“En An, Yiziyilany Anvaj En”

“En an, yiziyilany anvaj en mu Mwant, mulong chinech chitentamin.”—EFESUS 6:1.

1. Kuziyil kukutwish nchik kukulam?

TUKUTWISH kwikal aom katat mulong twaziyila, oku antu akwau kadiap aom mulong alika kuziyil. Kuziyil ku yom ik? Ku yibabesh, chilakej, kuziyil ku yibabesh ya mijimbu yetu “[yatangau] nawamp mwamu.” (Kuseng 139:14) Mes metu mamening madj majal bwi, ni matu metu mateshining yidjimin ya nzaj. Kupwa, nzembu mukemp mu rinkind usadil anch nswich jetu jimana. Kudi antu alejau piur pa yak yikutwisha kwikalaku, yijingidij yiney yiding yibabesh ya kukimb ndond ya kwikingin ku rinkind mukash ni ruval wa mayal ukutwisha kujipan.

2. Ov, mulong wak an aswiridin yibabesh, ni mulong wak ufanyidinau kuyiziyil anvaj au?

² En ansangarum uswiridinany yibabesh piur pa yak yikutwisha kwikalaku, ni anvaj en akwet chisend cha kukubabeshany. Ukutwish kuvurik yakulejau anch: “Kangal wakwat kwi mbwabul. Ukwet kasu.” “Kangal kusengen mu wit. Mudi ubaj.” “Tal mutambu ni mutambu kurutu kwa kumatik balibal.” Cha ushon, an awila kal mu yak ap kufa mulong wa kujik matu. Kuyiziyil anvaj ey “chitentamin”—chitentamin ni chiwapin. Chidi kand cha manangu. (Jinswir 8:33) Verse mukwau wa Bibil ulondil anch chawiy “chimusangarishina” Nsalejetu Yesu Kristu. Chakin kamu, Nzamb ukwitin ey uyiziyila anvaj ey.—Kolosai 3:20; 1 Korint 8:6.

Difut dia Chikupu dia Kuziyil

3. “Mwom udia wakin” chom ik kudi etu avud, ni mutapu ik ukutwishau an kuchingejin kwikal ni mwom winou?

³ Kuyiziyil anvaj ey kukulam ‘mwom [wey] katat,’ pakwez kuziyil kukez kand kukutwishish kwikal nich mwom “usotila kwez,” ujimbwilingau kand anch ‘mwom wakin.’ (1 Timoteu 4:8; 6:19) Kudi avud pakach petu, kupand kwakin kudi mwom wa chikupu pa divu mu mangand masu ma Nzamb, mashilayimu mulong wa antu alamatina ba ku yijil yend. Chijil chimwing mu yijil yiney chilondil anch: “‘Mulimisha tatukwey ni makwey,’ chawiy chijidik cha kusambish nich kushilimu: ‘chakwel chikwikal chiwamp kudi en, ni ukushakam mwom shakame-e pansh.’” Chawiy anch wayiziyil anvaj ey, ukez kwikal nich musangar. Machuku mey ma kurutu makwikal ma diking, ni ukez kwikal mu mulong wa antu akeza kutambul mwom mu paradis pansh!—Efesus 6:2, 3.

4. Mutapu ik ukutwishau an kumulimish Nzamb ni kutaninamu?

⁴ Anch wayilimish anvaj ey kusutil ku kuyiziyil, ukumulimish kand Nzamb mulong ndiy ukwitina kuyiziyil anvaj ey. Pa chisu chinech kand, utanidinamu. Bibil ulondil anch: “Yam Yehova, yam Nzamb wen, Yam nikata kukulejany chakwel utaninanamu.” (Isay 48:17; 1 Yohan 5:3) Yom ik utanidinamu ku kuziyil? Kuziyil kukat kumusangaresh makwey ni tatukwey, niyau, akez kumekesh musangar wau mu mutapu ukeza kusangaresh mwom wey. (Jinswir 23:22-25) Pakwez chom chijim, kuziyil kwey kukat kumusangaresh Tatukwey wa mwiur, ni ukez kukufut mu mutapu umwing uwamp nakash! Tutalany katat mutapu Yehova wamuyukishay Yesu ni kumulam, niyend wilondila amwinend anch: “Nikat kusal machuku mawonsu yom ya kumushimek ndiy.”—Yohan 8:29.

