Ov, Tufanyidin Kumwipul Nzamb?

ANTU amwing alondining anch chiyipin kumwipul Nzamb. Akutwish kwiyov anch kudi kuburen kalimish kwipul mulong wak Nzamb ulikidil ap kalikidinap chakwel yom yimwing yishikena. Ov, chawiy utongina niyey?

Anch chidi mwamu, ukutwish kushimwok pa kwijik anch antu awamp avud amwipula Nzamb. Tal yilakej yiney yilondwilaku ya yipul yamwipulau:

Job muntu ushinshamena wipula anch: “Ov, mulong wak antu ayimp chikwetau mwom, ni kukasikan kushik ku upal wau?”—Job 21:7.

Abakuk muprofet ushinshamena wipula anch: “Ov, ey ukusangar nchik mulong wa antu inay ayimp in chisum? Mulong ey kiukutwishap kusangar pakuman antu akat kusal nayimp. Ov, mulong wak ey unenetin pakat kuyisheshau antu atentamina kuyipandakanamu awiy?”—Abakuk 1:13.

Yesu Kristu wipula anch: “Nzamb wam, Nzamb wam, ov, mulong wak wanlika am?”—Mateu 27:46.

Anch watang ma verse malondwila mazu minam, ukezap kuman ndond ap yimwing yimekeshina anch Yehovaa Nzamb wova kuyip pamwipulau yipul yiney. Chakin kamu, kulikidil kwend kukutwishap kutushimokish. Pakwez, tukatap kumusal Nzamb pitukata kumwipul mulong wa kuwanyish maswir metu makutwisha kusal anch twikala nich ukash wa ku mujimbu. Ndiy ukat kwakul nich musangar ku yipul yiney. (Mateu 6:11, 33) Chilik chimwing, ndiy usotin kutulej yom yikutwisha kutwinkish ukash wa manangu ni wa yovil. (Filip 4:6, 7) Chawiy lel, Yesu wayileja in kwilej end anch: “Itany kudi Nzamb, ukez kukwinkishany.” (Mateu 7:7) Kushilamu kwinoku kwa Yesu kumekeshin anch ndiy kadingap kwisambin ching kusu piur pa kutambul yom ya ku mujimbu kusu pakwez wisambina kand piur pa kwakul ku yipul yimwing ya usey.

Anch ukwet chisu cha kwipul, ov chipul ik pakach pa yipul yiney ukusota kumwipul Nzamb?

● Ov, mwom wam ukwet rutong?

● Ov, chom ik chikushikena pinikeza kufa?

● Ov, mulong wak Nzamb ulikidil chakwel nimana mar?

Mulong “mazu mawonsu mabachikay Nzamb kumafund,” ukez kutan yakul yipaninay Nzamb mu Dizu diend, Bibil. (2 Timote 3:16) Shinshikin yom yasala anch antu amwing ipula yipul yidia kwiur oku ni yakul yiletinay Bibil.

[Dizu didia Kwishin kwa paj]