Nzamb Ukweting Majin Minch?

Chakul cha Bibil

Nzamb ukweting kwend dijin dimwing. Dijin dined adifundin mu Hebereu anch יהוה ni adikarumwin mu Uruund anch “Yehova.”a Kusutil muprofet wend Isay, Nzamb walonda anch: “Am nid Yehova. Dined diawiy dijin diam.” (Isay 42:8, NWT) Dijin dined did tupamp piswimp 7 000 mu maniskri makur ma Bibil—tupamp tuvud nakash kusutamu maz yin yawonsu yikwetay Nzamb ap majin ma antu.b

Ov, Yehova ukweting majin makwau?

Ap anch Bibil ulondin anch Nzamb ukweting kwend dijin dimwing, yisu yimwing ukat kusadin maz yivud ni yijiken mulong wa kumurumburil. List udia kwinshin oku ulejen maz yimwing ni yijiken yimekeshina mutapu udingany Yehova ni mikadil yend.

Mwaz	Verse wa Bibil	Kurumburik
Allah	(Kwamwamu)	Dizu dia Arab “Allah” didiap dijin dia pakampwil, pakwez chid chijiken chirumburikina anch “Nzamb.” Ma Bibil ma mu Arab ni ma mazu makwau makat kusadin dizu “Allah” mulong wa kukarumun dizu “Nzamb.”
Mwin Dikand Diawonsu	Disambishil 17:1	Ukwet usu wakad mimbu. Dizu dia Hebereu ʼEl Shad·daiʹ, “Nzamb Mwin Dikand Diawonsu,” did mu Bibil tupamp sambwad.
Wa mivu ni minang	Daniel 7:9, 13, 22	Wakad disambishil; udingaku kwend mivu yin yawonsu kurutu kwa antu ap chom chin chawonsu kwikalaku.—Kuseng 90:2.
Sakatang	Mulej 12:1	Ndiy watanga yom yin yawonsu.
Tatuku	Mateu 6:9	Ndiy mwin kupan mwom.
Nzamb	Disambishil 1:1	Chom chikatau antu kwifukwil; chikweta usu nakash. Dizu dia Hebereu ʼElo·himʹ did ku uvud, ni dimekeshin kujimb, katumb ni uyaj wa Yehova.
Nzamb wa anzamb	Kuseng 136:2, Testament Musu ni Kuseng	Nzamb wa piur nakash ushalijadina kulemp nakash ni ‘anzamb a chamwamu’ ifukwidinau antu amwing.—Isay 2:8.
Mulej	Isay 30:20, 21	Ndiy ukata kutufundish mulong wa uwamp wetu ni kututakel.—Isay 48:17, 18.
Ukata kutesh kulembil	Kuseng 65:2	Ndiy amwinend ukata kutesh malembil ma muntu ni muntu umulembila nich ritiy.
Am Nidi Mudi Nidia	Kubudik 3:14	Ukwikal chawonsu chiswirikedinay mulong wa kuwanyish rusot rend. Mazu minam amakarumuna kand anch “Nikwikal Chawonsu Chinsangareshina [Kwikal]” ap “Nikwikal Chinitondina Kwikal.” (The Emphasised Bible, wa J. B. Rotherham; Traduction du monde nouveau) Kurumburil kwinoku kutukwashin kutesh chirumburikina dijin Yehova, didia mu verse wambakedinap ap anch adidiosha mu Bibil wa Uruund ni mu ma Bibil makwau kand mu verse winou.—Kubudik 3:15.
Mukau	Kubudik 34:14	Kakukatangap antu amwifukwila ndiy oku akat kwifukwil anzamb akwau. Dizu dined akutwish kudikarumun kand anch “witin antu alamat ching kud ndiy.”—Traduction du monde nouveau.
Mwant wa chikupu	1 Timote 1:17	Winyikel wend ud wakad disambishil ni wakad disudiel.
Nsalejetu	Kuseng 135:5	Mwin yom ap mwant; Mazu ma Hebereu mad ʼA·dhohnʹ ni ʼAdho·nimʹ.
Mwant wa yisak	Rom 9:29, Testament Musu ni Kuseng	Ukat kutakel yisak yijim nakash ya angel.
Upandakena Piur pa yawonsu	Kuseng 47:3; Daniel 7:18, 27	Ndiy ukweta ndond ya piur nakash, ud Mukaleng wa piur nakash.
Utumbila	Jinswir 9:10	Ndiy utumbila mu yom yawonsu, kusutamu muntu ap chom chin chawonsu.
Muumb	Isay 64:7	Ukwet ulabu padiau antu ni michid, mud mutapu ukwetay mwin kuumb usu pa kam wend.—Rom 9:20, 21.
Dipat	Kuseng 18:3, 47	Ndond ya kwikangin ni musul wa dipandish.
Mupandish	Titus 2:10	Ukat kupandishan ku ubaj ap ku kusheshik.
Kafung	Kuseng 23:1	Ukat kuyibangin in kumwifukwil end.

Mayingishin ma kwijik ni ma kusadin dijin dia Nzamb

Nzamb ukwatin nich usey nakash dijin diend, Yehova, mulong wadifundikisha mu Bibil tupamp tuvud nakash.—Malakiy 1:11.
Yesu, Mwan a Nzamb, wamekesha tupamp tuvud usey wa dijin dia Nzamb. Chilakej, wamulembila Yehova anch: “Dijin diey aditumbish.”—Mateu 6:9; Yohan 17:6.
Antu ashikedina kwijik ni kusadin dijin dia Nzamb akat kusal rizau ra kusambish mulong wa kwikal ni urund wa piswimp nend Yehova. (Kuseng 9:10; Malakiy 3:16) Urund mud winou ukat kuyikwash kutaninamu mu kushilamu kulondina anch: ‘Am nikumupandish muntu winkatila am, nikumuchidij mulong wij dijin diam.’—Kuseng 91:14.
Bibil ulondin anch: “Ap anch kud atazukinau anch ‘anzamb,’ ikala mwiur ap pansh, chilik chimwing kud kand ‘ansalej’ avud.” (1 Korint 8:5, 6) Pakwez, ulejen kwend anch kud Nzamb umwing wakin ni dijin diend Yehova.—Kuseng 83:18.

a In kwilej milong ya Bibil amwing in Hebereu akatang kukarumun dijin dia Nzamb anch “Yahweh.”

b “Yah” ud mutapu umwing wa kufund mu wiswimp dijin dia Nzamb ni aufundin mu Bibil. Mutapu winou wa kufund ud kand mu dizu “Aleluya,” dirumburikina anch ‘Mushimanany Yah.’—Kujingunik 19:1; Testament Musu ni Kuseng.