Kupalangesh Maladikij ma Chivurikish Kukusambish pa Ndol 2
1. Pa chisu tukeza kupalangesh mapaper ma maladikij ma Chivurikish cha muvu winou, ni chom ik cha usey chikweta kampany winou wa pa muvu?
1 Kudiosh pa Ndol 2 djat ni pa Ndol 17, tukez kupalangesh maladikij mulong wa chinship chipandakena usey cha pa muvu—Chivurikish cha rufu ra Kristu. Pasak, antu avud asangera kwez ku kampany winou wa pa muvu. Chilakej, pa dichuku dia Chivurikish, mband umwing watazuka biro wa mutiy ni walonda anch: “Neza kamu ku chikumbu, ni natana diladikij mwinshin mwa chis cham. Nasota kuya, pakwez nijap kamu chisu.” Mukadivar warumburila kwindond kukutwishay kutan rusangu piur pa diladikij dined. Mband winou wapwisha mambamb mend ni kukan anch, “Niyil uchiku winou ku chinship chen!”
2. Ov, chom ik tukutwisha kulond chisu tupanina diladikij?
2 Mutapu wa Kusadil: Pakwez, tukwet chisu chikemp cha kuwanyish teritwar, chawiy lel tufanyidin kulond mu wiswimp. Tukutwish twalond anch: “Vude, vude. Tusotin kwinkish dijuku dien diladikij dined dia chinship cha usey cha pa muvu tusadininga chikeza kwikal Diarubing, Ndol 17 mu mangand mawonsu. [Mwinkisha mwin chikumbu diladikij ku chikas.] Dichuku din diang didi dichuku dia chivurikish cha rufu ra Yesu. Diskur dia mu Bibil dikez kurumburil mutapu tukutwisha kutaninamu mu difut dia Kristu. Diladikij dined dimekeshin adres ni chisu chikeza kusambish chikumangan mu mwab wetu.”
3. Ov, mutapu ik tukutwisha kuyitazuk antu avud mudi chifanyidina?
3 Anch chikumangen chikwet teritwar mujim, amakurump akutwish kulejan mutapu wa kusha mapaper ma maladikij ku yikumbu kwakad antu pa chisu chibudikinau. Ikal nich kashinsh anch ukuyitazuk antu wachirikidina kutal, anamakwey a ku mujimbu, ambay ney a mudimu, ambay ney a ku shikol, ni antu akwau wijikijadina nau. Pa chisu uyila ni kupalangesh mapaper ma diladikij kwinsudiel kwa rubing, ufanyidin kand kupan magazet mitinau kusadil pa chisu chin chang. Ov, ukutwish wasal mudimu wa uchibol nkwash pa Ndol ni kwipan nakash mu mudimu winou wa musangar wa kampany wa kupalangesh maladikij?
4. Ov, mulong wak tusotining kuyitazuk antu chakwel eza akumangan netu ku Chivurikish?
4 Musangar mudi ik wa uman ukezau kutan kudi antu akeza kwikalaku! Awiy akez kutesh mutapu udia rukat rijim ra Yehova kusutil ku difut. (Yoh. 3:16) Akez kwilej mutapu Want wa Nzamb ukeza kusangaresh mangand. (Isay 65:21-23) Akez kand kuyilej chakwel amekesha rusot rau ra kusambish kwilej Bibil. Ridi rusot retu chakwel antu a michim yiwamp eza akula ku kampany winou ni inunga netu pa chisu chinech cha Chivurikish!