YIPUL YIKATAU ANSAND KWIYIPUL
Mutapu ik Ukutwishay Bibil Kwinkwash?—Chikunku cha 1: Mwijika Nawamp Bibil Wey
“Napakisha kutang Bibil, pakwez naziya kwam mulong ud mujim nakash!”—Briana, ukweta mivu 15.
Ov, niyey mwamu muwiyovila? Mutu wa mulong winou ukutwish kukukwash!
Mulong wak chid cha usey kutang Bibil?
Ov, chitongijok chin cha kutang kwau Bibil chikat kukuziyishang? Anch mwawiy, choviken kwau. Pamwing ap ey umen anch Bibil ud buku mujim nakash ukweta tunan twa mapaj, uburedina yipich ni amufundin mu tumamuny tukemp tukemp—kadiap mud televizion ap mavideo!
Pakwez tong bil pa chom ech: Tong bil anch wabudikin mushet umwing ukur ukweta mapit, ov, ukukatap kuufungul mulong wa kuman yom yidia mukach?
Bibil ud mud mushet winou ukweta mapit. Ukwet mapit mavud nakash ma manangu makutwisha kukukwash:
Kukwat mipak yiwamp
Kwovijan nawamp nau anvaj ey
Kwikal nau arund awamp
Kurish ni yakamish
Mutapu ik ukutwishay buku mukur mwamu kutukwash nlel? Chid mulong “mazu mawonsu ma mukand wa Nzamb madiokala ku spiritu wa Nzamb.” (2 Timote 3:16, TMK) Chinech chirumburikin anch yiyul yidia mu Bibil yidiokil ku Musul uwamp nakash.
Bibil ud mushet ukweta mapit ma usey ni ma manangu
Mutapu ik nifanyidina kutang Bibil?
Chakusambish: ukutwish kutang Bibil kudiosh kwisambishil djat kwinsudiel. Kusal mwamu kukukukwash kwikal ni chitongijok cha uruu wa Bibil. Kud mitapu yivud ya kutang Bibil. Shinshikin yilakej yaad:
Ukutwish kutang mabuku 66 ma Bibil mu mutapu malondulijadina, kusambish ku Disambishil kushik ku Kujingunik.
Ukutwish kutang Bibil mu kulondwish chisu chafundau mukand ni mukand—charumburik anch, kukwatijan ni mutapu walondulijana yom.
Chiyul: Chikunku 7 cha broshir Ukwash Mulong wa Kwilej Dizu dia Nzamb chilongin yinship yijim ya mwom wa Yesu panap pa divu kukwatijan ni chisu yasadika.
Cha kaad: ukutwish kutang rusangu rumwing ra mu Bibil rikwatijadina ni yakamish urishina nich. Chilakej:
Ov, ukatin kwikal ni arund a kuchingejin? Tang rusangu ra Jonatan nend David. (1 Samwel, shapitre wa 18-20) Kupwa sadin fish wa kutongijokin “Mutapu wa Kwikal ni Arund Ashinshamena” mulong wa kwilej malejan ma ukwash madia mu rusangu riner.
Ov, usotin kukasikesh mupak wey wa kujijamen yoziu? Tang rusangu rilejena mutapu wapandakanay Josef choziu. (Disambishil shapitre wa 39) Kupwa sadin mafish ma kutongijokin “Mutapu wa Kupandakan Choziu . . . Josef—Chikunku cha 1” ni “Amudimbena Makasu! Josef—Chikunku cha 2” mulong wa kwilej malejan ma ukwash madia mu rusangu riner.
Ov, usotin kwijik mutapu ukutwisha malembil kukukwash? Tang rusangu ra Nehemiy. (Nehemiy shapitre wa 2) Kupwa sadin fish wa kutongijokin “Nzamb Wakula ku Malembil Mend” mulong wa kwilej malejan ma ukwash madia mu rusangu riner.
Chiyul: Piutangina Bibil, shakam ndond yakad masok mulong wa kwipuk kampuw.
Cha kasatu: ukutwish kutond ni kutang rusangu rumwing ra mu Bibil ap chikunku cha Kuseng, kupwa tongijokin pa mutapu ukutwisha kusadin yom watanga kal. Kupwa kwa kutang, iyipula yipul mud:
Mulong wak Yehova wafundikisha rusangu riner mu Bibil?
Rinfudishin yom ik piur pa wuntu wa Yehova ap piur pa mutapu wend wa kusal yom?
Mutapu ik nikutwisha kusadin yom yiney mu mwom wam?
Chiyul: Itekina mupak! Fund dichuku dia ngond usotina kusambish kutang Bibil mu kusadin program udia pa kapend ketu.