Yesu—Mwin Kusal Mudimu Muwamp

5. Mayingish ik mitukweta ma kwitiyijin anch Yesu wadinga mwin kusal mudimu muwamp?

⁵ Yesu wadinga kabuzivumu kudi makwend, Mariy. Tatukwend nlij, Yosef, wadinga nsongamabay. Yesu niyend wikala nsongamabay, chimeken anch wilejina mudimu winou kudiay Yosef. (Mateu 13:55; Mako 6:3; Luka 1:26-31) Ov, utongin anch Yesu wadinga nsongamabay wa mutapu ik? Padingay mwiur, kurutu amwimisha mwivumu mu chilay kudi makwend mujik, mudi manangu mikadishau muntu, ndiy warumburila anch: “Nadinga nend [Nzamb] pamwing mudi mwin kusal mudimu muwamp. Namusangarishanga pichuku ni pichuku.” Nzamb wamwitiyija Yesu, padingay mwiur ndiy wadinga mwant wa mudimu. Ov, utongin anch padingay mwanikanch pa divu Yesu wasala usu nakash chakwel ikal mwin kusal mudimu muwamp, nsongamabay muwamp?—Jinswir 8:30; Kolosai 1:15, 16.

6. (a) Ov, mulong wak Yesu padingay mwanikanch wasala midimu ya ku chikumbu? (b) Mitapu ik ukutwishau an kumwimburij Yesu?

⁶ Chakin, padingay Yesu mwanikanch, yisu yimwing wasengananga masengan, mudi mulondilay Bibil anch an adinga ni kusengan pakuru. (Zakariy 8:5; Mateu 11:16, 17) Pakwez, ukutwish kwikal nich kashinsh anch mudi mwan wa kusambish mu dijuku dia uzwendj dia an avud, Yesu wadinga ni midimu ya kusal kuwejin pa diyiy diamwinkishau kudi Yosef dia kwikal nsongamabay. Kupwa, Yesu wikala mwin kulejan ni wipana mu mujikit wend mu chilik cha kukepishaku yisakin ya mwom wend. (Luka 9:58; Yohan 5:17) Ov, umen mutapu ukutwisha kumwimburij Yesu? Ov, anvaj ey akwitining kukomb mu kapalikany key ap kusal midimu yikwau ya ku chikumbu? Ov, akat kukukasikesh kumwifukwil Nzamb kusutil ku kukumangan ku yikumangan ya Ukristu ni kuyilej antu akwau yitiyij yey? Ov, utongin mutapu ik welay Yesu kusal anch amwita kusal yom mudi yiney?

Mwin Kwilej ni Mulej

Muwamp wa Bibil

7. (a) Yesu waya pamwing ni anany ku musambu wa Kusut kwa Yehova? (b) Kwisu kwadingay Yesu chisu chasambishau akwau kuchirik kwol kwau, ni mulong wak washalay kwinikwa?

⁷ Amakundj awonsu adinga mu majuku ma in Isarel ayinkisha mbil ya kuyang kumwifukwil Yehova ku tempel pa misambu yisatu ya in Yuda. (Kuvurik Yijil 16:16) Pawanyishay Yesu mivu 12, dijuku diau diawonsu daya ku Yerusalem ku musambu wa Kusut kwa Yehova. Aya pamwing ni anamakwend akwau ansangarum ni ayangadim. Pakwez, mu in aya pamwing ni dijuku dia Yesu mwadinga Salom, chimeken wadinga yayend a Mariy, pamwing ni nfumwend Zebede ni anau amakundj Yakob ni Yohan, eza kwikal atwimbuy.a (Mateu 4:20, 21; 13:54-56; 27:56; Mako 15:40; Yohan 19:25) Kushik pa kuchirik, Yosef ni Mariy atongina anch Yesu wadinga pamwing ni anamakwend, chawiy kamumanap. Kupwa kwa machuku masatu, Mariy ni Yosef amutana Yesu, amutana mu tempel, “ushich mukach mwa alej ni kuyitesh ni kuyipol yom.”—Luka 2:44-46.

