich, mud rukat ra yom yitentamina, ni kushinshaman kwend. (Ezek. 14:14) Yehova wafundikisha rusang riner mu Dizu dend mulong wa kutukasikesh nich. (Rom 15:4) Yehova ukat kutesh malembil mey ni ukwatin nich usey rukat rey mulong wa yom yitentamina ni mudimu wey umusadidina nich kushinshaman.​—Mike 6:8; Heb. 6:10.

16. Yom ik yikutwisha kukukwash kumuman Yehova mud Tatuku wa rukat?

¹⁶ Mumana Yehova mud Tatuku ukukatina ey. Ukatin kukukwash, pakwez kakatap kushinshikin pa kurumbok kwey. (Kus. 130:3; Mat. 7:11; Luka 12:6, 7) Kutongijokin pa uyakin winou kwayikwashin kal antu avud ading amena anch kakwetap usey. Shinshikin chilakej cha nambaz Michelle uda mu Espany wading wiyovila anch amudjibwil ni kakwetap usey mulong amulondang yom yiyimp kud nfumwend mu mivu yivud. Urumburil anch: “Paniyovang anch nikwetap usey, napimang kutongijokin mud Yehova winchidijin mu makas mend nich rukat.” (Kus. 28:9) Nambaz Lauren uda mu Afrik wa Kurul ukat kuvurik yisu yivud anch: “Ang Yehova wampwitina kud ndiy nich mwoj wa rukat, wata urund ni yamam mu mivu yiney yawonsu ni wansadina mulong wa kuyifundish antu akwau, komb winkwatin kamu nich usey nakash.”​—Oz. 11:4.

17. Yom ik yikutwisha kukwinkish kashinsh anch ukwet dilau da Yehova? (Kuseng 5:12) (Tal kand chipich)

¹⁷ Ikal nich kashinsh anch ukwet dilau da Yehova. (Tang Kuseng 5:12.) David wafanakesha dilau da Yehova ni “musangar wakin” ukata kuyichidij antu atentamina. Kwijik anch niyey ukwet dilau da Yehova ni ukwash wend, kukutwish kukukwash kulik kwidjidjek nakash. Mutapu ik ukutwisha kwijik anch ukwet dilau da Yehova? Mud twamana kal, Yehova ukwinkishin kashinsh kinak kusutin Dizu dend. Ukat kusadin kand amakurump a chikumangen, arund a piswimp, ni antu akwau mulong wa kukuvurish anch ukwet usey ku mes mend. Mutapu ik ukutwisha kwiyov pantaliken ni kukasikesh kwinoku?

18. Mulong wak chid cha usey kwitiy mazu ma kushimek ma antu akwau?

¹⁸ Kangal wadiburil mazu ma kushimek ma antu akukatina ni akwija nawamp. Vurik anch Yehova ukutwish kuyisadin mulong wa kukukwash kwikal ni kashinsh anch ukwet dilau dend. Michelle, wajimbulangau kwinsambishin ulondin anch: “Pakemp pakemp, nikat kwilej kwitiy mu muchim wam mazu ma mawamp ma antu akwau. Chiswapelap kamu, pakwez nij anch yawiy yikatinay Yehova anch nisal.” Michelle wataninamu kand kusutin ukwash wa rukat ramumekeshinau kud amakurump a chikumangen. Katat ud chibol wa rawonsu ni mwin kukwash wa palemp ku Betel.

19. Mulong wak ufanyidina kwikal ni kashinsh anch ud wa usey ku mes ma Yehova?

¹⁹ Yesu watuvurisha nich rukat anch Tatukwetu wa mwiur utukwatin nich usey nakash. (Luka 12:24) Chawiy, tukutwish kwikal ni kashinsh anch Yehova utukwatin nich usey. Tufanyidinap kuvuramen chom chinech! Ni tufanyidin kand kusal yawonsu tukutwisha mulong wa kuyikwash antu akwau kwikal ni kashinsh anch ad a usey ku mes ma Yehova!