Tukudishany Ukaliweny Wetu mu Mudimu wa Kulejan—Kupan Uman Mwindond ya Kwisakin

Chidia cha Usey: Mulong antu avud asadining midimu mu asaa avud, mutapu uwamp wa kuyilej rusangu ra Want udi kuya kuyitan ku jindond jau jisadidiningau mudimu. Kupan uman mu jindond ja kwisakin kukutwish kwikal kusangareshina ni kwa yibudikin yiwamp, mulong ku jindond jinej kuburediningap antu ni in kulandish ayisangaredining ni kuyilimish antu ezina kuland. Chakwel atana yibudikin yiwamp, in kulejan afanyidin kwikal in kujingunin nawamp, mu kudjal ni mu kwileng nawamp. (2 Kor. 6:3) Chawiy lel, kalam wa mudimu ufanyidin kwijik nawamp jindond ja kwisakin ni kwijik anch anany afanyidina kulejan mu jindond jinej.

Mutapu wa Kusadil:

Tenchik mutapu wa kulejan mu wiswimp. Anch twamukwat mwin kulandish chisu chilemp, kakutwishap kand kutwitiyij dichuku dikwau.
Chifanyidin kutond chisu chakadiau kwikal ni in kuland avud, mudi chisu chikatau kwazuril yis.
Sambish bil kwambamb ni mukurump wa mudimu. Mekesh musangar wa urund. Ukutwish kulond anch: “Tukwendidinany mulong wa kwambamb nen mu wiswimp ku jindond jen ja mudimu, mulong chikasikening kukutanany ku yikumbu yen.” Muleja mu wiswimp ni mwinkisha trakt, magazet ap mikand yikwau. Chakwel kangal atumana mudi in kwisak, tufanyidinap kwisambin pa milong ya nfalang, ching anch atwipul kudiokilinga nfalang tusadininga nich mudimu wa kuchap mikand yetu.
Anch mukurump wa mudimu wasanger, tukumwit mbil chakwel twisamba mu wiswimp ni antwend a mudimu. Ku jindond jimwing ja kwisakin, chiwapining kwipul anch ukutwish kuyishil mikand yimwing yikutangau pa chisu cha kupim.
Jingunin nawamp, ni ikal ni nkeu. Chilakej, anch mwin kulandish ulondin ni mwin kuland ap ukwatiken, chingel chakwel apwisha chad wambamba nend.

Pakish Kusal Mwamu pa Ngond:

Pa chisu cha Difukwil dia mu Dijuku, sadilany chakumenaku mu wiswimp chiukutwishanya kusadilany anch wayany mu kulejan mwi ndond ya kwisakin.