Changadim umwing ukat kuwapish mutapu wend wa kutang Bibil mu kusadin mufund wa yirung, Bibil wa kwilej nich udia pa jw.org, kart, ni yipich yafatulangay kal

YIPUL YIKATAU ANSAND KWIYIPUL

Mutapu ik Ukutwishay Bibil Kwinkwash?—Chikunku cha 2: Yom Yikusala Anch Usanger Kutang Bibil

Nsand umwing utazukinau anch Will ulondin anch: “Ukutwish kuman anch kutang Bibil kuziyishen nakash anch wijap mutapu uwamp wa kumutang.”

Ov, ukatin kwijik yiyul kanang yikutwisha kukukwash chakwel usangera nakash kutang Bibil? Mutu wa mulong winou ukutwish kukukwash.

Man yom utangina mud yisadikin katat

Ipana nakash mu yom utangina. Ukutwish kusadin yom yilondwilaku ey:

Tond rusangu rumwing ra Bibil riusotina kwilej. Ukutwish kutond yom yimwing yasadika ap rusangu rumwing ridia mu Evanjil. Ukutwish kand kutond rusangu rumwing ridia mu madram ma kutang kwa Bibil madia pa jw.org.
Tang rusangu. Ukutwish kuritang amwiney, ap kuritang nich dizu dia piur nau arund ney ap anamakwey. Muntu umwing ukutwish kutang mazu ma mwin kurumburil ni akwau akutwish kutang mazu ma antu akwau isambidinau mu rusangu riner.
Sadin chiyul chimwing ap yivud pakach pa yiyul ey:
- Fatul yipich yirumburila rusangu riner. Ap fatul yipich yivud yilondulijadina mulong wa kurumburil nawamp yom yashikena. Wejaku ku yipich yiney mazu kanang marumburila yom yasadika.
- Fatul tujinseu. Chilakej, chisu utangina piur pa muntu umwing wading ushinshamena, kwatikesh mikadil ni yisal ya muntu winou ni yiyukish yatambulay.
- Karumun rusangu riner chakwel rikala mud yom yisadikina katat. Rumburil rusangu riner mu kutongin piur pa yom yivud ni sal mud ukat “kuyipul” antu ajimbwilau mu rusangu ni antu akwau imenap yom yiney.
- Anch muntu umwing pakach pa antu ajimbwilau mu rusangu riner wakwata mupak uyimp, tongin bil mud anch wasala yom yindj. Chilakej, tongin bil chisu chamutunau Yesu kud Pita. (Marko 14:66-72) Mutapu ik uwamp wafanyinay Pita kurish ni yom yamwelolau kud antu?
- Anch ukatining nakash kufund, ikasikesha kufund amwiney dram wimedina pa rusangu rumwing ra mu Bibil. Wejamu malejan kanang ukutwisha kwilejin kusutil rusangu riner.—Rom 15:4.
  
  Ukutwish kuman yom utangina mu Bibil mud yisadikin katat!

Kimbijol chikurikina!

Anch washinshikin tuyom tukemp tukemp, ukutwish kujingunin mapit majingamina madia mu rusangu. Yisu yimwing, dizu dimwing ap maad kwau madia mu rusangu ra Bibil makutwish kukufundish yom yivud nakash.

Chilakej, ilakej Mateu 28:7 ni Marko 16:7.

Mulong wak Marko wawejinaku anch Yesu ukumekan piswimp ap kud in kwilejend “ni Pita”?
Chitongijok: Marko kimenap amwinend yom yiney chisu chiyasadika; chimeken anch Pita ndiy wamuleja.
Dipit dijingamina: Mulong wak Pita wafanyina kwiyov nawamp pateshay anch Yesu usotin kand kumanijan nend? (Marko 14:66-72) Mutapu ik wamekeshay Yesu anch ud murund wakin wa Pita? Mutapu ik ukutwisha kumwimburij Yesu ni kwikal murund muwamp wa antu akwau?

Anch waman yom utangina mu Mifund mud yisadikin katat ni kukimbijol nakash tuyom tukemp tukemp, ukusanger nakash kamu kutang Bibil!

Yom yitonginau akwen

“Yisu yimwing nikat kutangang chapitre umwing ni kumushinshikin djat ni pinikumuteshina nawamp. Yisu yawonsu nikata kusal mwamu, nikat kujinguninang chom chisu ap kutesh nawamp chom nading nakad kuteshang nawamp. Chisu chawonsu yom yiney yikat kwinkashimwish nich musangar.”—Bonnie.

“Nileja buku wa Rut ni nasadina Watchtower Library mulong wa kukimbijol nakash chakwel nimutesha nawamp buku winou. Niyikasikeshin antu awonsu kusadin chom chinech cha kukimbijol nich. Chankwasha kujingunin anch kutang Bibil kukutwish kwikal kusangareshina nakash.”—Timothy.

“Nikatining nakash kutang Bibil mu ruvudin: Muntu ni muntu ukutwish kwikal ni chikunku cha kutang, ni tukat kutang rusangu ra mu Bibil mu mutapu ulongirikina nawamp. Nikat kusangerang kand kutesh Dram wa Bibil Wakwatau udia pa jw.org. Makat kwinkwash kuman anch yinship yidia mu Bibil yid yakin!”—Isabel.