Chom ik Chikutwisha Antu Akwau Kwilejin Kudi En?

1. Ov, chom ik chilejau in kwilej a Yesu kusutil kudiay ndiy?

¹ Yesu walonda anch: ‘Itwikany mutond wam, ungiyiyany am.’ (Mat. 11:29, NW) Pakad ntad, ndiy wayileja antu akwau kwikal chilakej chiwamp , pakad kwikal in kulond mazu mend kusu. Tong mutapu wilejau in kwilej kusutil kudiay Yesu. Ndiy wadinga witudishina ni mwin rukat. (Mat. 8:1-3; Mar. 6:30-34) Ndiy wadinga muntu wikepishina. (Yoh. 13:2-5) Padingau ni kuya ni Yesu mu mudimu wa kulejan, in kwilej amumananga mudi muntu wadinga mwin mudimu wakad kuziy padingay ni kulejan uyakin kudi antu akwau. (Luka 8:1; 21:37, 38) Ov, mutapu ik wiyovilinga antu akwau patumeningau mu mudimu wa kulejan?

2. Ov, mutapu ik mwikadil wetu uwamp mu mudimu wa kulejan udinga chilakej chiwamp kudi in yikumbu?

² In Yikumbu: Mutapu wetu wa kudjal wikepishina, yaku yiwamp, ni kwipan kwa pakampwil kudi antu asangaredina yikutwish kuyisangaresh in yikumbu. (2 Kor. 6:3; Fil. 1:27) Awiy amen anch yisu yivud tukat kusadil Bibil. Antu akwau akat kushimok mulong tuteshining ni kalimish chisu chilondiningau. Kwikil kutadik mutapu tupanininga chilakej chiwamp kudi antu mu jindond tukata kulejan uruu wa Want.

3. Mwikadil ik uwamp tukutwisha kwikal nich kudi akadivar netu?

³ Akadivar Netu: Tongany kand, mwikadil uwamp ukutwisha kwikal kudi akadivar netu. Mushiku wetu mu mudimu wa kulejan ukutwish kuyibachik antu akwau chakwel niyau asala mudi etu. Utad ausawiling kudi utad ukwau, chawiy, kwirijek kwetu kuwamp mu mudimu wa kulejan kukutwish kuyikasikesh antu akwau chakwel alejan nich mushiku. (Jinsw. 27:17) Mushiku wetu wa kuyibangin nawamp antu asangaredininga pamwing ni kuyichirikin swa ukwashining antu akwau chakwel asalang mwamu. Kusal mwamu kukez kutubachik Kwikal ni muchim uwamp kudi akadivar ni anambaz mu kuwanyishang mudimu wetu wa kulejan.—2 Tim. 4:5.

4. Mulong wak tufanyidin kushinshikin chilakej chetu pa chisu ni chisu?

⁴ Chidi cha usey kushinshikin ku chisu ni chisu yom tusadilinga ni yom tulondininga chakwel tuman mutapu udia chilakej chetu chiwamp kudi antu akwau. Chilakej chetu chiwamp chikez kumusangaresh Yehova ni chikutwish kutusal chakwel twiyova mutapu umwing ni kambuy Paul pa chisu chalonday anch: “Ikalany in kwinlondul am mudi ni yam chinikata kumulondul kand Kristu.”—1 Kor. 11:1.