8. Chom ik chasalay Yesu mu tempel, ni mulong wak antu akwamoka?

⁸ Yesu ‘wayipola’ alej mutapu ik? Yipul yend yimeken anch kiyadingap yipul ya chamwamu mulong wa kusot kwijik ap kutesh jinsangu. Dizu dia Ugrek diasadilau pinap disambidin yipul mudi yikatau kwipul mu dirumburish ni ya kushinshikin nich uman. Mwaning, ap padingay uchidi nsangarum, Yesu wakula mu kwilej Bibil ni wayikwamosha alej a relijon in kwilej nakash! Bibil ulondil anch: “Ni awonsu amutesha akwamoka mulong wa kwijik ni kwakul kwend.”—Luka 2:47.

9. Mutapu ik ukutwisha kwimburij chilakej cha Yesu cha kwilej Bibil?

⁹ Ov, mulong wak padingay uchidi nsangarum, Yesu wayikwamosha ap alej ija yivud nich kwijik kwend Bibil? Chakin, ndiy wataninamu mulong wadinga ni anvaj amwovila Nzamb wom amuleja kudiosh ku wanikanch malejan ma Nzamb. (Kubudik 12:24-27; Kuvurik Yijil 6:6-9; Mateu 1:18-20) Tukutwish kwikal nich kashinsh anch Yosef wadinga ni kuya ni nsand Yesu ku sinagog akatesha patanginau Mifund ni kuyirumburil. Ov, niyey ukwet chiyukish cha kwikal ni anvaj akata kwilej ney Bibil ni kuya ney ku yikumangan ya Ukristu? Ov, ukat kukwat nich usey usu usadilau, mudi mwadingay Yesu ni kusanger usu wa anvaj end? Ov, ukat kuyilej antu akwau yiwilejina, mudi mwasalay Yesu?

Yesu Wadinga Mwin Kuziyil

10. (a) Ov, mulong wak wadinga ufanyidinau anvaj a Yesu kwijik kwa kumutan? (b) Chilakej ik chiwamp chayishilau an kudi Yesu?

¹⁰ Ov, utongin mutapu ik wiyovay Mariy ni Yosef pamutanau Yesu kupwa kwa machuku masatu mu tempel? Chakin anch itudisha nakash. Pakwez, Yesu, washimoka pa kwijik anch anvaj end kadingap ija kudiay. Awonsu aad ading ij kuvadik kwa Yesu kwa chilay. Chikwau kand, ap anch kadingap ija tuyom twawonsu tukemp-tukemp, adinga ij chom kanang piur pa mudimu wend wa machuku ma kurutu mudi Mupandish ni Nyikel wa Want wa Nzamb. (Mateu 1:21; Luka 1:32-35; 2:11) Chawiy lel, Yesu wayipula anch: “Wankimbilany lel nchik? Kiutongilanyip anch am niwapidil kwikal mu [chikumbu cha] Tatukwam?” Pakwez, nich kuziyil, Yesu watumbuka waya ni anvaj end ni wachirika kwolikwau ku Nazaret. Bibil ulondil anch: “Wading ni kuziyil kudi awiy.” Chikwau kand, “ni makwend walama mazu minam mawonsu mu muchim wend.”—Luka 2:48-51.

11. Dilejan ik ukutwisha kwilejin ku kuziyil kwa Yesu?

¹¹ Ov, umen anch chiswapel kumwimburij Yesu, kuyiziyil anvaj ey chisu chawonsu? Ap utongin anch chisu chivud awiy kateshiningap mudia mangand m’ilel ni wij yom yivud kuyipandakanamu? Chidi chakin anch, ukutwish kwijik yivud piur pa yom kanang—pamwing ap piur pa kusadil matelefon ma ku chikas, kusadil ordinater, ap kusadil yom ya katat. Pakwez mutongina bil Yesu, wayikwamosha alej nich “kwijik ni kwakul kwend.” Ukwitiyij chakin kamu anch wiyisikesh nend, wij yom yikemp nakash. Pakwez, Yesu wayiziyila anvaj end. Chinech chirumburikinap anch wadinga ni kwitiyij mipak yau yawonsu. Ap mwamu, “wading ni kuziyil kudi awiy”—mu mivu yend yawonsu ya winsangarum. Dilejan ik utongina anch diawiy ukutwisha kwilejin ku chilakej chend?—Kuvurik Yijil 5:16, 29.

