Kasikeshijanany Muntu ni Mukwau Piudianya mu Mudimu

¹ Etwawonsu tusangaredining dikasikesh dia “dizu dikat kulondau pa chisu chiburedinau.” (Jinsw. 25:11) Pitusadina mudimu ni akwetu, tukwijik nchik anch mambamb metu mayikasikeshin?

² Mambamb Makasikeshina: Chikasikeshining nakash kwisambin yom ya mu spiritu pitulejena! (Kus. 37:30) Tukutwish kwisambin piur pa yom twisambinang ap kushimunin yom yitusangareshina yitwamena mu mudimu. (Mid. 15:3) Ov, twatanin chom chisangareshina mu kwilej kwetu Bibil, mu magazet masu, ap ku yikumangan? Tukutwish twisambin yom twateshina ku diskur dia katat ku Chot cha Want.

³ Tukutwish twaziy anch mwin chikumbu walangwish chipul chitukasikedina kwakul. Chikwikal cha ukwash twitekina chisu chikemp kupwa kwa kudiokal ku chikumbu chinech chakwel tushinshikina ni mbay netu mutapu tukeza kutwish kuchakul, pamwingap tukutwish twakimbijol mu buku Comment raisonner. Anch twasanger chom kanang mu mambamb ma mbay netu, dizu diakin dia kumujikitish dikumukasikesh.

⁴ Ikal wa Kusambish: Ov, mu chirund chetu cha dilejan dia buku dia chikumangen mudi muntu wakad etu kulejan nend? Kumutazuk atutwalaku ku mudimu wa kulejan Kukututwishish “etu awonsu tukwashijanany.” (Rome 1:12, MM) Ayibol a rawonsu ni ankwash akat kusanger nakash kusal mudimu pamwing ni akwau, nakash nakash pamanch ap urel, palejeningau atutwambil amwing. Tukutwish kuyikasikesh ayibol anch twasal nau mudimu pamwing. Ov, kudi katwambil udia chibid ap uyedina ukangenya kusal yikutwishay mu mudimu? Kutenchik chakwel atutwala mu kulejan, ap ku dilejan dia Bibil, kukutwish kwa mukwash.—Jinsw. 27:17.

⁵ Kujikitish kukasikeshining chisu chawonsu, ap mu tumilong tukemp. Tufanyidin kwijik anch pitusadin mudimu wa kulejan ni akwetu, tufanyidin ‘kasikeshijan muntu ni mukwau.’—1 Tes. 5:11.