Tukutwish Kupan Kudi Yehova
1 Ov, wij anch antu akutwish kupan chom kudi Nzamb? Abel, wamulambula Yehova nnam wend muwamp, ni Nowa ni Yob niyawiy alambula annam au awamp. (Dis. 4:4; 8:20; Yob. 1:5) Choviken, milambu mudi yiney kiyamupitishap Sakatang wetu ap pakemp, mulong ndiy ukwet kal yom yawonsu. Pakwez, milambu yiney yamekesha rukat rijim ni kushinshaman kwadingau nich antu inay pantaliken ni Nzamb. Nlel, tukutwish twasadil chisu chetu, usu wetu, ni mapit metu chakwel tumwinka Yehova “yakupesh ya kushiman.”—Heb. 13:15.
2 Chisu: Chiwapin nakash ‘kudiosh’ chisu chitukata kusutish ku yom yakad usey chakwel tusala nakash mudimu wa kulejan! (Efes 5:15, 16) Tukutwish pamwingap kuswimp mutapu wetu wa kusal chakwel kusal mudimu wa uchibol nkwash ngond umwing ap avud ku muvu. Tukutwish pamwing ap kusutish chisu chilemp mu kulejan kupandakanamu mutwadinga ni kusalang. Kusutishang minit 30 pa chisu tusadilinga rubing ni rubing kukez kuwejin asaa aad pa chisu chituletininga pa ngond!
3 Usu: Kwikal ni usu wa kusadil mu mudimu wa kulejan kwitin kwipuk kwipuwangesh ni mudimu yikata kutuziyishang nakash mu chilik cha kukangany kumusadil Yehova yawonsu tukutwisha. Tuswiridin kand kudjibwil kulemp yakamish yikutwisha “kuziyish” muchim wetu, kutushadishin usu wetu utukutwisha kusadil mu mudimu wa Nzamb. (Jinsw. 12:25) Ap anch tukwet yakamish, chikwikal chiwamp mudi ik ‘kutek chisend chetu padi Yehova’!—Kus. 55:22; Filip. 4:6, 7.
4 Yom Tukweta: Tukutwish kand kupan yom yetu tukweta mulong wa kukwash mudimu wa kulejan. Paul wayikasikesha ambay nend in Kristu “ateka chikunku cha nfalang kuns” chisu ni chisu chakwel kwikal ni chom cha kuyikwash nich antu adia mu maswir. (1 Kor. 16:1, 2, Manswik Masu) Chilik chimwing, tukutwish kutek kuns nfalang ja kulambul mulong wa maswir ma chikumangen chetu pamwing ni mudimu wa mangand mawonsu. Yehova ukat kusangerang yom tupanina ni muchim umwing, ap ang yidi kwau yikemp.—Luka 21:1-4.
5 Yehova watwinkisha kal yivud. (Yak. 1:17) Tumekeshin kujikitish kwetu mu kusadil chisu chetu, usu wetu, ni yom yikwau mulong wa kumusadil. Anch twasal mwamu tumusangareshin Yehova, “mulong Nzamb ukatil mwin kupan ukat kupan ni musangar.”—2 Kor. 9:7.