Kuziyil—Kukasiken

12. Mutapu ik kuziyil kukutwisha kupandish mwom wey?

¹² Chidingap chisu chawonsu chiswapela kuziyil, mudi mwachilejanau mivu yikemp yasutila kal ayangadim aad pasotau kumatik balibal wa jinjil musamban pa ndond pa kusutil mu kajil kakemp ka piur ka in ra pansh. Adinga ni kumukasikesh mbay nau wadinga utadishina mu kajil kakemp ka piur ka in ra pansh anch: “Ez kunoku John. Ez tuya pamwing, ov, wezin?” Pikanyekay, changadim umwing wamusaala anch: “Ubutwalel!” Pakad wom John, walonda anch: “Nifanyidin kutesh dizu dia makwam.” Padingay uchidi pa kajil ka piur, wova nfumbu jadil ni watala pansh waman ayangadim ayichany kal ku motak. Changadim umwing wafa, ni mukwau amutapa nayimp yitat ni amukatula mwend. Makwau wa ayangadim, wayileja anch chiyifanyidin kusutil mu kajil ka piur, weza kumulej makwend a John anch: “Nisotil anch ikala aziyidina mudi mwaney”—Efesus 6:1.

13. (a) Ov, mulong wak ufanyidinany kuyiziyil anvaj en? (b) Chisu ik chifanyidinay mwan kulik kusal yimulejinau anvaj?

¹³ Ov, mulong wak Nzamb ulondil anch: “En an, yiziyilany anvaj en”? Anch wayiziyil anvaj ey, ukat kumuziyil kand Nzamb. Kuwejin pa chinech, anvaj ey amana kal yom yivud kukupandakananamu ey. Chilakej, mivu yitan kusu kurutu kwa chak twisambinang kwiur oku chishikena, makwend a John wadinga ni murund wafisha mwan pasotay kumatik balibal winou! Chakin, chidingap chisu chawonsu chiswapela kuyiziyil anvaj ey, pakwez Nzamb ulondil anch ufanyidin kuyiziyil. Ku mutambu ukwau, anch anvaj ey—ap antu akwau—akulej kudimban, kwiy, ap anch kusal chom kanang chilikiningay Nzamb, ufanyidin “kumuziyil Nzamb chipandakena antu.” Chawiy, kupwa kwa kulond anch: “Yiziyilany anvaj en,” Bibil uwejidinaku anch, “mu Mwant.” Chinech chirumburikin kuyiziyil anvaj ey mu yom yawonsu yambatena nich yijil ya Nzamb.—Midimu 5:29.

14. Ov, mulong wak kuziyil kuswapel kudi muntu uwanyidina, pakwez mulong wak chimufanyidin muntu uwanyidina kwilej kuziyil?

¹⁴ Ov, utongin anch, ang wading uwanyidina—chawiy kulond anch, “wakad kufish nich, wakad ulim, waurila kudi akayitil,” mudi mwadingay Yesu—ov, chelang kukuswapel chisu chawonsu kuyiziyil anvaj ey? (Hebreu 7:26) Anch wadinga uwanyidina, ing welangap kwikal nich chibachikin cha kusal yom yiyimp, mudi muudia katat. (Disambishil 8:21; Kuseng 51:5) Ap Yesu, chading chimufanyidin kwilej malejan piur pa kuziyil. Bibil ulondil anch: “Ap anch [Yesu] wading nchik Mwan ndiy wileja kuziyil ku yom yikonkilay.” (Hebreu 5:8) Mutapu ik mar mamukwasha Yesu kwilej kuziyil, dilejan diadingay kand kal ileja padingay mwiur?

15, 16. Mutapu ik wilejay Yesu kuziyil?

¹⁵ Chadingay mwishin mwa umutakel wa Yehova, Yosef ni Mariy amulama Yesu ku ubaj padingay uchidi mwanikanch. (Mateu 2:7-23) Chakin kamu, pa chinech, Nzamb wadiosha diking dipandikenamu dia untu padi Yesu. Manangu ni mujimbu wa Yesu yamana mar makash chawiy chilondilay Bibil anch: “Walembila ni kujikitish, ni kudil kukash ni mansoj ku mes.” (Hebreu 5:7) Chisu ik chashikena chom chinech?

