Panany Uman mu Teritwar wa Winsak Nich Ukashinsh
1. Ov, mulong wak tufanyidinap kushadish ruchingej anch twoviling anch kupan uman mwindond ya mudimu wa kwisak kwovishining wom?
1 Ov, woviling wom piur pa kupan uman mwindond ya mudimu wa kwisak? Anch mwamu, kangal washadish ruchingej, mulong Paul, wadinga kashalapol ujijamena ni wakad wom, wafanyidin ‘kujijaman’ chakwel alejana. (1 Tes. 2:2) Mwinshin omu mudi milong tukeza kwisambin pamwing ni yiyul ya kusadil mulong wa kuyipandakan.
2. Ov, mulong wak tufanyidinap kwiyakamish piur pa kuyovish in mudimu kuyip?
2 Ov, Kuyikaturij in Mudimu Kukez Kuyovish Kuyip? Mu jindond jivud ja mudimu wa kwisak, in mudimu asadidining antu ni achingedining kuyikaturij. Awiy akez kwikal yisu yivud nich kalimish, mulong akutwish kukuman mudi yey ukutwish kuyiland yikwetau. Kusutil ku kudjal mu mutapu umwing wa kalimish ni ku kwikal muntu ukweta chirungul ni urund uwamp, kukez kukasikesh mwikadil wa kalimish.
3. Ov, mutapu ik tukutwisha kwipuk kuyovish in kuland ujim?
3 Ov, Nikutwish Kwisamb Kurutu kwa in Kuland Avud? Anch chitwishikin, tond chisu makashing makad kwikal nich midimu yivud, mudi chisu cha kusambish kumafungul. Chingel djat ni pakeza mukurump wa mudimu ap kalerik kwikal amwinend kurutu kwa kwisamb nend. Sal mu wiswimp nakash misamb yey.
4. Ov, yom ik tukutwisha kulond chisu chisadinau mudimu wa kwisak?
4 Ov, Yom ik Nifanyidina Kulond? Isamba ni mwin makashing anch kudi in mudimu avud. Ukutwish kulond anch: “chikasiken kuyitan in kwisak kwolikwau, chawiy lel, twezang ni kukutalany kwi ndond yen ya mudimu. Nij anch ukwetany yivud ya kusal, pakwez, nikulond mu wiswimp nakash.” Chakwel alika kutuman mudi in kulandish, chisu chawonsu, chidiap cha usey kulond mutapu upaniningau milambu ya kwisotil ap anch atwipul mutapu usadikininga mudimu wetu ni nfalang. Kwambatan nich mutapu wa mudimu wa kwisak, ukutwish kumwit mukurump wa mudimu mbil ya kwisamb mu wiswimp ni in mudimu. Chirikin minsamb yey kudiau. Anch mwin mudimu umeken mudi ukwatiken nakash, iswimpisha minsamb yey ni mwinkisha trakt. Anch chitwikishinap kwisamb ni in mudimu, pamwing ap ukezap kuyilikidil kusha mikand mu kapalikany kau ka kupimin ap mwi ndond yau yikwau.
5. Ov, yiyingish ik yidiaku chakwel wipana nich ukashinsh mu mudimu wa kupan uman mwindond ya mudimu wa kwisak?
5 Yesu ni Paul ayileja antu nich ukashinsh mu jindond jau ja mudimu wa kwisak, chad niyey ukutwish. (Mat. 4:18-21; 9:9; Mid. 17:17) Mwita Yehova chakwel akukwasha kwikal nich muchim witudishina ni ujijamena. (Mid. 4:29) Teritwar wa winsak ukwet antu akemp akad kwikal ku yikumbu yau, chad mulong wak ukwinkishap mutapu winou wa kupan uman chisu?