Mukand Wa Chisak Chitakedina
Ambay Akatish Atuman a Yehova:
Tukwet musangar wa kukufundilany en akadivar akatish! Twovil mudi mwiyovay kambuy Yohan, walonda anch ndiy wadinga ‘uyikatin mu uyakin’ ambay nend akaritiy ni wasangara mulong awiy adinga ni “kwendil mu uyakin.” (2 Yoh. 1, 4) Uyakin udi chiyukish chijim mudi ik kudi etwawonsu! Uyakin watukola kudiokal kudiay Babilon Mujim ni ku malejan mend ni ku yishankur yend yakad kumulimish Nzamb. Kuziyil ku uyakin kutukwashin twikala antu a rukat, a ranaken ni a riy. Ni uyakin watwinkishin kal mutapu wetwetu kwikal atentamina ku mes kwa Nzamb pamwing ni kutwinkish ruchingej ra mwom wa chikupu.
Tujikitishin kand chipandakena, mulong wa spiritu wa Yehova ukata kututakel ni kutukasikesh pichuku pichuku! Tukwet kashinsh anch wasangeranya pa kushinshikin mitambu kushalijan ya ditenchik dined dia rukat ra Yehova ku Yitentam ya Distrik yasutinang ey: “Atakedilau Nich Spiritu wa Nzamb.” Mudi muyila mangand ni kuyip chipandakena, chidi cha usey anch tukungamena pa spiritu wa usu wa Yehova chakwel atutakela mu machuku ma mar makash madia kurutu oku.
Twij nawamp anch michim yen ayipukuna pa chisu watanganya Annuaire ukwet jinsangu jikash ja akadivar netu ajijamedina mar makash mulong wa ritiy rau. Ni chamushen nakash pa kutongin anch antu inay avud ashinshamena ayibabatisha ni pasuta kachisu kakemp ni pasambisha yikokujol ap amwing au adinga kandikal ayibabatisha. Tuyikatining nakash mudi ik mulong wa kushinshaman kwau ni kujijaman kwau mulong wa kutentam! Chakin kamu, chilakej chau chipandakena kuwap chikasikeshin mupak wetu wa kudandamen kushinshaman ku Want kwikalap nchik mar ap ma mutapu ik makutwisha kutushiken.—1 Tes. 1:6-8.
Akadivar ni anambaz akatish, twij anch urishinany nich milong yivud yikala ya kutan nfalang ni ya mitapu yikwau mulong wa kusot kubangin majuku men chakwel mikala minungunina mu rukat. Kudi amwing en, chiyikasikedin nakash chakwel akwasha mudimu wa kulejan wa Want ni mijikit yikwau ya usey ya chikumangen pichuku pichuku ni nich kushinshaman. Wawiy mulong, kupwa kwa kwisambin ni kulembil nakash, twatenchikin yom kanang piur pa yikumangan ya chikumangen yikusambisha kusadik pa Chiwong 1, 2009. Tuchingejin anch ukusalany usu wen wawonsu mulong wa kutaninamu mu yitenchik yiney chakwel usutishany chisu chivud mu mijikit yen ni dilejan dia mu majuku men.
Ku yitentam yivud ya pakampwil ya dichuku dimwing, ya minyingumuku ni ya Distrik ya muvu unou, kwadi musangar ujim pa kuyiman antu avud awanyishina mikadil yitinau ni ababatishiwa. Mukach mwau mwadinga ni ansand nakash. Tukujikitishinany nakash en anvaj mulong wa kuyilil anen chakwel asangera uyakin ni mulong wa kuyikasikesh kwen chakwel ipana mulong wa kumusadil Yehova mu winsand wau. Ansand inay akatish arishin nich yikokujol yivud ku mashikol ni chikalap nchik mwamu awiy awanyisha ngikadil yitinau ni ababatishiwa chawiy chiletina ntumb yiwamp piur pa mutapu wayililau.—Kus. 128:1-6.
Tukutwishap twavuramen kukujikitishany mulong wa kuya kurutu kwa mudimu wa kutakel malejan ma Bibil—pamwing ni amishoner etu asadila mudimu ukash ni ayibol a pakampwil asadil mudimu ukash mu mujikit winou. Etwawonsu tudia ku Chisak Chitakedila tukwet musangar ujim pa kuman mudimu ujim usadilau akadivar ni anambaz netu mu mangand mawonsu payilau ni kuyilej antu akweta michim yitentamina anch: “Ez!” mu kuyitazuk antu in awonsu ovila impu chakwel eza “atambul mem ma kupand makad usey.” (Kubur. 22:17) Tuyezishinaku nich chirungul mu ukadivar wetu a pa mangand mawonsu antu 289678 ababatishinau mu mem muvu wadiap ou mulong wa kumekesh kwipan kwau!
Tukutwish kand niyetu twavurik ayinetu chisu ni chisu mazu ma kambuy Yohan, muntu wafunda anch: “Ngand yasut kal, ni maku mau mawonsu; pakwez wawonsu ukusadila rukat ra Nzamb ushich chikupu.” (1 Yoh. 2:17) Ni tufanyidin kuvurikang chisu ni chisu anch tushich mu chisu cha kwinsudiel nakash chikweza mangand ‘kusut’! Chikwikal cha manangu mudi ik tusadila nakash mwom wetu mulong wa kusal rusot ra Nzamb ni ‘kulam.’ (Mat. 24:42) Tukezap kwinan dichuku ap dimwing anch twasal mwamu, ni tukez kutaninamu yiyukish ya rukat ra Nzamb.—Isay 63:7.
Tuchingejin anch jinsangu jisangareshina ja mu mangand mavud jidia mu Annuaire winou jikez kwikal mudi dikasikesh kudi etwawonsu chakwel tuteka pa ndond ya kusambish mu mwom wetu yisak ya Want. Tukwijikishinany anch tukat kukutekany mu malembil metu chisu ni chisu ni tukukatinany nakash. El Yehova akwinkishany yiyukish yend yipitishina.
Akadivar nen
Chisak Chitakedila cha Atuman a Yehova