¹⁶ Chashikena pakampwil, pa yisu ya nsudiel ya mwom wa Yesu pa divu chisu cha choziu chipandakenamu cha Satan mulong wa kusot kushesh kushinshaman kwa Yesu. Chakin kamu Yesu wamana mar makash pa kutongin mutapu ukutwisha rufu rend mudi mukayitil kwikal nich katumb kayimp pa katumb ka Tatukwend ni “wamulembila Nzamb nakash; ni masuril mend mabudika mudi manans majim ma mash, madja pansh.” Kupwa kwa yisu yikemp, rufu rend pa mutond wa mar radinga risansena nakash chawiy Yesu wabarika “ni kudil kukash ni mansoj ku mes.” (Luka 22:42-44; Mako 15:34) Chawiy “wileja kuziyil ku yom yikonkilay” ni mwamu mwasangareshay muchim wa Tatukwend. Katat chidiay mwiur, Yesu ukat kutwanaken mar metu ni chisu chivud tukat kwikonk mulong wa kuziyil.—Jinswir 27:11; Hebreu 2:18; 4:15.

Twilejany Dilejan dia Kuziyil

17. Mutapu ik tufanyidina kuman kupup?

¹⁷ Pakatay tatukwey ni makwey kukupup, chimekeshin anch asotil kuwap kwey, ni akukatil. Bibil wipwil anch: “Mwan ik wakad kupup kudi tatukwend?” Ov, chikwikalap cha ushon anch anvaj ey kakukatilap nakash mu chilik cha kwishil chisu ni kusal usu wa kukupup? Chawiy chimwing kand, mulong Yehova ukukatil, chawiy chikatay kukupup. “Kupup kwawonsu kuchidi kwaku kikukat kumwinkiship muntu musangar, ching ushon kusu; pakwez kwinyim kwau kukat kusongish mabuj ma chisambu kudi awiy akata kwifumbiliku, mawiy kamu mabuj ma kutentam.”—Hebreu 12:7-11.

18. (a) Kupup kwa rukat udi uman wak? (b) Mutapu ik uwamp wamena kal antu atenchikau nich kupup kwinoku?

¹⁸ Mwant umwing wa pakuru wa in Isarel, wajimbulay Yesu mulong wa manangu mend mavud, wisambina mulong wa dipup dia rukat ra anvaj. Salomon wafunda anch: “Muntu ulikina kumubul mwanend umukisil, pakwez umukatila mwanend ukat kumubabesh nich mushiku.” Salomon walonda kand anch muntu ukata kutambul dipup dia rukat ukez kapandish mwom wend ku rufu. (Jinswir 13:24; 23:13, 14; Mateu 12:42) Mband umwing mwin Kristu uvurikin anch padingay uchidi mwanikanch, padingay ni kusal yom yiyimp ku yikumangan ya Ukristu, tatukwend wadinga ni kumulej anch, ang achirik ku chikumbu ukumubul. Katat umuvurikin tatukwend nich rukat mulong wamupupang nich rukat chakwel kutenchik mwom wend mwi njil yiwamp.

19. Ov, mulong wak ufanyidinanya kuyiziyil anvaj en pakampwil?

¹⁹ Anch ukwet anvaj akukatila nakash chakwel kwitekin chisu ni kusal usu wa kukupup nich rukat, ufanyidin kuyijikitish. Yiziyila, mudi kamu mwaziyilay Nsalejetu Yesu kudi anvaj end, Yosef ni Mariy. Pakwez yiziyila anvaj ey pakampwil mulong Tatukwey udia mwiur, Yehova Nzamb, mwamu mukulejinay kusal. Chawiy ukez kutaninamu amwiney, ni “chikwikal chiwamp kudi en, ni ukushakam mwom shakame-e pansh.”—Efesus 6:2, 3.

Ov, Ukwakul Nchik?

• Yiyukish ik yikutwishau an kutaninamu anch ayiziyil anvaj au?

• Padingay mwanikanch, mutapu ik washay Yesu chilakej mu kuyiziyil anvaj end?

• Mutapu ik wilejay Yesu kuziyil?

[Mazu madia kwishin kwa paj]

[Chipich chidia pa paj wa 20]

Yesu pawanishay mivu dikum ni yaad wadinga wij nakash Mifund