DILEJAN DIA 52
Mulong wak Mutapu Wetu wa Kudjal ni wa Kwileng yid ya Usey
Muntu ni muntu ukweting mutapu wend ukatiningay kudjal ni kwileng. Anch twalondul mbil ja Bibil, tukutwish kudjal yom tukatina ni kumusangaresh kand Yehova. El tushinshikina mbil jimwing pakach pa mbil jinej.
1. Mbil ik jifanyidina kututakel chisu tutondina yom ya kudjal ni mutapu wa kwileng?
Tufanyidin kutond ‘masun mawamp, nich kwisikan ni manangu mawamp,’ ni kwikal inangina mulong wa kumekesh anch ‘tulamatin kud Nzamb.’ (1 Timote 2:9, 10) Shinshikin mbil jinying jilondwilaku ej: (1) Masun metu mafanyidin kwikal ‘mawamp.’ Mud mutapu ukata kuman ku yikumangan yetu, antu a Yehova akat kudjal mu mitapu kushalijan, pakwez mutapu wetu wa kudjal ni wa kukidish ap kukasish nsuk ukat kumekesh anch tumulimishin Nzamb tukata kwifukwil. (2) Kudjal ‘nich kwisikan’ kurumburikin anch masun metu mafanyidinap kuyilangwish antu akwau maku ma masandj, ap kupwitin nkeu nakash pad etu ayinetu. (3) Tumekeshin anch tukwet ‘manangu mawamp’ anch twipuk chaku cha kusot kwimburij mulad win wawonsu wa kudjal ni wa kwileng upalangena. (4) Mutapu tumekena ufanyidin kumekesh anch ‘tulamatin kud Nzamb,’ ni kumekesh kud antu akwau anch tumwifukwidin Nzamb wakin.—1 Korint 10:31.
2. Mulong wak tufanyidin kuyitongin antu akwau chisu tutondina masun?
Ap anch tukwet want ipau wa kutond masun tukatina kudjal, tufanyidin kutongin mutapu ukwiyovau antu akwau piur pa yom tudjita. Tukat kusal usu wa kulik kumupwakesh muntu win mwawonsu, chawiy tufanyidin “kumusangarish [mwanamakwetu] mwin Kristu mu yom yiwamp, mulong wa kumukasikesh.”—Tang Rom 15:1, 2.
3. Mutapu tudjadina ukutwish nchik kuyipwitin antu akwau ku uyakin?
Tukat kushinshikin mutapu wetu wa kudjal yisu yawonsu, pakwez tukat kusal mwamu nakash patuyila ku yikumangan ni mu mudimu wa kulejan. Tukatinap anch antu alika kutesh uruu wa usey tuyitwadidina mulong wa mutapu tudjadina. Pakwez, masun metu mafanyidin kuyipwitin antu ku uyakin ni kumekesh “katumb ka malejan ma Nzamb Mupandish wetu.”—Titus 2:10.
ILEJA CHIKURIKINA
Shinshikin mutapu tukutwisha kwikal nich kashinsh anch masun metu ni mutapu tumekena yimekeshin anch tud in Kristu.
Kudjal ni kwileng kwetu kukutwish kumekesh anch tuyilimishin anyikel ap bwat. Ap anch Yehova ukat kutalang yidia mu muchim wetu, pakwez mutapu wetu wa kudjal ni kwileng ufanyidin kand kumekesh anch tumulimishin
4. Kudjal ni kwileng kuwamp kumekeshin anch tumulimishin Yehova
Diyingishin ik dia usey nakash ditubachikining kubangin mutapu wetu wa kudjal ni kwileng? Tang Kuseng 47:3, kupwa isambinany yipul ey:
Kwijik anch tumumekeshin Yehova kufanyidin kutubachik kudjal mutapu ik?
Ov, utongin anch chid cha manangu kwiyakamish piur pa mutapu tudjadina patuyila ku yikumangan ni mu mudimu wa kulejan? Mulong wak?
5. Mutapu wa kukwat mipak yiwamp piur pa kudjal ni kwileng
Twikala ni masun ma usey nakash ap bwat, mafanyidin kwikal minangina ni mawanyidina kukwatijan ni chisu ap yom tusadina. Tang 1 Korint 10:24 ni 1 Timote 2:9, 10. Kupwa isambinany mulong wak tufanyidin kwipuk kudjal masun . . .
mikisina, makad kurijek nawamp ap makad kumekesh kalimish.
malamatina, mamekeshina mujimbu, ap malangwishina maku mayimp.
Ap anch in Kristu kakwetap kuswir kwa kulimish Chijil cha Moses, pakwez chimekeshin yom yitonginay Yehova. Tang Kuvurik Yijil 22:5, kupwa isambinany chipul ech:
Mulong wak tufanyidin kwipuk kudjal ni kwileng kuyimekeshina amakundj mud amband ap amband mud amakundj?
Tang 1 Korint 10:32, 33 ni 1 Yohan 2:15, 16, kupwa isambinany yipul ey:
Mulong wak tufanyidin kushinshikin anch mutapu wetu wa kudjal ukat kuyipwakesh antu a ndond tushicha ap a mu chikumangen?
Mitapu ik ya kudjal ni ya kwileng yivulijadina kwi ndond ushicha?
Ov, utongin anch kud mitapu yimwing pakach pa mitapu yiney yidia yiyimp kud in Kristu? Mulong wak?
Tukutwish kudjal ni kwileng mu mitapu kushalijan ni kumusangaresh Yehova
ANCH MUNTU WAKWEL ANCH: “Kwikil muntu ufanyidina kwinlej mutapu wa kudjal, ud mulong wintadina amwinam.”
Ov, niyey witiyijin mwamu? Mulong wak?
YOM TWILEJA KAL
Anch twakwat mipak yiwamp piur pa kudjal ni kwileng, tumekeshin anch tumulimishin Yehova ni antu akwau.
Ov, uvurikin?
Mulong wak mutapu wetu wa kudjal ni wa kwileng yid ya usey kud Yehova?
Mbil ik jimwing jifanyidina kututakel chisu tukwatina mipak piur pa mutapu wetu wa kudjal ni kwileng?
Mutapu wetu wa kudjal ni wa kwileng ukutwish kuyibachik antu kuman nchik difukwil diakin?
JINGUNIN KAND
Tal yom yikutwishau antu akwau kutong anch aman mutapu udjita.
“Ov, Antu Akwau Anmen Mutapu ik?” (Mutu wa mulong udia pa jw.org)
Ileja mulong wak chid cha manangu kutong kurutu kwa kwifatul pa mujimbu.
“Yom ik Yilondinay Bibil Piur pa Kwifatul pa Mujimbu?” (Mutu wa mulong udia pa jw.org)
Tal mbil jikwau jikutwisha kutukwash kukwat mipak.
“Mutapu Wey wa Kudjal Umutumbishining Nzamb?” (Chinong cha Kalam cha Ngond wa 9, 2016)
Mutapu ik washikenay mband umwing mwin kashinsh kwikal ni chitongijok chiwamp piur pa mipak ya antu akwau yitadina kudjal ni kwileng?
“Kudjal ni Kwileng Yankangesha Kuya Kurutu” (Lankany! wa 22 Ngond wa 12, 2003)